ॱङो़न्पा 3 - ॱलोवासारतीगी क्षो़छोकला का ॱनाङवा 1 “सारतीगी क्षो़छोकगी भाङछेनला देरे ढीक, “को़न्क्षोकगी थुक्ङी धी़न धाङ कारमा धी़न हो़गीनगी, दे काक्या सुङी। ख्यी़ लेगाक्या ङाला स्येयेहो़क। धेनी मीङगी छाने खेक्या सो़न्पो हो़ना, खेक्या स्यी हो़तालाक। 2 ॱङी सो़ धेनी जोक्ये हीन्गीन धाङ ल्हाक्मा ल्हाक्लागोला तेन्पो शो़ घीझ्येरी ॱनाना ङी खेक्याई लेगाक्या, को़न्क्षोकगी चेङारदु माडुप्कीनगो ॱङेजुङ। 3 होझ्येरी ख्यो़ला घी थोप्था धाङ ख्यी़ घी घोरकागोला तेन्पोमा ॱरुङ धेनी राङगी धीक्पा पारी सेम ग्युरवा तोङ। धेनी ख्यो़ ॱङीने ॱमेसो़ना, ङा ख्यो़चारु कुमा च्योक्रे हुङयेहीन धेनी ङा हुङगीनगी धी़चो़गो ख्यी़ ॱमेस्येगीलाक। 4 “हीना सारतीरु राङगी घोलाक ॱमेचाङा माशो़सा, मी तीते रे दुक। खुङक्या ङीमुला घो़ काउ घो़न्दी ग्युक्कीलाक घीझ्येरी ॱनाना खुङक्याला देरे झ्यीये खाये दुक। 5 धेनी सु ग्याली, होदेगोला ङा खुङक्याला च्योक्रे घो़ काउ को़न्येहीन। धेनी खी़ मीङगो ङा छेसोकगी धेबने सुप्येमेन। धेनी ङा खी़ मीङ, ङी याप धाङ खोङबागी भाङछेनक्याई डुङदु खेलेन झ्यीयेहीन। 6 “आमच्योक हो़गीनक्याई धाम्पे थुक्ङीगी क्षो़छोकला, घी सुङगीनगो ङेन्दास्योक।” फीलादेल्फीयागी क्षो़छोकला का ॱनाङवा 7 “फीलादेल्फीयागी क्षो़छोकगी भाङछेनला देरे ढीक, “धाम्पा धाङ धेन्पा धेनी दावीदगी दीमीक हो़गीन, खोङबागी दे काक्या सुङी। खोङबागी पेगीन घोगो सी़या ग्याप ॱमीथुक्कीलाक धेनी खोङबागी ग्याप्कीन घोगो, सी़या पे ॱमीथुक्कीलाक। 8 ख्यी़ लेगाक्या ङाला स्येयेहो़क। तो़दाङ, ख्यी़ दोङदु सी़याः ग्याप ॱमीथुक्कीन, घो ङी पेरी श्याक हो़क। धेनी ख्यो़ला तोपस्युक च्यीमे हो़गीनगो ङाला स्येयेहो़क। घीहीन्ना ख्यी़ ङी कागो ॱरुङदुक धेनी ङी मीङ ॱमापादुक। 9 “तो़दाङ धी़ सातानगी छोक्खाङगी हीन्गीन धेनी राङला याहुदापा मेन्दा हीन ॱनेरी ॱनागीन, शोक्पोक्याला ङा खेक्याचारु हुङदु च्युक्ती, खीकी काङबी दोङदु क्षाक छारु च्युक्येहीन। धेनी ङी खेक्याला चेवा झ्यीगीनगो खुङक्याई ॱहाघोरकीलाक। 10 खेक्याई शो़पा झ्यीघो़गीन ङी कागो ॱरुङरोवा झ्येरी, ङा ख्यो़ला साश्यीदु हो़गीन मी घीरीला छो़ता झ्यीयेला, जाम्बुलीङदु हुङये हीन्गीन होदे छो़तागी धी़चो़ने क्योप्येहीन। 11 ङा ग्योक्जे हुङाहीन। धेनी ख्यी़ चो़पेनगो सी़या ठोक ॱमीथुक्येगी क्षीदु, ख्यी़मुला घी हो़गीनगो तेन्पोमा झ्येरी ॱरुङ। 12 “धेनी सु ग्याली, होदेगोला ङा होदेगी क्षीला, ङी को़न्क्षोकगी क्षो़खाङ नाङदु कावा च्यीक चुक्येहीन। धेनी खो होदेने नामा थो़न घोगुमालाक। ङा खी़ खाला, ङी को़न्क्षोकगी छेन ढीक्येहीन। धेनी नाम्खे श्यीङखामने माला फेप्कीन, ङी को़न्क्षोकगी ग्याजागी मीङ, येरुसालेम साबा ढीक्येहीन। धेनी ङारी मीङ साबागोवाः खी़ खाला ढीक्येहीन। 13 “आमच्योक हो़गीनक्याई धाम्पे थुक्ङीगी क्षो़छोकक्याला, घी सुङगीनगो ङेन्दास्योक। लाउदीकेयागी क्षो़छोकला का ॱनाङवा 14 “लाउदीकेयागी क्षो़छोकगी भाङछेनला देरे ढीक, “आमेन धाङ ॱलोते छोक्पा धाङ पाङपो धेन्पा धाङ को़न्क्षोकगी को़पागी पो़न्पोगी, दे काक्या सुङी। 15 ख्यी़ लेगाक्या ङाला स्येयेहो़क। ख्यो़ ढाङा मीदुक, छा मीदुक। ख्यो़ ढाङा याङना छा हो़ना ढीक्येहो़क। 16 घीझ्येरी ॱनाना ख्यो़ ढाङमोवाः मेगीन छादीयाः मेगीन ॱमामोई झ्येरी, ङा ख्यो़ला ङी खाने तोरयेहीन। 17 ‘ङा क्षुक्पु हो़क धेनी ङाला ग्युनोर हो़क धेनी ङाला घीया घोये मीदुक।’ ॱनेरी ख्यो़ ॱनालाक हीना ख्यो़ थापक्योवा धाङ दुक फोक्पा धाङ उटे धाङ श्यारा धाङ ॱमाराङा हो़गीनगो, ख्यो़ला स्येये मेतालाक। 18 होझ्येरी ख्यो़ क्षुक्पु झ्युङयेगी क्षीदु, ङाने मेगी चाङमा शो़सा सेर धाङ राङगी ॱमाराङा झ्युजागी ङोजा काप्येगी क्षीदु, घो़ काउ धाङ ख्यो़ थोङ थुक्येगी क्षीदु ख्यी़ ॱमीकला ॱमेन, ङाने ङ्यो़ ॱनेरी, ङा ख्यो़ला ॱलापच्या तेराहीन। 19 ङी झाम्पा झ्यीगीनक्याला, ङा आङजी ताङाहीन धेनी ची़न्दाहीन। होझ्येरी ढाङपो झ्युरी राङगी धीक्पा पारी, सेम ग्युरवा तोङ। 20 तो़दाङ, ङा घो डामदु लारी घो दुङाहीन। धेनी ङी केक घोरती, घो पेना ङा नाङदु जुयेहीन धेनी होदे मीमुला शामा शायेहीन धेनी होदे ङीमुला शागीलाक। 21 धेनी सु ग्याली, होदेगोला ङाराङाः ग्यारी ङी यापगी श्युक्ठीला धेगीन च्योक्रे, होदेला ङी श्युक्ठीरु ङीमुला धेयेगी आङजा तेरयेहीन। 22 “आमच्योक हो़गीनक्याई धाम्पे थुक्ङीगी क्षो़छोकक्याला, घी सुङगीनगो ङेन्दास्योक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.