रोमापा 7 - ॱलोवाॱनामा लेन्गीनगी कोरला क्षो़ठीम 1 पी़नक्याओ, ङा क्षो़ठीम स्येगीनक्यामुला लाब ताङाहीन। क्षो़ठीमगी मी च्यीकला सो़न्पो धेगीन थुक्पे, च्यीका वाङ झ्यीदालाक ॱनागीन, लाब दे खेक्याला स्येये मेते? 2 पेला श्याक्ना, ॱनामाला सोसा केमी च्यीक ठीमगी झ्येरी, मोरी ख्योवा सो़न्पो धेदे थुक्पे, खी़मुला धामालाक हीना मी़ ख्योवा स्यीना मो होदे ॱनामा लेन्गीन ठीमने थारालाक। 3 धा ॱहाना मो मोरी ख्योवा सो़न्पो हो़ताराङ, मी श्येम्मामुला धेना, मोला लोक्येम्मा ॱनेरी ॱनागीलाक। हीना मी़ ख्योवा स्यीना, मो होदे क्षो़ठीमने थारालाक धेनी मी़ मी श्येम्मामुला ॱनामाला डोनाः, मो लोक्येम्मा मीझ्युङालाक। 4 देरेराङ झ्येरी ङी पी़नक्याओ, खेक्याः मास्यीकागी कुली़गी थोक्ने, क्षो़ठीमगी क्षीदु स्यीवालाक। दे नी खेक्या छीवाने कुसो़न्पो श्याङस्या, मी श्येम्मा याङना मास्यीकामुला दुमा स्योक ॱनेरी, धेनी होराङक्या को़न्क्षोकगी क्षीदु ढेबु केलास्योक ॱनेरी लाक। 5 घीझ्येरी ॱनाना होराङ धीक्पे राङश्यीला छोवा क्याली घाङला, क्षो़ठीमगी झ्येरी लाङगीन दो़छाकक्याई होरी ली़ला लेगा कुलालाक। दी झ्येरी होराङक्याई छीवागी क्षीदु ढेबु केवालाक। 6 हीना धान्दा होराङ क्षो़ठीमने थार हो़तालाक घीझ्येरी ॱनाना होराङ क्षो़ठीमगी थोक्ने स्यीवालाक धेनी धा होदेगी वाङ होकला मेतालाक। धा होराङ ॱरो ॱङीङबा च्योक्रे क्षो़ठीमगी छीकला चीरी मेन्दा, हीना ॱरो साबा च्योक्रे थुक्ङीगी थोक्ने छोवा क्यारी, को़न्क्षोकला श्याप्ची श्यु थुक्कीलाक। क्षो़ठीम धाङ धीक्पा 7 धा ॱहाना हेक्या घी ॱनाये? क्षो़ठीमगो धीक्पा लाक से? फुक्की मालाक। क्षो़ठीमगो मेना, ङी धीक्पा घी हीन्गीनगो ङोस्येये मेक। घीझ्येरी ॱनाना “ख्यी़ ॱहाम्बा माझ्यी।” ॱनेरी क्षो़ठीमगी ॱमाने हो़ना, ॱहाम्बा झ्यीयेगो घी ले ॱनेरी ङी स्येयेमेक। 8 हीना धीक्पागी कागी गोने घोकाप जोरती, ङी सेमला ॱहाम्बा ॱनाछोक केरु च्युक्पालाक। क्षो़ठीम मेना धीक्पा स्यीस्या च्योक्रे लाक। 9 एम्मा थेङ च्यीक ङा क्षो़ठीमने डारी, सो़न्पो धे हो़तालाक हीना कागो ॱलेप्ती धीक्पागो सो़न्पो झ्युजुङ। 10 धेनी ङा स्यीजुङ। धेनी छे ॱनाङ घोये हीन्गीन का देगी, ङी क्षीला छीवा खेरती होजुङ। 11 घीझ्येरी ॱनाना धीक्पागी कागी गोने घुकाप जोरती, ङाला गोकोर ताङजुङ धेनी कागी थोक्ने ङाला सेजुङ। 12 होझ्येरी क्षो़ठीम नी, धाम्पा दुक धेनी कागो धाम्पा धाङ धेन्पा धाङ शाङपो दुक। 13 धा ॱहाना शाङपो हीन्गीन क्षो़ठीमगी, ङाला छीवा खेरती होवालाक से? देरे फुक्की मालाक। हीना धीक्पागो धीक्पा लाक ॱनेरी ङोस्येरु च्युक्येगी क्षीला, शाङा हीन्गीनगो भेचो़ झ्येरी धीक्पागी ङाला सेपालाक। धेनी होझ्येरी कागी थोक्ने, धीक्पागो ॱयोल्ले छाप्क्षे धीक्पा तो़न्बालाक। 14 धा क्षो़ठीम नी, थुक्ङीने झ्युङगीनगो होराङ स्येलालाक। हीना ङा नी ली़ला झ्येरी, धीक्पागी ढेन्योकला चोचा च्योक्रे हीन। 15 ङी घी झ्यीगीनगो ङाराङगी ॱहामेघोवा। घीझ्येरी ॱनाना ङी घी दो़गीनगो ङी मीझ्यीदा, हीना ङी घी दाङा झ्यीगीनगो ङी झ्यीदीक। 16 धा ङी घी मेदो़गीनगो ङी झ्यीना, क्षो़ठीम शाङा हो़गीनगो ङी खेलेन झ्यीदालाक। 17 होझ्येरी होदे झ्यीगीनगो ङाराङ मेन्दा, हीना ङी नाङदु ॱनेगीन धीक्पागी ङाला होदे झ्यीदु च्युक्वालाक। 18 धेनी ङी धीक्पे राङश्यीला शाङा घीयाः ॱमेनेलालाक ॱनेरी, ङाला स्येयेहो़क। घीझ्येरी ॱनाना शाङा घी हीन्गीनगो झ्यीयेला, ङी दो़पा हो़क हीना होदे ङी झ्यी ॱमीथुक्वालाक। 19 ङी दो़गीन शाङागो, ङी मीझ्यीदालाक हीना ङी मेदो़गीन ङेन्पागो ङी झ्यीच्यीक झ्यीदालाक। 20 धा ङी मेदो़गीनगो ङी झ्यीना, होदे झ्यीगीनगो ङा मालाक हीना ङी नाङ ॱनेगीन धीक्पागी झ्यीदालाक। 21 धा ङा शाङागो झ्यीङी दो़नाः, ङेन्पागो ङी नाङदुराङ ॱनेदुक। होझ्येरी मीछेगी डोताङगो ङी थोङी। 22 धेनी ङी सेमगी तीङने को़न्क्षोकगी क्षो़ठीमला घावा झ्यीदीहो़क। 23 हीना ङी ली़गी नाङ, ठीम श्येम्मा च्यीकगी लेगा झ्यीगीनगो ङी थोङी। धेनी दे ङी सेमगी थेगीन ठीममुला थाप्ती, ङाला ङी नाङ लेगा झ्यीगीन धीक्पे वाङगी चो़न्पा शी़। 24 आच्ची, ङा घीन्गी दुक्वा मी च्यीक ले। दे छीवागी ली़ने ङाला सी़ थारपा जेगीले? 25 होरी चोवो येशु मास्यीकागी थोक्ने थारपा जेगीन, को़न्क्षोकला काटीन्क्षे श्युवाहीन। धा ङा ङाराङगी सेमने, को़न्क्षोकगी क्षो़ठीमला श्याप्ची श्यी़लालाक हीना ङी धीक्पे राङश्यीगी, धीक्पे वाङला श्याप्ची श्यी़लालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.