ॱङो़न्पा 2 - ॱलोवाएफीसुगी क्षो़छोकला का ॱनाङवा 1 “एफीसुगी क्षो़छोकगी भाङछेनला देरे ढीक, “राङगी क्षाक ॱयेला कारमा धी़न शीम्गीन, धाङ सेरगी क्युङ धी़नगी घुङला श्याप्छाक जेगीन, खोङबागी दे काक्या सुङी। 2 ख्यी़ लेगाक्या धाङ काल्लेक्या धाङ शो़पाक्या, ङाला स्येयेहो़क। मी ङेन्पाक्याला, ख्यी़ शो़पा घोम ॱमीथुक्कीन धाङ कुछाप मेन्दाला हीन ॱनागीनक्याला, ख्यी़ छो़ता झ्येरी शोक्पो हीन्गीनगो, ख्यी़ ॱङेपालाक ॱनेरी ङाला स्येयेहो़क। 3 धेनी ङी मीङगी दो़न्दु खेक्याई शो़पा घोम्गीन धाङ दुक्पु ङ्याङगीनगो, ङाला स्येयेहो़क। धेनी खेक्या धोराङा थाङ ॱमाछेदुक। 4 “हीना ख्यी़ गोमाला हो़गीन चेवा पाङगीनगी क्यो़नगो, ङा ख्यो़ला तो़न्येहो़क। 5 होझ्येरी ख्यो़ घाने ॱहाला माला ल्हीम्गीनगो, ख्यो़ घामोमा साम्लो तोङ धेनी राङगी धीक्पा पारी सेम ग्युरवा तोङ। धेनी एम्मा ख्यी़ घी झ्यीगीनगोराङ झ्यी। ख्यी़ देरे झ्येरी राङगी सेम ग्युरवा ॱमेताङना, ङा ख्यो़चारु हुङाहीन धेनी ख्यी़ क्युङगोला होदेगी घोक्जाने तो़न्येहीन। 6 हीना खीकी स्योकला शाङागो घी दुक ॱनाना, ङा च्योक्रे खेक्यागीयाः नीकोलापाक्याई लेगाला दाङा झ्यीदालाक। 7 “आमच्योक हो़गीनक्याई, धाम्पे थुक्ङीगी क्षो़छोकक्याला घी सुङगीनगो ङेन्दास्योक। धेनी सु ग्याली होदेगोला, ङा को़न्क्षोकगी श्यीङखामदु हो़गीन छेसोकगी दोङबोने शायेगी आङजा तेरयेहीन। सीमीरनागी क्षो़छोकला का ॱनाङवा 8 “धेनी सीमीरनागी क्षो़छोकगी भाङछेनला देरे ढीक, “एम्मा ढोङा जेदी याङ कुसो़न्पो श्याङा जेजा, खोङबा थोक्मा धाङ थामा हीन्गीनगी़, दे काक्या सुङी। 9 ख्यी़ दुक्पुक्या धाङ ख्यो़ उटे हो़गीनगो, ङाला स्येयेहो़क। हीना ख्यो़ नी, क्षुक्पुराङ दुक। धेनी याहुदापा मेन्दाला राङला याहुदापा हीन ॱनेरी, ॱनागीनक्याला ङी ङोस्येलीहो़क। धेनी खुङक्याई ॱमेटा ताङगीनगो, ङाला स्येयेहो़क। खुङक्या नी धी़कगी छोक्खाङ लाक। 10 धा ख्यी़ ङ्याङये हीन्गीन दुक्पुक्याने माजीक। तो़दाङ, खेक्याला छो़ता झ्यीयेगी क्षीदु, धी़कगी खेक्याने रीङगाला चो़न्खाङदु च्युक्कीलाक धेनी श्याक्मो च्यु थुक्पे, ख्यो़ला दुक्पु झ्युङगीलाक। ख्यो़ स्यीघो़ना धेपाला तेन्पो धो़क धेनी ङी ख्यो़ला छेसोकगी चो़पेन तेरु। 11 “आमच्योक हो़गीनक्याई धाम्पे थुक्ङीगी, क्षो़छोकक्याला घी सुङगीनगो ङेन्दास्योक। धेनी सु ग्याली, होदेगोला छीवा ॱङीवाने क्यो़न घीया झ्युङगीमालाक। पेरगामोनगी क्षो़छोकला का ॱनाङवा 12 “धेनी पेरगामोनगी क्षो़छोकगी भाङछेनला देरे ढीक, “खा ॱङीगारा ॱनोवा झ्येजा राल्डी हो़गीन, खोङबागी दे काक्या सुङी। 13 धी़क सातानगी ठी हो़जारु खेक्या ॱनेलालाक ॱनेरी, ङाला स्येयेहो़क। देरे हीन्नाः, खेक्या ङी मीङगी दो़न्दु तेन्पो ॱनेलालाक। धेनी धी़क सातान ॱनेसा, खीकी ग्याजारु ङी ॱलोते हो़गीन पाङपो आन्तीपागोला सेपालाक धेनी होदे घाङगी ङीमाक्यालाः, खेक्याई राङगी धेपा ॱमापाजुङ। 14 हीना ङाला खेक्याला क्यो़न चुक्येगी लाबक्या हो़क। खेक्याई खोक्दु बालामगी क्षो़ला ती़न्गीन, मी रीङगा दुक। ईस्राएल्पाक्याला धीक्पे नाङदु ॱली़येला, ल्हाकुन्डाक्याला पुपा शामा शाये धाङ लोक्येम झ्यीयेला बालामगी, बालाकला ॱलाप्पालाक। 15 देरेराङ झ्येरी, ख्यी़चारु नीकोलापाक्याई क्षो़ चीगीन मी रे दुक। 16 होझ्येरी धीक्पा पारी सेम ग्युरवा तोङ। याङमेना ङा खीकीचारु ग्योक्जे हुङयेहीन धेनी ङी खागी राल्डीगी खुङक्यामुला टाप्येहीन। 17 “आमच्योक हो़गीनक्याई, धाम्पे थुक्ङीगी क्षो़छोकक्याला घी सुङगीनगो ङेन्दास्योक। धेनी सु ग्याली, होदेगोला ङा बेरी श्याकश्या ॱमान्नागो तेरयेहीन। धेनी होदेला ङा मीङ साबा ढीक्टा, धो काउ च्यीक तेरयेहीन। होदे थोप्कीनगी़ च्यीगा होदे मीङ स्येगीलाक। थीयातीरागी क्षो़छोकला का ॱनाङवा 18 “धेनी थीयातीरागी क्षो़छोकगी भाङछेनला देरे ढीक, “चेनगो ॱमेचे च्योक्रे धाङ श्यापगो मेथाप नाङला, हो़ तो़न्दी श्याक्सा लीदीङ च्योक्रे, हो़गीन खोङ को़न्क्षोकगी सेगी दे काक्या सुङी। 19 ख्यी़ लेगा, ख्यी़ झाम्पा, ख्यी़ धेपा, ख्यी़ श्याप्ची धाङ ख्यी़ शो़पागी कोरला ङाला स्येयेहो़क। धेनी ख्यी़ स्याम्ला झ्येजा लेगाक्या, एम्मा झ्येजाने ल्हाक दुक। 20 हीना ख्यो़ला ङा क्यो़न च्यीक चुक्येहो़क। ख्यो़ एजेबेल ॱनागीन भोमोला शो़पा झ्यीदीक। मो मोराङला ॱङो़नस्येखेन च्यीक हीन ॱनालाक धेनी ङी श्याप्चीक्याला लोक्येम झ्यीये धाङ ल्हाकुन्डाक्याला पुपा शामा शाये ॱलाप्ती, खुङक्याला ॱली़लालाक। 21 ङी मोला राङगी धीक्पा पारी सेम ग्युरयेला, धी़चो़ तेरपालाक हीना मो मोरी लोक्येमगो पाङयेगी दो़पा मीझ्यीदा। 22 होझ्येरी ङा मोला दुक्पुगी ङ्याठी खाला ॱयुक्येहीन धेनी मी़मोला लोक्येम झ्यीगीनक्या राङगी धीक्पा पारी सेम ग्युरवा ॱमेताङना, खुङक्याला दुक्पु क्षे फोक्कीलाक। 23 ङा मी़ टुवाक्याला सेयेहीन। धेनी मीगी सेम धाङ साम्लोला ताक्चा झ्यीगीनगो, ङा हीन ॱनेरी, क्षो़छोक घीरीगी स्येगीलाक। धेनी ङा खेक्या घीरीला, खेराङक्याई लेगाला तेरी तेराहीन। 24 “हीना दे क्षो़ला ॱमीचीगीन धाङ धी़ सातानगी साङवा तीङरीङाक्या मेज्याङगीन, खे थीयातीरादु हो़गीन खेक्याला ॱनाहीन, ‘ङा खेक्याला खु श्येम्मा घीया कायेमेन। 25 हीना ङा माहुङगीन थुक्पे, खेक्याला हो़गीनगो तेन्पो ॱरुरी धो़क। 26 धेनी ग्यागीन धाङ था थुक्पे ङी लेगा ॱरुङगीनक्याला, ङा मीरीक-मीरीकगी खाला आङजा तेरयेहीन। 27 धेनी च्याकगी ग्युक्पागी जामाक्याला दुबु-दुबुला च्याक्कीन च्योक्रे, खुङक्याई आङजा झ्यीगीलाक। देरेराङ आङजा ङाला ङी यापने थोप हो़तालाक।’ 28 ङा खुङक्याला ॱङारोकगी कारमागो तेराहीन। 29 “आमच्योक हो़गीनक्याई धाम्पे थुक्ङीगी क्षो़छोकला, घी सुङगीनगो ङेन्दास्योक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.