ॱङो़न्पा 18 - ॱलोवाबाबीलोन ग्याजा मेताला डोगीनगी कोर 1 होदे स्याम्ने, नाम्खे श्यीङखामने वाङक्षे हो़गीन नाम्खे भाङछेन श्येम्मा च्यीक माला फेप्कीनगो, ङी थोजुङ। होदेगी शीजेगी साश्यीला, हो़ ठाछाई झ्युवालाक। 2 धेनी होदेगी सुङकेक क्षेला देरे सुवालाक, “मेताला लाजो, ग्याजा क्षे बाबीलोनगो मेताला लाजो। मो नी डेक्याई ॱनेसा झ्युदुक। धेनी सेम्ङी ॱमेचाङा ॱनाछोकगी ॱनेसा, धाङ झ्या ॱमेचाङा ॱनाछोकगी ॱनेसा, धेनी सेम्चेन ॱमेचाङा धाङ आम्लोवा ॱनाछोकगी ॱनेसा झ्युदुक। 3 घीझ्येरी ॱनाना मीरीक घीरीगी, मी़ दो़छाकगी घुन्क्षाङ घारागो थुदुक, धेनी साश्यीगी ग्यावुक्याई मी़मुला लोक्येम झ्येदुक, धेनी साश्यीगी छोङबाक्या मी़ दो़यो़नगी झ्येरी क्षुक्पु झ्युदुक।” 4 धेनी ङी नाम्खे श्यीङखामने देरे सुङगीन, सुङकेक श्येम्मा च्यीक घोरजुङ, “ङी मीक्याओ, खेक्या मी़ धीक्पामुला मेडेये धाङ मी़ क्षेपाक्या ॱमेफोक्येगी क्षीला, खेक्या मी़ नाङने, थो़न्दी स्योक। 5 घीझ्येरी ॱनाना मी़ धीक्पाक्या माङा झ्युरी, नाम्खे श्यीङखाम थुक्पे ॱलेप्दुक, धेनी को़न्क्षोकगी मी़ लेगा ङेन्पाक्या ढेन्सो जेदुक। 6 मी़ श्येम्माला झ्येजा च्योक्रे मोला झ्यी। मी़ झ्येजाने दाप ॱङी मोला ॱलोक। मी़ श्येम्माला डाढीक झ्येजा दुक्पुगी घुन्क्षाङने, दाप ॱङी घारा, मी़ फोरा नाङदु ॱलुक। 7 मी़ मोराङला शीजे ताङगीन धाङ दो़यो़नला धेगीन चो़जो़, मोला दुक्पु धाङ दुङा तेर। घीझ्येरी ॱनाना मी़ राङगी सेमला देरे ॱनालाक, ‘ङा ग्यामु झ्युरी धेहो़क। ङा युक्जामा मेन। ङा नामा दुक ॱरुङ घोगुमालाक।’ 8 होझ्येरी ङीमा च्यीक्लाराङ मी़ खाला दुक्पुक्या झ्युङगीलाक; छीवा धाङ सेम्दुक धाङ मुगे, मेगी थोक्ने मोला ॱराक्कीलाक, घीझ्येरी ॱनाना मोला ठीम्चो़ जेगीन, चोवो को़न्क्षोक नी कुवाङ को़न्क्षोक लाक।” 9 “मी़मुला लोक्येम झ्येजा धाङ मी़ दो़यो़नला धेता साश्यीगी ग्यावुक्याई, मोला ॱराक्कीन धीबा थोरी, मी़ क्षीदु ङुगीलाक धेनी दुक ॱरुङगीलाक। 10 मी़ दुक्पुगोला जीक्ती, खुङक्या थाक्रीङाला लारी धेती देरे ॱनागीलाक, ‘आच्ची! आच्ची, ख्यो़ ग्याजा क्षे, ख्यो़ ग्याजा वाङक्षे बाबीलोन। छुची च्यीक्लाराङ ख्यो़ला छेपा फोक्जुङ!’ 11 “साश्यीगी छोङबाक्या मी़ क्षीला ङुगीलाक धेनी दुक ॱरुङगीलाक घीझ्येरी ॱनाना सी़या खुङक्याई छोङ-शोक याङ नामाः मेङ्योगीलाक। 12 छोङ-शोकक्या नी, सेर धाङ ॱङु धाङ धो रीन्पोक्षे धाङ मुतीकक्या धाङ रे पी़माक्या धाङ रे ग्यामुकक्या धाङ दारघो़ धाङ रे ॱमाउक्या धेनी ढीस्यीम हो़गीन स्यीङ ॱनाछोक धाङ ॱलाङछेनगी छेवाने शो़सा च्यालाक ॱनाछोक धेनी रीङक्षे स्यीङ धाङ लीदीङ धाङ च्याक धाङ दो कामारुगी शो़सा च्यालाक ॱनाछोक, 13 धाङ स्यीङछा धाङ ॱमेन्ना धाङ पो़ धाङ मुररा धाङ पो़कार धाङ घुन्क्षाङ धाङ क्युरुस्यीङगी ॱनुम धाङ फे धाङ डो धाङ भालाङ धाङ लुक धाङ ता धाङ स्यीङता खोरलो धाङ ढेन्योक धाङ मीक्या लाक। 14 खुङक्याई ॱनागीलाक, ‘ख्यी़ दो़पा झ्येजा ढेबुक्या ख्यो़ने स्योरदुक। धेनी ख्यी़ दो़यो़नक्या धाङ ग्युनोरक्या मेताला शोदुक। धेनी होदे ख्यो़ला नामा थोप्कीमालाक।’ 15 “होदे ग्याजाला छोङ-शोकक्या चोरी क्षुक्पु झ्युजा छोङबाक्या, मी़ दुक्पुला जीक्ती थाक्रीङाला लारी धेगीलाक। धेनी खुङक्या केक क्षेला देरे ॱनेरी ङुगीलाक धेनी दुक ॱरुङगीलाक, 16 ‘आच्ची! आच्ची, ख्यो़ ग्याजा क्षे, ख्यो़ रे पी़मा धाङ ग्यामुक धाङ ॱमाउ घो़न्गा, धेनी सेर धाङ धो रीन्पोक्षे धाङ मुतीकक्याई गेन्छा घो़न्गा। 17 छुची च्यीक्लाराङ ख्यी़ ग्युनोर घीरी मेताला लाजुङ।’ “डुशीङगी पो़न्पोक्या धाङ डुशीङ श्यो़न्गीन, मीक्या धाङ डुपाक्या धाङ ग्याछोने छोवा क्यागीन छोङबाक्या, थाक्रीङाला लारी धेगीलाक। 18 धेनी होदे ग्याजा क्षेगो छीक्ती धीबागो थोरी, खुङक्याई देरे ॱनेरी केक ग्याप्कीलाक, ‘दे च्योक्रे ग्याजा क्षे श्येम्मा घारु हो़तालाक से?’ 19 खुङक्याई राङगी गोला थाला तोरती ङुगीलाक धेनी दुक ॱरुरी देरे ॱनागीलाक, ‘आच्ची! आच्ची ख्यो़ ग्याजा क्षे। ग्याछोला डुशीङ हो़गीन घीरी, मी़ थोक्ने क्षुक्पु झ्युवालाक। धेनी छुची च्यीक्लाराङ मो मेताला लाजुङ! 20 के नाम्खे श्यीङखाम, मी़ ठीम्चो़ला ङ्यामो घो़। के धाम्पे मीक्या धाङ कुछापक्या धाङ ॱङो़नस्येखेनक्या ङ्यामो घो़। खेक्याला ॱङ्याप्चो़ झ्यीगीनगोला, को़न्क्षोकगी मोला ठीम्चो़ जेदुक।’” 21 धेनी नाम्खे भाङछेन तोपक्षे च्यीकगी थाकधो क्षे च्योक्रे, धोगोङ च्यीक क्याक्ती, देरे सुरी ग्याछो नाङला ॱयुक्जुङ, “ग्याजा क्षे बाबीलोनगोला, देरेराङ स्युक्क्षे झ्येरी ॱयुक्कीलाक। धेनी होदे धाब्ले नामा ॱमेथोङगीलाक। 22 पीवाङ ताङगीन धाङ ॱलु लेन्गीन धाङ ॱलीङबु ताङगीन धाङ दुङक्षेन भी़गीनक्याई डाक्या, ख्यी़ नाङदु याङ नामा मेघोरकीलाक। शोरीक घीन्गीया शोपाक्या, ख्यी़ नाङदु याङ नामा ॱमेङेगीलाक। थाकधोगी केक, ख्यी़ नाङदु याङ नामा मेघोरकीलाक। 23 ॱलोकगी हो़, ख्यी़ नाङदु याङ नामा मेभारकीलाक। माक्पा धाङ भाक्मागी केक, ख्यी़ नाङदु याङ नामा मेघोरकीलाक। घीझ्येरी ॱनाना ख्यी़ छोङबाक्या साश्यीगी, मी खाक्क्षेक्या लाक धेनी ख्यी़ थी़ ग्याप्ती मीरीक घीरीला ॱली़वालाक। 24 धेनी ख्यी़ नाङदु ॱङो़नस्येखेनक्या धाङ धाम्पे मीक्याई ठाक, धाङ साश्यीदु सेसा मी घीरीगी ठाक ॱङेपालाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.