रोमापा 4 - ॱलोवाआब्राहामगी धेपागी कोरला 1 धा ॱहाना ली़गी छाने, हीकी मेमे आब्राहामगी कोरला घी ॱनागुलाक से? दो़न दी, कोरला खोङला घी थोप हो़टी़? 2 आब्राहाम लेगागी थोक्ने, को़न्क्षोकगी डुङदु ढाङपो झ्युङहो़ना, खोङला ङोम्सो झ्यीये दो़न च्यीक हो़तालाक हीना को़न्क्षोकगी डुङदु मेतालाक। 3 घीझ्येरी ॱनाना सुङरापगी देरे सुङालाक, “आब्राहामगी याहोवेला धेपा झ्येवालाक धेनी खोङबागी खी़ धेपाला ढाङपो हो़गीनगो चीवालाक।” 4 धा लेगा झ्यीगीन मीला थोप्गीन ॱलाज्या नी, ज्यीम्बा च्योक्रे ॱमीचीला, होदे खी़ थोप्ताङ लाक। 5 हीना लेगा मीझ्यीगीन धाङ क्षो़ ॱमीचीगीनक्याला ढाङपो जेगीन को़न्क्षोकला, धेपा झ्यीना होदे मीगी धेपागो ढाङपो चीलालाक। 6 धेनी लेगा घीया माझ्येवाला, को़न्क्षोकगी डुङदु ढाङपो चीचा मीगी कोरला ग्यावु दावीदगी झ्यीलाप क्षे सुरी देरे सुङ हो़तालाक, 7 “धीक्पागी ङेपा सेसा मीक्या धाङ धीक्पा काप्का मीक्या, झ्यीलाप क्षे लाक। 8 चोवोगी धीक्पा ची माश्या जेजा, मीगो झ्यीलाप क्षे लाक।” 9 धा झ्यीलाप दे, पाउ चेदी ताक ग्यापक्याक्याई क्षीदु च्यीगाले याङना पाउ ॱमाचेचाक्याई क्षीदुवाः ले? आब्राहाम नी, खोरी धेपागी झ्येरी ढाङपो चीवालाक ॱनेरी होराङ ॱनालाक। 10 धा दे घाङगी झ्येरी चीवाले? खोङगी पाउ चेदी ताक ग्याप्कीनगी एन्ला याङना स्याम्ला चीवाले? दे नी पाउ चेदी ताक ग्याप्कीनगी स्याम्ला मेन्दा, ताक ग्याप्कीनगी एन्ला झ्युवालाक। 11 आब्राहामगी पाउ चेगीन ताक माग्याप घाङलाराङ, खोङगी धेपागी झ्येरी ढाङपो चीचागी ताकगी क्षीदु, खोङला पाउ चेगीन ताक दे थोप्पालाक। दी ॱमीक्यु नी, पाउ चेदी ताक माग्यापक्या हीना धेपा झ्यीगीन घीरीगी यापगो, खोङला को़येगी क्षीदु लाक। धेनी खुङक्याला धेपागी झ्येरी ढाङपो चीगीलाक। 12 धेनी याङ आब्राहाम पाउ चेचाक्यागीयाः याप लाक हीना खुङक्याई धेपागो, होरी याप आब्राहामगी पाउ ॱमाचे एन्ला, हो़गीन धेपा च्योक्रे हुङघोवालाक। को़न्क्षोकगी श्याल्क्षे धेपागी गोने थोप्पा 13 आब्राहाम नी, जीक्तेनगी ग्युज्यीन झ्युङगीलाक सुरी, को़न्क्षोकगी आब्राहाम धाङ खोङगी भुग्युक्याला धाम्चा जेजागो क्षो़ठीम ॱरुङगीनगी थोक्ने मालाक हीना धेपाने झ्युङगीन ढाङतेनने लाक। 14 क्षो़ठीम ॱरुङगीनक्या जीक्तेनगी ग्युज्यीन झ्युङना, धेपागो तोङबा धाङ धाम्चागो दो़न मेगीन झ्युङालाक। 15 घीझ्येरी ॱनाना क्षो़ठीमगी थुक्ठो़ खेरती हुङालाक। धेनी क्षो़ठीम मेसारु, क्षो़ठीम ॱमीचीगीन लेगागोवाः मेयोङालाक। 16 होझ्येरी धाम्चागो थुक्जेला तेन्ती धेनी आब्राहामगी भुग्यु घीरीला गेन्लेन झ्युङयेगी क्षीदु, धेपागी खाला रा ली़दालाक। दे धाम्चा दे नी, क्षो़ठीम ॱरुङगीनक्याई क्षीदु च्यीगा मेन्दा, आब्राहामगी धेपा च्योक्रे हो़गीनक्याई क्षीदुवाः लाक। घीझ्येरी ॱनाना खोङ नी होराङ घीरीगी याप लाक। 17 दी कोरला सुङरापला देरे ढीक हो़तालाक, “ङी ख्यो़ला मीरीक माङागी आकी को़वाहीन।” मी स्यीस्याक्याला सो़न्दु जेगीन धाङ मेगीनक्याला हो़गीन जेगीन, को़न्क्षोकला आब्राहामगी धेपा झ्येवालाक। धेनी खोङगी ॱमीक्वादु आब्राहाम होरी याप लाक। 18 रेवा झ्यीसा दो़नराङ मेती घाङलाः, आब्राहामगी रेवा झ्येरी धेपा झ्येवालाक। धेनी खोङ मीरीक माङागी याप झ्युवालाक। दी कोरला सुङरापला देरे ढीक हो़तालाक, “ख्यी़ ग्युपाक्या होदेजो़राङ झ्युङगीलाक।” 19 लो ग्या चो़ ॱलेप छासा आब्राहामगी, राङगी शु स्यीछासा च्योक्रे धाङ सारागी भी़ने राप्चे हो़गीनगो स्येरीयाः राङगी धेपा ङ्याम्दु ॱमाच्युक्पालाक। 20 धेनी को़न्क्षोकगी धाम्चाला धेपा मेता, आब्राहामगी दोक्पा माझ्येवालाक हीना ॱयोल्ले खोङगी धेपा तेन्पो झ्युरी, को़न्क्षोकला तो़पा पुवालाक। 21 धेनी को़न्क्षोकगी जेजा धाम्चागो जे थुप्कीन नी़थु, खोङबाला हो़तालाक ॱनेरी आब्राहाम तेन्देन हो़तालाक। 22 होझ्येरी खोङगी धेपागी थोक्ने, को़न्क्षोकगी डुङदु “खोङ ढाङपो चीवालाक।” 23 धेनी “खोङ ढाङपो चीवालाक” ॱनागीन छीक दे, खोङगी क्षीदु च्यीगा ढीक्पा मालाक। 24 हीना होरी क्षीदुवाः ढीक्पालाक। होरी चोवो येशुला छीवाने कुसो़न्पो श्याङा जेगीन, को़न्क्षोकला धेपा झ्यीगीन होराङक्याला को़न्क्षोकगी ढाङपो चीगीलाक। 25 होरी धीक्पाक्याई झ्येरी, येशु छीवाला तेरपालाक धेनी होराङला ढाङपो जेयेगी क्षीदु, खोङ कुसो़न्पो श्याङदु च्युक्पालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.