قصة النبي يونس 4 - الترجمة اللبنانية مع القافية

النبي يونس (عليه السلام) عم يِسأَل ليش!

¹ بس النبي يونس كتير اتضايَق إنُّه ربنا عفى عن نينوى، وغُضِب من رحمة الله عشعب بنظرُه ما منُّه نوى

² قام نادى ربُّه وقال: "يا ربّ، من وقت ما كنت ببلادي، كنت عارِف إنَّك بالرحمة عهالشعب رح تنادي، وقرّرت ما إجي وخبّرهُن، إنَّك رح تدمِّرهُن، بالعَكس عفيتُن من المصيبة يا حليم، لأَنُّك رحمَن رحيم

³ وهلّأ دخيلَك! دخيلَك يا ربّ أنا منهار، خدني لعندَك أهون عليّي ما شوف هالنهار"

⁴ ردّ عليه سبحانُه وقال: "إنتَ بأيّ حق عم تناقِشني وزعلان! ومشيئتي مش قبلان؟"

⁵ قام ضهر النبي يونس من نينوى وراح عشرقها، وعمِل خيمة تَتردّ عنُّه الشمس وقعد تحتها. وصار يراقِب شو رح يصير للمدينة.

⁶ وبقدرة ربنا نبَّتِت لقطينة، وكبرِت وراقا وعملت فَيّ. ويونس انبسط كتير فِيا مش شويّ

⁷ بس تاني يوم الفجر أمرّ سبحانُه دودة تنجُر النبتة نجِر! يِبسِت اللقطينة بليلة وضُحاها

⁸ ولمّا طلعِت الشمس بسماها، أمر سُبحانُه ريح شرقيّة، ضربِتلّه راسُه بحمّى قويّة. ساعِتها تمنّى الموت وقال: "يا رَيتني أنا يلّي متت مش هيّ!"

ردّ ربّ العالمين عسؤال النبي يونِس (عليه السلام)

⁹ وهون ردّ عليه ربنا وقلُّه: "إنت زعِلت عنبتة صغيرة! ما زرعتها ولا تعبت عليها ولا دقيقة!" جاوَب يونِس وقال: "إيه من حقّي إزعَل بالحقيقة!"

¹⁰ رجِع ردّ سبحانُه وقال: "هالنبتة طَلعِت بليلة وماتِت تاني ليلة وإنت عليها شفقان

¹¹ طيبِّ ومش زعلان عمدينة فيها أكتر من مية وعشرين ألف إنسان، ما عدا الدواب! شعب مش عارِف الخطأ من الصواب؟! مش أولى أنّي أعطيه فرصة، وبالرحمة إنهي هالقصّة؟"