तीतोस 3 - ॱलोवाशाङा घी दुई होदे झ्यी 1 पो़न्पोक्या धाङ आङजा हो़गीन मीक्याई होकला धो़क। काला ङेन धेनी ले शाङपो झ्यीयेला नाम्हीना झ्यी छोक-छोक झ्येरी धो़क, ॱनेरी खुङक्याला ढेन्सो़ ॱलोङ। 2 सी़या कोरला लाब ङेन्पा ॱमास्ये धेनी धुगा ॱमाताङ धेनी ज्याम्बो धाङ च्यो़ शाङा धेन्पा तो़न ॱनेरी, खुङक्याला स्यो़क। 3 थेङ च्यीकला होराङक्याः ॱलेन्पो धाङ खाला मेङेन्गीन धाङ गो खोरती धेता धाङ दो़पा धाङ दो़ङेन ॱनाछोकगी वाङदु स्योरस्या धाङ ॱमीच्यीकी ङेन्पा धाङ ठादोकगी, खाङखा हो़तालाक। मी घीरीगी होराङला दाङा झ्येवालाक धेनी होराङ नाङदु च्यीकगी च्यीकला दाङा झ्येवालाक। 4 हीना होरी क्याम्गो़न को़न्क्षोकगी ॱङीङजे धाङ मीक्याला झाम्पा तो़न्दी घाङला, 5 होरी ले शाङपो झ्येरी मेन्दा, खोङबागी ॱङीङजेगी झ्येरी होराङला क्योप जेपालाक। धाम्पे थुक्ङीगी थोक्ने खोङबागी होरी धीक्पा ठी़सो़ जेदी, होराङला धाब्ले केरु च्युक्ती मीछे साबा ॱनावालाक। 6 को़न्क्षोकगी होरी क्याम्गो़न येशु मास्यीकागी थोक्ने, होराङला धाम्पे थुक्ङी मेछो़ली ॱनाङा जेपालाक। 7 देरे झ्येरी खोङबागी थुक्जेगी थोक्ने, को़न्क्षोकगी डुङदु होराङ ढाङपो झ्युवालाक धेनी होराङगी रेवा झ्यीगीन, थामेपे छेसोकगी ग्युज्यीन को़ जेपालाक। 8 दे लाब दे धेन्पा लाक। धेनी को़न्क्षोकला धेपा झ्यीगीन मीक्या ले शाङा झ्यीयेला दो़पा हुङास्योक, ॱनेरी दे ॱलापच्याक्याला, ख्यो़ स्युक ग्याप्येला ङी दो़पा हो़क। देक्या मीक्याला शाङपो धाङ फेन थोक्वा दुक। 9 क्षोमेगीन ॱङ्योक्टाक्याने धाङबी मीगी मीरापक्या धाङ क्षो़ठीमगी क्षीला, खा थाप्कीन धाङ धुगा ताङगीनक्याला झ्यी़दोक माझ्यी घीझ्येरी ॱनाना देक्या फेन ॱमेथोक्कीन धाङ क्षोमेगीन लाक। 10 टुक्ती खा डादु च्युक्कीन मीक्याला थेङ च्यीक याङमेना थेङ ॱङी ङेन्ता तोङ धेनी धोराङा मेङेन्ना, होदेमुला ढेवा घीन्दा माश्याक। 11 देरे मीक्या धेन्पाने ग्याप लोक्ला धाङ राङगी धीक्पागी क्षेपा फोक्पालाक ॱनेरी, ख्यो़ला क्षा हो़तालाक। थामे लो़न 12 आरतेमा याङमेना तुखीकोसला, ङा ख्यी़चारु झाङये झ्यीदीहो़क। खुङ ॱङीउने च्यीक ॱलेप्लुङ मेताला, ख्यो़ नीकोपोलीसदु ङाला थुक्येला घाङ मीजे थापस्यी झ्यी घीझ्येरी ॱनाना ङा घुङगा होदुरुराङ धेयेगी ढो़ झ्येहो़क। 13 ठीम्पो़न जेनास धाङ आपोल्लोसगी डुला, ख्यी़ घी थुक्तु रोवा झ्यी। धेनी खुङक्याला घीन्दा ॱमेछाङगीन माझ्युङास्योक। 14 ॱहाताक्पाला घो़गीनक्याला रोवा झ्यी थुक्येला, होरी मीक्या ले शाङा झ्यीयेला राङ-राङगी धी़चो़गो लाक्लेन झ्यी घो़गीलाक। धेनी खुङक्या फेन ॱमेथोक्कीन झ्युङगीमालाक। 15 ङीमुला हो़गीन घीरीगी ख्यो़ला टास्यी धेलेक पुली। होराङला चेवा झ्यीगीन धेपा झ्यीगीनक्याला टास्यी धेलेक पु। खे घीरीला थुक्जे हुङास्योक! |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.