रोमापा 15 - ॱलोवाराङला मेन्दा श्येनला घारु च्युक 1 होराङ धेपाला तेन्पो हो़गीनक्याई, धेपाला क्योवा हो़गीनक्याई थापक्योवागोला शो़पा झ्यी घोवालाक। होराङ राङला च्यीगा ङ्यामो घारु च्युक्ये मालाक। 2 धेनी होराङ मी रे-रेगी राङगी खीम्चेला फेन्ये धाङ खी़ धेपा यारके ताङयेगी क्षीला, खोला घारु च्युक घोवालाक। 3 घीझ्येरी ॱनाना मास्यीकागीयाः राङगी थुक घेरु च्युक्वा माजेपालाक। दी कोरला सुङरापला देरे ढीक हो़तालाक, “खेराङला ॱमेटा ताङगीनगी ॱमेटा, ङी खाला फोक्दुक।” 4 धा सुङरापगी ॱनाङगीन शो़पा धाङ सेमस्युकगी थोक्ने होराङला रेवा थोबास्योक ॱनेरी, एम्मा ढीक्टा घीरी होराङला ॱलापच्या तेरयेला ढीक्पालाक। 5 धेनी शो़पा धाङ सेमस्युक ॱनाङगीन, को़न्क्षोकगी खेक्याला मास्यीका येशुमुला च्यीक झ्युरी, फेन्छुनक्या घुङदु सेम्बा च्यीक्पा जेदी, छोवा केरु च्युक्वा जेदास्योक। 6 धेनी दे नी खेक्या सेम्बा च्यीक्पा झ्युरी केक च्यीकला, को़न्क्षोक धाङ होरी चोवो येशु मास्यीकागी यापला तो़पा पुयेगी क्षीदु लाक। 7 होझ्येरी को़न्क्षोकगी शीजेगी क्षीदु मास्यीकागी खेक्याला खेलेन जेजा च्योक्रे, खेक्यागीयाः च्यीकगी च्यीकला खेलेन झ्यी। 8-9 होरी धाङबी फामाक्याला ॱनाङना धाम्चाक्या डुप्ये धाङ याहुदापा मेन्गीनक्याई खोङबागी थुक्जेगी क्षीदु को़न्क्षोकला तो़पा पुयेगी क्षीला, मास्यीकागी को़न्क्षोकगी धेन्पा तो़न्दा जेपालाक धेनी खोङबाराङ याहुदापाक्याई ॱयोक्पोला ग्युरपालाक ॱनेरी, ङा खेक्याला ॱनाहीन। दी कोरला सुङरापला देरे ढीक हो़तालाक, “होझ्येरी याहुदापा मेन्गीनक्याई खोक्दु, ङा खेराङला तो़पा पुयेहीन, धेनी खेराङगी छेनगी तो़याङ पुयेहीन।” 10 धेनी याङ देरे ढीक हो़तालाक, “ये याहुदापा मेन्गीनक्याओ, खोङगी मीक्यामुला घाटो झ्यी।” 11 धेनी याङ “खे याहुदापा मेन्गीन घीरी चोवोला तो़पा पु, मी घीरीगी खोङबागी तो़पा पु।” 12 धेनी याङ यस्यायागी सुङालाक, “येस्सेगी ग्युपाने मी च्यीक फेप्कीलाक, खोङगी याहुदापा मेन्गीनक्याई खाला वाङ जेगीलाक, धेनी खुङक्याई खोङबा खाला रेवा श्याक्कीलाक।” 13 धा धाम्पे थुक्ङीगी नी़थुने खेक्याई रेवा मेछो़ली फेयेगी क्षीदु, रेवागी को़न्क्षोकगी खेक्याला धेपागी थोक्ने, घाटो धाङ श्यीदे हो़लेगी खाङवास्योक। याहुदापा मेन्गीनक्याई श्याप्चीपा पाउलु 14 ङी पी़नक्याओ, खेक्या शाङा धाङ स्येयो़नगी खाङखा धाङ च्यीकगी च्यीकला ॱलोप्तो़न झ्यी थुप्कीन दुक ॱनेरी, ङाला यीच्चे तेन्पो हो़क। 15 हीना दो़न रीङगागी कोरला खेक्याला ढेन्सो़ ॱलाङयेगी क्षीदु, ङी ॱलोगोक क्षे झ्येरी ढीक हो़क। घीझ्येरी ॱनाना को़न्क्षोकगी ङाला ॱनाङना थुक्जे नी, 16 याहुदापा मेन्गीनक्याई क्षीदु मास्यीका येशुगी श्याप्चीपा झ्युङयेलाक। धेनी धाम्पे थुक्ङीगी याहुदापा मेन्गीनक्याला धाम्पा जेदी, खुङक्या को़न्क्षोकला थुक्ङेउ हुङगीन क्षो़पा झ्युङयेगी क्षीला, को़न्क्षोकगी ताम्शाङ स्येयेगी क्षो़पो़न च्यीकगी लेगेनगो, ङाला ॱनाङ हो़तालाक। 17 होझ्येरी को़न्क्षोकगी क्षीदु ङी श्याप्ची श्युगीनगोला, ङा मास्यीका येशुगी नाङ ङोम्सो झ्यीयेगी दो़न हो़क। 18-19 मास्यीकागी ङी थोक्ने, घी जेजा माना ताम श्येम्मा चीयाः, ङा स्येयेगी ॱलोगोक मीझ्यी। दे नी, ताक धाङ ॱहाङसागीन दो़नक्याई नी़थु धाङ को़न्क्षोकगी थुक्ङीगी नी़थुगी थोक्ने, ङी घी ॱनेना धाङ घी झ्येजागी गोने, याहुदापा मेन्गीनक्याला को़न्क्षोकगी काला ङेन्दु च्युक्पी। देरे झ्येरी ङी येरुसालेमने झ्युरी, ईल्लुरीको़नगी साज्या हो़लेला मास्यीकागी ताम्शाङ दो़न घीरीने सेटाक झ्येहो़क। 20 धेनी मी श्येम्मागी तीङ सासा ॱमाङस्यीगी खाला, खाङबा ॱमीचीक्येगी क्षीदु ङी च्योई मास्यीकागी छेन ॱमेस्येगीन, साजाक्याला च्यीगा ताम्शाङ स्येयेगी दो़पा श्याक्पी। 21 सुङरापला देरे ढीक हो़तालाक, “खोङगी कोरला नामा ॱमास्येस्याक्याई खोङला ज्यागीलाक, धेनी खोङगी कोरला नामा घोर माङ्युङगीनक्याई ॱहाघोरकीलाक।” रोमदु डोयेगी पाउलुगी क्षास्यी 22 होझ्येरीराङ ङा थेङ माङपो, खेक्याचारु ॱलेप ॱमाथुक्जुङ। 23 हीना धा दे युछोकक्याला ङी क्षीदु लेगा झ्यीजा साजा ल्हाक्मा मीदुक धेनी ङा लो माङपोने, खेक्याचारु हुङयेगी दो़पा क्षे झ्येरी, 24 ङा स्पेनला डोदी़ खेक्याला थुक्येगी रेवा श्याक्हो़क। धेनी ङा खीकीमुला धी़चो़ तीते च्यीक ङ्याम्ढेलगी घाटो लेन्सारती, खेक्याने ङी होदे डुला घो़गीन रोक्रामगो, थोप्येगी रेवा ङी श्याक्हो़क। 25 धान्दा ङा को़न्क्षोकगी मीक्याला रोक्राम झ्यीदु येरुसालेम स्योकला डी़हो़क। 26 घीझ्येरी ॱनाना येरुसालेमदु हो़गीन को़न्क्षोकगी मी उटेक्याई क्षीदु, माकेडोनीया धाङ आकाईयागी क्षो़छोकक्याई श्यान्देप पुयेला ङ्यामो घादुक। 27 खुङक्या देरे झ्यीयेला ङ्यामो घेवालाक धेनी ॱङोन्ने झ्यीना, खुङक्या होदे को़न्क्षोकगी मीक्याला भुलीङ शुक हो़तालाक। घीझ्येरी ॱनाना याहुदापा मेन्गीनक्याई को़न्क्षोकगी मीक्याने सेम्ङीगी झ्यीलापक्या थोप्हो़ना, खुङक्यागीयाः को़न्क्षोकगी मीक्याला जीक्तेनगी झ्यीलापक्याई थोक्ने श्याप्ची श्युघोलालाक। 28 होझ्येरी दे लेगा दे शीम्दी, खुङक्याई क्षीदु धी़दा श्यान्देप दे लाक्पाला ची ग्याप सारती, ङा खेक्याचारु थुक्ती स्पेनला डोयेहीन। 29 धेनी ङा खेक्याचारु हुङाराङ, मास्यीकागी झ्यीलापगी फी़न्सुम छोक्पा झ्युरी हुङगीलाक ॱनेरी, ङाला स्येयेहो़क। 30 पी़नक्याओ, होरी चोवो येशु मास्यीका धाङ धाम्पे थुक्ङीगी झाम्पागी थोक्ने, ङीमुला ङी काल्लेला को़न्क्षोकला ॱमो़लाम श्यी़ ॱनेरी, ङा खेक्याला श्योवा पुलाहीन। 31 युदेयारु हो़गीन धेपा मीझ्यीगीनक्याने, ङाला क्योप्ये धाङ येरुसालेमदु ङी खेरती डुगीन रोक्रामगो, को़न्क्षोकगी मीक्याई खे लेन्दास्योक ॱनेरी ॱमो़लाम ग्योप। 32 धेनी को़न्क्षोकगी थुकोङगी थोक्ने, ङा खेक्याचारु ङ्यामो घेरी हुङये झ्युङगीलाक धेनी होराङ च्यीकगी च्यीक क्षीदु सेमस्युक झ्युङगीलाक। 33 श्यीदेगी को़न्क्षोक खेक्या घीरीमुला श्युक्वास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.