ॱङो़न्पा 20 - ॱलोवालो च्यीक तोङगी कोर 1 होदे स्याम्ने, ङी नाम्खे भाङछेन च्यीक थी मेगीन, दोङ-दोङगी दीमीक धाङ क्षाकला च्याक्थाक क्षे च्यीक ॱनुम्दी, नाम्खे श्यीङखामने फेप्कीनगो थोजुङ। 2 खोङबागी होदे डुक याङना एम्मा-एम्मागी डु याङना डे याङना धी़क सातानगोला शीम्बालाक धेनी लो च्यीक तोङगी क्षीदु, कीक्ती श्याक्पालाक। 3 लो च्यीक तोङगो माजोक्कीन थुक्पे, होदेगी मीरीकक्याला ॱमीली़वास्योक ॱनेरी, नाम्खे भाङछेनगी होदेला थी मेगीन, दोङ-दोङ नाङदु ॱयुक्पालाक धेनी दोङ-दोङगोला घोजा ग्याप्ती थेचे ग्याप्पालाक। होदे स्याम्ने धी़ तीते च्यीकगी क्षीदु, होदेला टो घोगुलाक। 4 धेनी ङी श्युक्ठीक्या धाङ ठीम्चो़ जेयेला आङजा थोप्था, होदे श्युक्ठी खाला श्युक्कीनक्या थोजुङ। धेनी येशुला धेन्पाङ झ्येजा धाङ को़न्क्षोकगी कागी दो़न्दु, गोवा चेचाक्याई सेम्ङीक्या ङी थोजुङ। खुङक्याई होदे सेम्चेन धाङ होदेगी कुला क्षाक्क्षो़पा ॱमापुवालाक धेनी होदेगी ताक टाल्ले याङना लाक्पाला माग्याप्पालाक। खुङक्या सो़न्पो झ्युवालाक धेनी मास्यीकामुला, खुङक्याई लो च्यीकतोङ थुक्पे वाङग्युर झ्येवालाक। 5 धेनी श्येम्मा स्यीस्याक्या लो च्यीक तोङगो माजोक्कीन थुक्पे, सो़न्पो माझ्युवालाक। दे नी, ॱलार सो़न्पो झ्युङगीन धाङपोगो लाक। 6 ॱलार सो़न्पो धाङपो झ्युङगीनक्या झ्यीलाप क्षे धाङ धाम्पा लाक। खुङक्याला छीवा ॱङीवागी वाङ झ्यी ॱमीथुक्कीलाक हीना खुङक्या को़न्क्षोक धाङ मास्यीकागी क्षो़पो़न झ्युरी, मास्यीकामुला लो च्यीकतोङ थुक्पे वाङग्युर झ्यीगीलाक। धी़ सातान फाम्गीनगी कोर 7 धा लो च्यीक तोङगो जोक्वाराङ, धी़ सातानगो होदेगी चो़न्खाङने टोगीलाक। 8 धेनी साश्यीगी छोक श्यीगाराला हो़गीन, मीरीकक्या याङना गोग धाङ मागोगक्याला ॱली़ये धाङ ॱमाकगी क्षीदु रुक्येला, होदे सातान थो़न्दी हुङगीलाक। धेनी खुङक्याई ढाङगा ग्याछोगी भेमा च्योक्रे हुङगीलाक। 9 धेनी खुङक्या साश्यी हो़लेला थो़न्दी सोरी, धाम्पे मीक्याई घार धाङ को़न्क्षोकगी चेवे ग्याजागोला थाकोरपालाक हीना नाम्खे श्यीङखामने मे भाप्ती, खुङक्याला मेताला तावालाक। 10 धेनी खुङक्याला ॱली़गीन होदे डेगो सेम्चेन धाङ ॱङो़नस्येखेन शोक्पोगोवाः हो़सा, मे धाङ मुशेगी छो नाङदु ॱयुक्पालाक। होदुरु खुङक्या ग्युने ग्युन्दु ङीन-छेन दुक्पु ङ्याङगीलाक। थामे ठीम्चो़गी कोर 11 धेनी ङी श्युक्ठी काउ क्षे च्यीक धाङ होदे खाला श्युक्कीनला थोजुङ। खोङबागी डुङने साश्यी धाङ ॱनाम डो़री लाजुङ धेनी होदे ॱङीउगी क्षीदु ॱनेसा माजोप्पालाक। 12 धेनी ङी क्षे धाङ च्युङा स्यीम्पो घीरीला, श्युक्ठीगी दोङदु लारी धेगीनगो थोजुङ धेनी धेपक्या खा पेवालाक। धेनी छेसोकगी धेप हीन्गीन धेप श्येम्मा च्यीयाः खा पेवालाक। धेनी होदे धेबक्या नाङला ढीक हो़गीन, खुङक्याई झ्येजाला तेन्ती खुङक्याला ठीम्चो़ झ्युवालाक। 13 ग्याछोगी राङगी नाङला हो़गीन, स्यीम्पोक्या धाङ छीवा धाङ स्यीम्पोक्या धेसागी, राङगी नाङला हो़गीन स्यीम्पोक्या तेरपालाक धेनी होदे रे-रेला राङ-राङगी झ्येजा लेगाला तेन्ती ठीम्चो़ झ्युवालाक। 14 धेनी छीवा धाङ स्यीम्पोक्या धेसाक्या, मेगी छो नाङदु ॱयुक्पालाक। होदे मेगी छोगो छीवा ॱङीवा लाक। 15 धेनी छेसोकगी धेप नाङदु मीङ माढीक्टाक्या घीरी, होदे मेगी छो नाङदु ॱयुक्पालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.