ॱङो़न्पा 21 - ॱलोवानाम्खे श्यीङखाम धाङ साश्यी साबा 1 धेनी ङी नाम्खे श्यीङखाम साबा धाङ साश्यी साबा थोजुङ घीझ्येरी ॱनाना एम्मागी ॱनाम धाङ साश्यी येरी सोवालाक। धेनी ग्याछोगोवाः येरी मेतालाक। 2 धेनी ङी धाम्पे ग्याजा याङना येरुसालेम साबागो, राङगी माक्पागी क्षीदु छो़ शाप्ती धेता भाक्मा च्योक्रे, को़न्क्षोकने नाम्खे श्यीङखामने माला भाप्कीनगो थोजुङ। 3 धेनी श्युक्ठीने सुङकेक क्षे च्यीकगी, देरे सुङगीनगो ङी घोरजुङ, “तो़दाङ, को़न्क्षोकगी ॱनेसागो धा मीक्याई खोक्दु झ्युदुक धेनी खोङबा खुङक्याई खोक्दु श्युक्वा जेगीलाक। धेनी खुङक्या को़न्क्षोकगी मी झ्युङगीलाक धेनी को़न्क्षोक खोङबाराङ खुङक्यामुला हुङगीलाक धेनी खुङक्याई को़न्क्षोक झ्युङगीलाक। 4 खोङबागी खुङक्याई ॱमीकने, छीमाक घीरी फीला जेगीलाक। धेनी होदुरु छीवा याङना दुङा याङना ङुता ग्याप्ये याङना शुक घीया झ्युङगीमालाक घीझ्येरी ॱनाना एम्मागी दो़नक्या जोक्सारालाक।” 5 श्युक्ठीदु श्युवा जेगीनगी ङाला सुजुङ, “तो़दाङ, ङी दो़न घीरी साबा शी़हो़क।” धेनी खोङबागी दे सुजुङ, “दे लाबक्या ढीक घीझ्येरी ॱनाना दे लाबक्या ॱलो काथुक्वा धाङ धेन्पा दुक।” 6 धेनी खोङबागी सुजुङ, “धा डुप्सो। ङा नी, आल्फा धाङ ओमेगा धेनी थोक्मा धाङ थामागो हीन। धेनी खा कोम्गीनक्याला, ङा छेसोकगी क्षुमीकने स्यी़दी़ला तेरयेहीन। 7 ग्यागीनगोला, दे दो़न घीरीगी ग्युज्यीन थोप्कीलाक धेनी ङा खी़ को़न्क्षोक झ्युङयेहीन धेनी खो ङी भीजा झ्युङगीलाक। 8 हीना ॱङीङ च्युङाक्या धाङ धेपा मेगीनक्या धाङ आम्लोवाक्या धाङ ॱरोक चेगीनक्या धाङ लोक्येम्पाक्या धाङ ङेन ॱङाक ग्याप्कीनक्या धाङ ल्हाकुन्डा छो़गीनक्या धाङ शोक स्येगीनक्या घीरीगी कादागो, मे धाङ मुशे भारकीन छो लाक। दे नी, छीवा ॱङीवागो लाक।” येरुसालेम साबा 9 धा थागी दुक्पु धी़नगी खाङखा, फोरा धी़न शीम्गीन नाम्खे भाङछेन धी़नक्याने च्यीक ङीचारु फेप्ती, ङाला देरे सुजुङ, “स्योक, ङी ख्यो़ला लुक्टुगी ॱनामा हीन्गीन भाक्मागो तो़न्दु।” 10 धेनी धाम्पे थुक्ङीगी थोक्ने, खोङबागी ङाला री क्षे थोवा च्यीकगी गाङला ठीया जेजुङ, धेनी खोङबागी ङाला धाम्पे ग्याजा येरुसालेम, को़न्क्षोकने नाम्खे श्यीङखामने भाप्कीनगो तो़न जेजुङ। 11 होदेला को़न्क्षोकगी शीजेगी हो़ स्यारी धेनी दी हो़ नी, धो रीन्पोक्षे याङटी ॱङोम्पो च्योक्रे धाङ दाङस्येल च्योक्रे साला हो़तालाक। 12 होदेला च्यारी थोवो क्षे धाङ च्यारीगोला, गेघो च्युङङी धाङ गेघोक्याला नाम्खे भाङछेन च्युङङी हो़तालाक। धेनी गेघोक्याला ईस्राएलगी ग्युपा च्युङङीगी मीङक्या, ढीक हो़तालाक। 13 स्यार स्योकला घो सुम धेनी झाङ स्योकला घो सुम धाङ ल्हो स्योकला घो सुम धाङ नुप स्योकला घो सुम हो़तालाक। 14 होदे ग्याजागी च्यारीगोला ॱमाङस्यी च्युङङी हो़तालाक धेनी होदे ॱमाङस्यी खाला लुक्टुगी, कुछाप च्युङङीक्याई मीङ ढीक हो़तालाक। 15 धेनी ङाला कामो़न सुङगीन, नाम्खे भाङछेनगी क्षाकला ग्याजा धाङ होदे घोक्या धाङ च्यारीगो छे दाप्येला, सेरगी थीकस्यीङ च्यीक हो़तालाक। 16 होदे ग्याजागो डुपश्यी हो़तालाक धेनी होदेगी रीङछे धाङ ग्याङछे च्यीक्पा हो़तालाक। धेनी खोङबागी थीकस्यीङगी छे दावाराङ, होदे ग्याजागो कीलो, ङीतोङ श्यीपग्या हो़तालाक। धेनी होदेगी रीङछे धाङ ग्याङछे धाङ थोछेगो च्यीक्पा हो़तालाक। 17 धेनी नाम्खे भाङछेनगी होदे च्यारीगो छे ग्याप्पालाक। धेनी होदे मीगी छेला ताना मीटार ढुकच्यु रेढुक चो़ रीङा हो़तालाक। 18 होदे च्यारीगो ॱयाङटी ॱङोम्पोगी शो़ हो़तालाक धेनी ग्याजागो दाङस्येल च्योक्रे साला हो़गीन, सेरगी च्योमागी शो़ हो़तालाक। 19 होदे च्यारीगी ॱमाङस्यीक्या, धो रीन्पोक्षे ॱनाछोकगी ढीकस्योम हो़तालाक। ॱमाङस्यी धाङपोगो ॱयाङटी ॱङोम्पो धाङ ॱङीवागो वाङ ॱङो़न धाङ सुम्बागो, बेलनाप धाङ श्यीवागो मारके 20 धाङ ॱङावागो शी धाङ ढुक्पागो शीमार धाङ धी़न्बागो बीस्यी सेरपो धाङ ग्येपागो नाल धाङ घुपागो बीस्यी ॱमारपो धाङ च्युवागो फेचुगी स्येलधो धाङ च्युक-च्यीपा नी, मानुहो मुक्पो धाङ च्यु ॱङीपागो कारगोङगी ढीकस्योम हो़तालाक। 21 होदे गेघो च्युङङीगो मुतीक च्युङङीगी, शो़ हो़तालाक। गेघो रे-रे मुतीक रे-रेगी शो़ हो़तालाक। धेनी ग्याजागी ॱराङगाकगो दाङस्येल च्योक्रे सावो हो़गीन, सेर च्योमागी शो़ हो़तालाक। 22 धेनी ङी होदे ग्याजा नाङदु क्षो़खाङ ॱमाथोजुङ घीझ्येरी ॱनाना चोवो कुवाङ को़न्क्षोक धाङ लुक्टु, खोङबाक्याराङ होदेगी क्षो़खाङ लाक। 23 होदे ग्याजाला ङीमा याङना दावागी हो़ मेघोवालाक घीझ्येरी ॱनाना को़न्क्षोकगी शीजेगी, होदेला हो़ ॱनाङालाक धेनी होदेगी ॱलोकगो लुक्टु लाक। 24 धेनी मीरीक घीरी होदेगी हो़ला तेन्ती, छोवा क्यालालाक धेनी साश्यीगी ग्यावुक्याई राङगी शीजे दी नाङदु खेरती हुङगीलाक। 25 ग्याजागी गेघो नी, ॱरो रुक्ती नामा मेग्याप्कीलाक घीझ्येरी ॱनाना होदुरु छेन मेयोङालाक। 26 धेनी मीरीकक्याई राङ-राङगी शीजे धाङ कुरती, दी नाङ खेरती हुङगीलाक। 27 लुक्टुगी छेसोकगी धेप नाङला मीङ ढीक्टाक्या माना, श्येम्मा ॱमेचाङा धाङ आम्लोवा लेगा झ्यीगीन धाङ शोक स्येगीन सुवा, होदे ग्याजा नाङदु मीजुगीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.