तीतोस 2 - ॱलोवाॱलापच्या धेन्पा 1 हीना ख्यो़, तावा ढाङपोला घी थी़न्दी, होदेगो स्यो़क। 2 मी गेम्पाक्या राङ छो़ शीम्गीन धाङ याराप धाङ साम्लो थोङा धेनी धेपा धाङ झाम्पा धाङ शो़पाला तेन्पो हुङघो़गीलाक ॱनेरी स्यो़क। 3 होदे च्योक्रे घेमोक्याला धाम्पे मीजी पी़ धेनी ठामा ॱमास्ये धेनी क्षाङदो़मा माझ्युङ धेनी मी श्येम्माक्याला ॱलापच्या शाङपो तेर ॱनेरी स्यो़क। 4 देरे झ्यीना खुङक्याई केमी नाच्युङमाक्याला राङ ख्योवा धाङ टुवाक्याला चेवा झ्यीये धाङ 5 साम्लो थोङा धाङ चाङमा धाङ नाङले झ्यीगीन धाङ सेम शाङपो धाङ ख्योवागी, खाला ङेन्पो झ्युङयेला ॱलाप्कीलाक। धेनी को़न्क्षोकगी काला ॱमेटा ॱमेपाप्कीलाक। 6 दे च्योक्रे श्यो़न्पाक्याला साम्लो थोङा झ्युङयेला, ॱलोप्चुङ ग्याप घो़गीलाक। 7 लाब घीरीला राङ-राङला ले शाङपोगी पे तो़न। ख्यो़री ॱलापच्यागो ढाङपो धाङ याराप 8 धाङ क्यो़न चुक ॱमीथुक्कीन लाब धेन्पा तो़न। देरे झ्यीना ख्यी़ ग्याप लोक्कीनक्याला ङोजा झ्युङालाक घीझ्येरी ॱनाना खुङक्याला होरी कोरला ङेन्पा ॱनाये घीया मेयोङालाक। 9 ॱयोक्पोक्या राङ दाक्पोगी लाब घीरीला खाला ङेन्पो धाङ दाक्पोगी दो़पा काङ थुप्कीन धाङ खालेन ॱमेलोक्कीन धाङ 10 लाक्पा चाङमा धाङ ॱलो का थुप्कीन झ्युरी, तो़न घो़गीलाक। धेनी होरी क्योप्खेन को़न्क्षोकगी कोरला ॱलापच्या तेरतागोला, घारु हीन्ना खुङक्याई घुस्याप झ्यीगीलाक। 11 को़न्क्षोकगी थुक्जे, मी घीरीगी थारपागी दो़नला झ्युवालाक। 12 होदे थुक्जेगी होराङला क्षो़ला ॱमीथी़न्गीन धाङ जीक्तेनगी दो़पाक्या पाङदी, दे जीक्तेनदु साम्लो थोङा धाङ ढाङपो धाङ को़न्क्षोकला थुक्ङेउ मीजी पी़येला, ॱलापच्या ॱनाङालाक। 13 धेनी होरी खाक्क्षे को़न्क्षोक धाङ क्याम्गो़न, येशु मास्यीकागी शीजे ॱङो़न्ये हीन्गीन ङीमा झ्यीलाप्क्षेगोला, होराङ रेवा झ्येरी घुक्ती धेतालाक। 14 धेनी होरी धीक्पा घीरीने थारपा ॱनाङयेला धाङ होराङला चाङमा शो़री, खोङबा खोराङगी क्षीला मीरीक जेयेला धाङ लेगा ढाङपो झ्यीयेला खेलेन झ्यीगीन झ्युङयेला, मास्यीकागी राङगी कुसोक होरी क्षीला ॱलो़ तावालाक। 15 दे ॱलापच्याक्या ॱलोप। खेरी आङजा घीरीने ॱलापच्या स्युक्क्षे तेर धेनी आङजी तोङ। राङला सी़या ॱङाजीन झ्यीरु ॱमाच्युक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.