ॱङो़न्पा 19 - ॱलोवानाम्खे श्यीङखाम नाङ तो़पा पुवा 1 होदे स्याम्ने, ङी नाम्खे श्यीङखामने मीछोक क्षेगी केक च्योक्रे च्यीक, देरे ॱनागीनगो घोरजुङ, “हालेलुयाह! थारपा धाङ शीजे धाङ वाङ, होरी को़न्क्षोकगी लाक। 2 घीझ्येरी ॱनाना खोङबागी ठीम्चो़ धेन्पा धाङ ढाङपो दुक। धेनी साश्यी हो़लेला राङगी दो़क्षाकगी ले ङेन्पा झ्यीरु च्युक्कीन, होदे केटाक्क्षे श्याङचोङमागोला, खोङबागी ठीम्चो़ जेदुक। धेनी खोङबागी श्याप्चीक्याई ठाकगी छापगो मोला लेन जेदुक।” 3 याङ खुङक्याई धाब्ले केक ग्याप्ती ॱनेवालाक, “हालेलुयाह! मोला ॱराक्कीनगी धीबागो ग्युने ग्युन्दु याला थो़न्दी डुगीलाक।” 4 धेनी होदे ॱलोपो़न ङीस्यु चापश्यी धाङ सेम्चेन श्यीगी श्युक्ठीला श्युक्कीन, को़न्क्षोकगी डुङदु ली़ साला दाप्ती देरे ॱनेरी क्षाक्क्षो़पा पुवालाक, “आमेन। हालेलुयाह!” 5 धेनी श्युक्ठीने देरे सुङगीन सुङकेक च्यीक थो़न्बालाक, “खे को़न्क्षोकगी श्याप्चीपाक्याओ, खोङबाला जीक्नाङ झ्यीगीन, खे क्षे धाङ च्युङा घीरी, होरी को़न्क्षोकला तो़पा पु।” 6 धेनी मीछोक क्षेगी केक च्योक्रे च्यीक, ग्युक्क्षुगी हुरडा धाङ डुक्डागी केक च्योक्रे च्यीकगी, देरे ॱनागीनगो ङी घोरजुङ, “हालेलुयाह! घीझ्येरी ॱनाना होरी चोवो को़न्क्षोक कुवाङगी ग्यासी क्योङा जेदालाक। 7 होराङ घागा की-की झ्यी धेनी ङ्यामो घाउ धेनी खोङबाला शीजे पुलो। घीझ्येरी ॱनाना लुक्टुगी ॱनामा लेन्येगी धी़गो ॱलेप्दुक। धेनी खोङबागी भाक्मागी राङला डाढीक झ्येदुक। 8 घो़ पी़मा धाङ ठाछाई धाङ चाङमा च्यीक मोला घो़न्येला ॱनावालाक।” रे पी़मा दे नी, धाम्पे मीक्याई, ले शाङपोक्याला तो़न्दालाक। 9 धेनी होदे नाम्खे भाङछेनगी ङाला सुजुङ, “दे ढीक। लुक्टुगी ॱनामा लेन्जारु डो़नला भो़पाक्या झ्यीलाप क्षे लाक।” धेनी याङ खोङबागी ङाला सुजुङ, “देक्या नी को़न्क्षोकगी सुङला धेन्पाक्या लाक।” 10 धेनी खोङबाला क्षाक्क्षो़पा पुयेला, ङी खोङबागी श्यापला क्षाक छावी। हीना खोङबागी ङाला सुजुङ, “देरे माझ्यी। ङा नी ख्यो़ धाङ ख्यी़ पी़नक्या च्योक्रे, येशुगी धेन्पाङ झ्यीगीन लेरोक च्यीगा हीन। को़न्क्षोकला क्षाक्क्षो़पा पु। घीझ्येरी ॱनाना येशुला धेन्पाङ झ्यीगीन नी, ॱङो़नस्येगी सेम्ङी लाक।” ता काउगी खाला छीप्खेन 11 धेनी ङी नाम्खे श्यीङखाम भेगीनगो, थोजुङ धेनी होदुरु ता काउ च्यीक दुक। होदे ता खाला छीप्खेनगी़ छेनला ॱलोते छोक्पा धाङ धेन्पा दुक। ढाङतेनगी थोक्ने, खोङबागी ठीम्चो़ जेगीलाक धेनी ॱमाक टाप्कीलाक। 12 खोङबागी चेन नी, मेचे च्योक्रे दुक धेनी खोङबागी उला चो़पेन माङा दुक। खोङबागी खाला छेन च्यीक ढीक दुक। धेनी होदे छेन दे, खोङबाराङगी माना श्येम्मा सुला स्येये मेतालाक। 13 खोङबागी ठाकला बाबा नाशा ॱनुम्दुक धेनी खोङबागी छेन नी, को़न्क्षोकगी का ॱनेरी दुक। 14 नाम्खे श्यीङखामगी ॱमाक्मीक्या, घो़ पी़मा काउ धाङ चाङमा घो़न्दी ता काउक्या खाला श्यो़न्दी खोङबागी स्याम्ला डावालाक। 15 मीरीकक्याला ग्याप्येगी क्षीला, खोङबागी श्यालने राल्डी ॱनोवा च्यीक थो़न्दी धेनी खोङबागी च्याकगी भेक्योकगी थोक्ने, खुङक्या खाला वाङग्युर जेगीलाक। धेनी घुन्क्षाङ चीरसा श्योङ नाङने खोवा तो़न्गीन च्योक्रे, खोङबागी कुवाङ को़न्क्षोकगी थुक्ठो़गी नाङ खुङक्याला चीरकीलाक। 16 खोङबागी नाशा धाङ ॱलास्याला “ग्यावुक्याई ग्यावु धाङ चोवोक्याई चोवो” ॱनेरी, छेन ढीक हो़तालाक। 17 धेनी ङी ङीमा खाला नाम्खे भाङछेन च्यीक, श्यारी श्युक्कीनगो थोजुङ। धेनी खोङबागी भारनामला फुरकीन झ्या घीरीला, सुङकेक क्षेला देरे सुवालाक, “स्योक, को़न्क्षोकगी श्युक्टा खाक्क्षेला जोम। 18 धेनी ग्यावुक्या धाङ ॱमाक्पो़नक्या धाङ तोप्चेनक्या धाङ ताक्या धाङ होदे खाला श्यो़न्गीनक्या धाङ राङवाङ हो़गीन धाङ ढेन्योकक्या धाङ क्षे धाङ च्युङा घीरीगी, स्या शारु स्योक।” 19 धेनी ताला छीप्गीनक्या धाङ खोङबागी ॱमाक्मीक्यामुला ॱमाक टाप्येला, होदे सेम्चेन धाङ साश्यीगी ग्यावुक्या धाङ खुङक्याई ॱमाक्मीक्या जोम्गीनगो, ङी थोजुङ। 20 धेनी होदे सेम्चेन धाङ होदेगी छापला ॱहाङसागीन लेगा तो़न्गीन, ॱङो़नस्येखेन शोक्पो ॱङीगाराला शीम्बालाक। धेनी होदे ॱङो़नस्येखेन शोक्पोगी़ राङगी ॱहाङसागीन लेगाक्याई थोक्ने, होदे सेम्चेनगी ताक लेन्ला धाङ होदेगी कुला क्षाक्क्षो़पा पुगीनक्याला ॱली़ हो़तालाक। दे ॱङीगाराला मे भारती धेता मुशेगी छोला सो़न्पो ॱयुक्पालाक। 21 धेनी ल्हाक्मा ल्हाक्लाक्याला, ताला छीप्कीनगी श्यालने थो़न्दा राल्डीगी सेपालाक। धेनी झ्या घीरीगी होदेक्याई स्याक्या डागीन थुक्पे शेवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.