रोमापा 12 - ॱलोवाक्षो़पा सो़न्पो 1 होझ्येरी पी़नक्याओ, को़न्क्षोकगी खेक्याला ॱङीङजे शीया जेदी, खोङगी डुङदु धाम्पा धाङ थुक्ङेउ झ्युङयेला, राङगी ली़गो क्षो़पा सो़न्पो च्योक्रे फी़ ॱनेरी, ङा खेक्याला श्योवा पुलाहीन। देराङ खेक्याई खोङबाला पु घो़गीन क्षाक्क्षो़पा धेन्पागो लाक। 2 धेनी दे जीक्तेनगी लुक्सो़ला माडे, हीना को़न्क्षोकला ख्यो़री सेम्बा ग्युरा जेदी, ख्यो़ला मी साबा च्यीक जेदु च्युक। धेनी को़न्क्षोकगी थुकोङ नी, शाङपो धाङ थुक्ङेउ धाङ फी़न्सुम छोक्पा हीन्गीनगो, खेक्याई स्येगीलाक। 3 ङाला ॱनाङना थुक्जेगी लेगेनगी गोने, ङा खेक्या रे-रेला ॱनाहीन, राङ घारे हो़गीनने ल्हाक थोवा राङला ॱमासाम। हीना को़न्क्षोकगी खेक्याला ॱनाङना धेपागी छेला तेन्ती, साम्लो ढाङपो तोङ। 4 घीझ्येरी ॱनाना होरी ली़ च्यीकला येन्लाक माङा हुङालाक हीना येन्लाक घीरीगी लेगा च्यीकराङ मेगीन च्योक्रे, 5 होराङ माङा हो़गीनक्याः मास्यीका नाङ, होराङ ली़ च्यीक लाक धेनी होराङ घीरी होदेगी येन्लाकक्या लाक। 6 होराङ रे-रेला ॱनाङना थुक्जेगी लेगेनला तेन्दी, होराङक्याला ॱनाङज्यीन ढामेढाक्या हो़तालाक। धा ख्यी़ ॱनाङज्यीनगो ॱङोई स्येये हीन्ना ख्यो़री धेपाला तेन्दी ॱङोई स्यो़क, 7 धेनी श्याप्ची श्युये हीन्ना श्याप्ची श्यी़ धेनी ॱलोप्चुङ तेरये हीन्ना ॱलोप, 8 धेनी सेमस्युक तेरये हीन्ना सेमस्युक तेर धेनी ज्यीम्बा ताङये हीन्ना, ॱमेफाङा ज्यीम्बा तोङ धेनी गोदो़न झ्यीये हीन्ना, ॱङीङ थाक्पाने गोदो़न झ्यी धेनी ॱङीङजे तो़न्ये हीन्ना ङ्यामो घेरी तो़न। झाम्पागी कोरला 9 झाम्पागो ढाङपो हुङघो़। ङेन्पागोला दाङा झ्यी धेनी शाङागोला ॱनेती धो़क। 10 पी़नगी चीदोङ च्योक्रे, च्यीकगी च्यीकला झाम्पा झ्यी। राङने ल्हाक श्येम्माला घुस्याप झ्यी। 11 लेमेलाम्गीन झ्युरी माधे हीना ख्यो़री सेम तीङने, चोवोला श्याप्ची श्यी़। 12 धेनी रेवाला तेन्दी घाटो झ्यी धेनी दुक्पु ङ्याङी घाङला, शो़पा झ्यी धेनी च्योई ॱमो़लाम श्यी़। 13 मास्यीकावा पी़नक्या नाङ मेगीनगोला, रोक्राम झ्यी। धेनी डो़न्बोक्याला फेप्सु श्यी़। 14 खेक्याला दुक्पु ताङगीनक्याला झ्यीलाप तेर। झ्यीलाप तेर हीना ॱमेमो माग्याप। 15 घाटो झ्यीगीनक्यामुला घाटो झ्यी धेनी ङुता ग्याप्कीनक्यामुला ङुता ग्योप। 16 च्यीकगी च्यीकमुला थी़न्दी धो़क। राङतो़ माझ्यी हीना ॱङ्यामच्युङक्यामुला ढेवा झ्यी। धेनी हो़लेगो ख्यो़ला स्येये हो़गीन च्योक्रे माझ्यी। 17 मी सुलाः ङेन्पागी छापला ङेन्पा माझ्यी। मी घीरीगी ॱमीक्वादु याराप चीगीनगोला दो़नाङ झ्यी। 18 झ्युङ थुक्ये हो़ना, घी थुप-थुप राङला रा ली़गीन थुक्पे, घीरीमुला श्यीदेला धो़क। 19 धेनी चेवेक्याओ, नामा डास्या मालेन हीना को़न्क्षोकगी थुक्ठो़ला भोरस्योक। घीझ्येरी ॱनाना सुङरापला देरे ढीक हो़तालाक, “डास्या लेन्ये लेगेन ङी लाक। ङीराङ लेन्दु, सुरी चोवो सुङालाक।” 20 ॱयोल्ले सुङरापला देरे ढीक हो़तालाक, “ख्यी़ डागो तोक्रेला हो़ना खोला शामा तेर, खो कोम्दी धेहो़ना खोला क्षु तेर, देरे झ्यीना ख्यी़ खी़ गोवा खाला सोला ॱमाउ ॱलुक्वालाक।” 21 ङेन्पागी फाम्दु ॱमाच्युक हीना ङेन्पाला शाङपोगी थोबा झ्यी। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.