रोमापा 9 - ॱलोवाको़न्क्षोकगी थुकोङला तेन्दी धाम्पा जेपा 1 मास्यीकागी नाङ ङा धेन्पा ॱनीहो़क, ङा शोक ॱनामेन। ङी स्येशाङगी, धाम्पे थुक्ङीगी थोक्ने ङाला धेन्पाङ झ्यीदीक। 2 धेन्पागो घी लाक ॱनाना, ङी सेम नाङदु दुङा क्षे धाङ ढाक्ये मेगीन शुक दुक। 3 धेनी ङा ङाराङगी रीग्यु च्यीक्पा हीन्गीन पी़न्दाक्याई दो़न्दु, ङा ङाराङला ॱमेमो फोक्ये धाङ मास्यीकाने खा डायेगी दो़पाः झ्यी थुक्येहो़क। 4 खुङक्या नी, ईस्राएल्पाक्या लाक धेनी को़न्क्षोकगी राङगी से धाङ सेमो झ्युङयेला दाम्दाक्या लाक। खोङबागी राङगी शीजे खुङक्याला ॱङो़न जेपालाक। धेनी खुङक्यामुला धाम्चा श्या जेदी, खुङक्याला क्षो़ठीम ॱनाङा जेपालाक। धेनी खोङबागी खुङक्याला क्षो़खाङ नाङ क्षाक्क्षो़पा पुये धाङ उ ॱना श्येस्याक्या ॱनावालाक। 5 आब्राहाम धाङ ईसाक धाङ याकोब नी, खुङक्याई धाङबी फामाक्या लाक। धेनी ली़ला छा श्याक्ना मास्यीकाः खुङक्याई मीरीकने लाक। धेनी खोङ नी धी़ ग्युन्दु तो़पा हो़गीन, ॱलानामेपे को़न्क्षोक लाक। आमेन। 6 हीना को़न्क्षोकगी धाम्चा जेजागो माडुप्कीन मालाक। घीझ्येरी ॱनाना ईस्राएलने केक्या घीरी को़न्क्षोकगी मी मालाक। 7 धेनी आब्राहामगी ग्युपा हीन्गीन घीरी खोङगी टुवा ॱङोन्ने मेहुङालाक। हीना सुङरापला देरे ढीक हो़तालाक, “ईसाकगी थोक्ने ख्यी़ ग्युपाक्या थो़न्गीलाक।” 8 दी दो़न नी, ली़ने झ्युजा टुवाक्या को़न्क्षोकगी टुवा मेन्दा, हीना को़न्क्षोकगी धाम्चागी थोक्ने झ्युजा टुवाक्या, आब्राहामगी रीग्यु चीवालाक। 9 घीझ्येरी ॱनाना को़न्क्षोकगी धाम्चागी देरे सुङालाक, “लो स्याम्मा धी़चो़ देलाराङ, ङा ख्यो़चारु हुङयेहीन धेनी साराला भीजा च्यीक झ्युङगीलाक।” 10 देचो़ च्यीगा मेन्दा रेबीकाला टु ॱङी आकी च्यीकने झ्युवालाक धेनी होदेगो होरी धाङबी फामा ईसाक लाक। 11-12 धेनी टु छीब्रु दे ॱङीउ ॱमाके एन्लाराङ धेनी शाङा-ङेन्पा घीया माझ्ये एन्ला, को़न्क्षोकगी राङगी थुकोङला तेन्दी रेबीकाला देरे सुवालाक, “भीजा क्षेगी च्युङाला श्याप्ची श्युगीलाक।” दी दो़न नी, खोङगी दामा जेगीनगो लेने मेन्दा हीना राङगी भो़ जेगीनला तेन्दी डुप्येगी क्षीदु लाक। 13 दी कोरला सुङरापला देरे ढीक हो़तालाक, “ङी याकोबला झाम्पा झ्येवी हीना एसाउला दाङा झ्येवी।” 14 धा ॱहाना होराङ घी ॱनागुलाक से? को़न्क्षोक मेढाङा हो़तालाक से? देरे फुक्की मालाक। 15 घीझ्येरी ॱनाना खोङगी मोशेला सुवालाक, “ङी सुला ॱङीङजे झ्यीङी दो़दी, होदेला ॱङीङजे झ्यीयेहीन, धेनी ङी सुला झाम्पा झ्यीङी दो़दी, होदेला झाम्पा झ्यीयेहीन।” 16 होझ्येरी दे नी मीगी दो़पा याङना थापस्यीला रा मीली़दा, हीना ॱङीङजे जेगीन को़न्क्षोकला रा ली़दालाक। 17 घीझ्येरी ॱनाना सुङरापगी ग्यावु फारोला सुवालाक, “ख्यी़ थोक्ने, ङी नी़थु तो़न्ये धाङ ङी मीङ जाम्लीङ घीरीदु सेटाक झ्यीयेगी क्षीला, ङी ख्यो़ला ॱलाङबी।” 18 होझ्येरी को़न्क्षोकगी सुला ॱङीङजे जेङी दो़दी, होदेला ॱङीङजे ॱनाङालाक धेनी सुला सेम ग्योङा जेङी दो़दी होदेला ग्योङा जेदालाक। को़न्क्षोकगी थुक्ठो़ धाङ ॱङीङजे 19 धा खेक्याई ङाला ॱनागीलाक, “को़न्क्षोकगी घीझ्येरी धान्दा मीला क्यो़न तो़न जेदाले? खोङगी थुकोङला सी़ काक थुप्कीले?” 20 हीना को़न्क्षोकला खालोक्कीन मी ख्यो़ सु हीनो? शो़सा च्यालाकगी शोगीनला “ख्यी़ ङाला देरे घीझ्येरी शो़वा?” ॱनेरी ॱनाले? 21 जामा शोगीनला दाम्बा च्यीकने, ॱनो़ च्यीक दो़न खाक्क्षे धाङ च्यीक क्युमागी क्षीदु शोयेगी आङजा मेतालाक से? 22 देरेराङ झ्येरी को़न्क्षोकला थुक्ठो़ धाङ नी़थु तो़न्येगी आङजा हो़ना, खोङगी थुक्ठो़ भाप्ती मेताला डोये हीन्गीन मीक्यामुला, खोङबागी शो़गोम जेहो़ना घी दुक से? 23 दे नी एम्माने शीजेगी क्षीला को़न्क्षोकगी डाढीक जेजा, खोङगी ॱङीङजे तो़न्जा मीक्या खाला, खोङगी ॱलानामेपे शीजे ॱयो़ल्ले ठाछाई झ्येरी, ॱङो़न्येगी क्षीदु खोङबागी जेपालाक। 24 धेनी होराङक्यालाः भो़ जेपालाक। धेनी याहुदापाक्याला च्यीगा मेन्दा याहुदापा मेन्गीनक्यालाः भो़ जेपालाक। 25 खोङगी ॱङो़नस्येखेन होशेगी धेपला देरे सुङालाक, “ङी मी मेन्गीनक्याला, ‘ङी मी’ ॱनेरी भोयेहीन। धेनी ङी चेवा माझ्येगीनक्याला, ‘ङी चेवे’ ॱनेरी भोयेहीन।” 26 धेनी खुङक्याला, “‘खेक्या ङी मी मालाक’ ॱनेरी ॱनासारुराङ, खुङक्याला ‘कुसो़न्पो श्युक्कीन को़न्क्षोकगी से धाङ सेमो’ ॱनेरी भो़गीलाक।” 27 ॱङो़नस्येखेन यस्यायागी ईस्राएलगी कोरला देरे केक ग्याप्पालाक, “ईस्राएलगी भुग्यु ग्याछोगी भेमा च्योक्रे माङा हो़नाः, खुङक्याने ल्हाक्मा ल्हाक्लाक्याला च्यीगा थारपा थोप्कीलाक। 28 घीझ्येरी ॱनाना चोवोगी श्यीवा मेजेदा, थेङ च्यीकला राङगी ठीम्चो़ जेगीलाक।” 29 दी कोरला ॱङो़नस्येखेन यस्यायागी एम्मा देरे ॱङो़न जे हो़तालाक, “ॱलानामेपे को़न्क्षोकगी, होरी क्षीला भुग्यु श्याक माजे हो़ना, होराङ सादोम च्योक्रे हुङयेहो़क, धेनी होराङ गोमोरा च्योक्रे झ्युङयेहो़क।” ईस्राएलगी धेपा मेगीनगी कोर 30 धा ॱहाना होराङ घी ॱनाये? ढाङतेनला ॱमेचागीन याहुदापा मेन्गीनक्याला ढाङतेन थोप्दुक। धेनी दे ढाङतेन नी, धेपागी थोक्ने थोप्दुक। 31 हीना क्षो़ठीम ॱरुरी ढाङतेन थोप्येला काल्ले ग्याप्कीन ईस्राएल्पाक्याई, होदे डुप ॱमाथुक्पालाक। 32 घीझ्येरी ॱमाथुक्पाले? घीझ्येरी ॱनाना खुङक्याई धेपाला ॱमातेन्पा हीना राङगी झ्यीगीन लेगाला तेन्दी, काल्ले ग्याप्पालाक। खुङक्या खोरी लामला हो़गीन धोगोङला थोक्ती घेवालाक। 33 दी कोरला सुङरापला देरे ढीक हो़तालाक, “तो़दाङ, ङा सीयोनदु थोक्कीन धाङ गेरु च्युक्कीन, धोगोङ च्यीक श्याक्येहीन। हीना खोङला धेपा झ्यीगीन सुवाः ङोछाला ॱमीछी़गीलाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.