ॱङो़न्पा 22 - ॱलोवाछेसोकगी क्षुगी चाङबु 1 धेनी नाम्खे भाङछेनगी ङाला दाङस्येल च्योक्रे, साला हो़गीन छेसोकगी क्षुगी चाङबुगो तो़न्दा जेजुङ। धेनी दे नी, को़न्क्षोक धाङ लुक्टुगी श्युक्ठीने झ्युरी, 2 होदे ग्याजागी ॱराङगाक घुङने ग्युक्ई हो़तालाक। होदे चाङबुगी ॱये-ॱयो़न ॱङीगाराला, दावा रे-रेला ढेबु ॱना रे-रे झ्येरी, लोला ढेबु थेङमा च्युङङी तेरकीन छेसोकगी दोङबो हो़तालाक। धेनी होदे दोङबोगी लोमाक्या, मीरीकक्याला चो़गा झ्यीयेगी क्षीदु लाक। 3 धा देने ॱहाला होदुरु नामा ॱमेमो मेशुक्कीलाक। को़न्क्षोक धाङ लुक्टुगी श्युक्ठीगो, होदे ग्याजारु झ्युङगीलाक धेनी खोङबागी श्याप्चीक्याई खोङबाला क्षाक्क्षो़पा पुगीलाक। 4 खुङक्याई खोङबागी श्याल ज्यागीलाक धेनी खुङक्याई टाल्लेला खोङबागी छेन हुङगीलाक। 5 होदुरु याङ नामा छेन झ्युङगीमालाक। धेनी ॱलोक धाङ ङीमागी, हो़ खुङक्याला घोगीमालाक घीझ्येरी ॱनाना चोवो को़न्क्षोक खुङक्याई हो़ झ्युङगीलाक। धेनी खुङक्याई ग्युने ग्युन्दु वाङग्युर झ्यीगीलाक। चोवो येशु ग्योक्वा फेप्येगी कोर 6 धेनी नाम्खे भाङछेनगी ङाला सुजुङ, “दे लाबक्या ॱलो काथुक्कीन धाङ धेन्पा दुक। धा ग्योक्जे झ्युङये हीन्गीन लाबक्या, राङगी श्याप्चीक्याला तो़न्येगी क्षीदु, ॱङो़नस्येखेनक्याई सेम्ङीगी चोवो को़न्क्षोकगी राङगी भाङछेनला झाङा जेदुक।” 7 येशुगी सुङालाक, “तो़दाङ, ङा ग्योक्वा हुङाहीन। दे धेपला ढीक्टा ॱङो़नस्येक्याई का ॱरुङगीनक्या झ्यीलाप क्षे लाक।” 8 दे लाब घीरी घोरकीन धाङ थोङगीन, ङा योहान्ना हीन। धेनी ङी दे लाबक्या घोरती थोसारती, ङाला दे घीरी तो़न्गीन नाम्खे भाङछेनगी श्यापला, ङा क्षाक छायेला घुक झ्येवी। 9 हीना खोङबागी ङाला दे सुजुङ, “देरे माझ्यी। ङा नी, ख्यो़ धाङ ख्यी़ पी़न ॱङो़नस्येखेनक्या धाङ दे धेपगी काक्या ॱरुङगीनक्यामुला, श्याप्चीपा च्यीक्पा लाक। को़न्क्षोकला च्यीगा क्षाक्क्षो़पा पु।” 10 याङ खोङबागी ङाला देरे सुजुङ, “दे धेपगी ॱङो़नस्येगी काला थेचे माग्याप घीझ्येरी ॱनाना धी़गो ङ्येदुक। 11 लेङेन झ्यीगीनक्याला लेङेन झ्येरी धेदु च्युक। ॱमेचाङा झ्यीगीनक्याला ॱमेचाङा झ्येरी धेदु च्युक। ढाङतेन झ्यीगीनक्याला ढाङतेन झ्येरी धेदु च्युक। धेनी धाम्पाक्याला धाम्पा झ्युरी धेदु च्युक।” 12 येशुगी सुङालाक, “तो़दाङ, ङा ग्योक्वा हुङीहो़क। मी घीरीला राङ-राङगी झ्यीगीनला तेरी, होदेगी ढेबु तेरयेहीन। 13 ङा नी आल्फा धाङ ओमेगा धेनी एम्मा धाङ स्याम्मा धेनी थोक्मा धाङ थागो हीन।” 14 छेसोकगी दोङबोगी आङजा थोप्ये धाङ ग्याजागी गेघोक्या नाङने जु थुक्येगी क्षीदु, राङगी घो़ ठुगीनक्या झ्यीलाप क्षे लाक। 15 ग्याजागी फीला कीक्या धाङ ङेन ॱङाक झ्यीगीनक्या धाङ लोक्येम्पाक्या धाङ ॱरोक चेगीनक्या धाङ ल्हाकुन्डाक्या छो़गीनक्या धाङ शोक स्येयेला थेगीनक्या धाङ होदे च्योक्रे झ्यीगीनक्या हो़तालाक। 16 “क्षो़छोकक्याला दे पाङपोक्या झ्यीयेला, ङा येशुगी राङगी भाङछेन ख्यो़चारु झाहो़क। ङा नी दावीदगी चावा धाङ ग्युपा हीन, धेनी थोराङगी कारछेनगो ङा हीन।” 17 धाम्पे थुक्ङी धाङ भाक्मागी सुङालाक, “फेप स्योक।” धेनी घोरकीनक्याई देरे ॱनाघो़, “फेप स्योक।” कोम्गीनगो हुङास्योक धेनी दो़पा झ्यीगीनक्याई छेसोकगी क्षु स्यी़दी़ला थुङास्योक। 18 दे धेपगी ॱङो़नस्येगी का ङेन्गीन घीरीला, ङा ङेन्ता ताङाहीन। मी सु च्यीकगीया दे खाला ॱनो़न्गा ग्याप्ना, को़न्क्षोकगी होदे मी खाला, दे धेप नाङला ढीक्टा दुक्पुक्याई छेपा का जेगीलाक। 19 धेनी दे ॱङो़नस्येगी धेपगी काने मी सु च्यीकगीयाः छीक च्यीया ठीना, दे धेप नाङला ढीक्टा छेसोकगी दोङबो धाङ धाम्पे ग्याजाने, होदे मीला थोप्ये हीन्गीन कादागो, को़न्क्षोकगी होदेने ठोक्वा जेगीलाक। 20 दे लाबक्याई पाङपो जेगीनगी सुङालाक, “ॱङोन्नेराङ ङा ग्योक्वा हुङीहो़क।” आमेन। चोवो येशु फेप्रोनाङ। 21 चोवो येशुगी थुक्जे, मी घीरीमुला ॱनेवास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.