مقتطفات من الزبور 1 - الترجمة اللبنانية مع القافية

دعاء الحكمة للنبي داود (ع)

¹ هنيئاً لِيلّي ما بيِسمَع لولاد السوء، وما بيمشي ممشاهُن، ولا بيقعُد مع المستهزْئين ولابيعجبوا هواهُن.

² بالعكس بقوم وبنام وذِكِر كتاب الله علسانُه، وبطاعة ربّه بيفرَح وبيعمل كلّ شي عشانُه.

³ بيِشبَه شجرة مغروسة عمجرى ميْ، بتثمِر بوقتها وما بتِدْبَل وَلا شوي، وكلّ أعمالُه ناجحة.

⁴ مش مِتِل جماعة الأشرار المِشْ فالحة، يلّي بطيروا متل القشّ بالريح.

⁵ وبيوم الحساب الكَفَرة الأشرار ما بيثبتوا منيح، وبآخر النهار أبداً ما بيتحاسَبوا مع الأبرار،

⁶ لأنّه ربّ العالمين بيرعى سُبُل الصّالحين. أمّا يلّي بيختاروا طريق الشرّ فهنّ من الضّالين.