ॱङो़न्पा 17 - ॱलोवाभोमो धाङ सेम्चेनगी कोर 1 होदे फोरा धी़न हो़गीन नाम्खे भाङछेन धी़नने, च्यीक ङीचारु फेप्ती देरे सुजुङ, “दुरु स्योक। ङा ख्यो़ला क्षु माङागी डामला धेगीन, होदे श्याङचोङमा केटाक्क्षेला फोक्ये हीन्गीन ठीम्चो़गो तो़न्दु। 2 होदेमुला साश्यीगी ग्यावुक्याई, लोक्येम झ्येदुक धेनी मी़ लोक्येमगी घुन्क्षाङ थुरी, साश्यीगी मी घीरी शीरी धेदुक।” 3 धेनी ङा धाम्पे थुक्ङीगी खारी, होदे नाम्खे भाङछेनगी ङाला रीतोङ च्यीकला ठीया जेजुङ। धेनी ङी होदुरु गोवा धी़न धाङ राक्योक च्यु हो़गीन धाङ को़न्क्षोकला कुरवा धेप्कीन मीङक्याई खाङखा सेम्चेन ॱमाउ च्यीकगी खाला धेता, भोमो च्यीकला थोजुङ। 4 होदे भोमोगी़ घो़ ग्यामुक धाङ ॱमाउ घो़न हो़तालाक धेनी सेर धाङ धो रीन्पोक्षे धाङ मुतीकक्याई गेन्छाक्याई तुम हो़तालाक। मी़ लाक्पाला आम्लोवा धाङ राङगी लोक्येमगी ॱमेचाङा दो़नक्याई खाङखा, सेरगी फोरा च्यीक शीम्दी धे हो़तालाक। 5 धेनी मी़ टाल्ले खाला देरे साङवागी दो़न्दाक हो़गीन, देरे मीङ ढीक हो़तालाक, “ग्याजा क्षे बाबीलोन, साश्यीगी श्याङचोङमाक्या, धाङ आम्लोवा दो़नक्याई आमा।” 6 धेनी होदे भोमोगी़ येशुला, धेन्पाङ झ्यीगीन धाम्पे मीक्याई ठाक थुरी शीगीनगो, ङी थोजुङ। होदेला थोरी ङा ॱमीच्यीकी ॱहाङसाजुङ। 7 धेनी होदे नाम्खे भाङछेनगी ङाला सुजुङ, “ख्यो़ घीझ्येरी ॱहाङसाले? होदे भोमो धाङ मोला खुरकीन गोवा धी़न धाङ राक्योक च्यु हो़गीन, होदे सेम्चेनगी साङवागो ङी ख्यो़ला स्येदु। 8 ख्यी़ थोङगीन होदे सेम्चेनगो एम्मा थेङ च्यीकला हो़तालाक हीना धान्दा मेतालाक। धेनी मेताला डोयेगी क्षीदु, होदे थी मेगीन दोङ-दोङने थो़न्ये झ्यीदीक। धेनी साश्यी को़ने ॱहाला, छेसोकगी धेप नाङदु मीङ माढीक्टा साश्यीगी मीक्या, होदे सेम्चेनला थोरी ॱहाङसागीलाक घीझ्येरी ॱनाना होदे थेङ च्यीकला हो़तालाक हीना धान्दा मेतालाक धेनी स्याम्ला हुङगीलाक। 9 “दो़न दे ॱहाघोरयेगी स्येराप घोयेदुक। गो धी़नगो, होदे भोमो धेगीन री धी़नक्या लाक। 10 देक्या ग्यावु धी़नक्याः लाक। ग्यावु ॱङा नी स्यीसालाक धेनी च्यीक धान्दा वाङ झ्यीदी हो़तालाक धेनी श्येम्मा च्यीक्पोगो, धोराङा मायो हो़तालाक। होदे हुङी घाङला, धी़ तीते च्यीगा धे घोगीलाक। 11 धेनी एम्मा थेङ च्यीक हो़गीन धाङ धान्दा मेगीन, होदे सेम्चेनगो ग्यावु ग्येपागो लाक। खो ग्यावु धी़न्बाक्या च्योक्रे च्यीक लाक धेनी खोवाः मेताला डोये हो़तालाक। 12 “ख्यी़ थोथा होदे राक्योक च्युगो धान्दा थुक्पे, ग्याखाप ॱमाथोप्था ग्यावु च्युगो लाक। हीना खुङक्याला होदे सेम्चेनमुला वाङग्युर झ्यीयेला, छुची च्यीकगी ग्यावुगी आङजा थोप्कीलाक। 13 खुङक्याई साम्लो च्यीक्पा हो़तालाक धेनी खुङक्याई राङगी नी़थु धाङ आङजा, होदे सेम्चेनला तेरकीलाक। 14 खुङक्याई लुक्टुमुला ॱमाक टाप्कीलाक हीना लुक्टुगी, खुङक्या खाला ग्यागीलाक घीझ्येरी ॱनाना खोङबा चोवोक्याई चोवो धाङ ग्यावुक्याई ग्यावु लाक। धेनी खोङबामुला राङगी भो़पाक्या धाङ दाम्दाक्या धाङ ॱलोते छोक्पा मीक्या हो़तालाक।” 15 धेनी होदे नाम्खे भाङछेनगी ङाला सुजुङ, “ख्यी़ थोथा होदे श्याङचोङमा धेता क्षुक्या नी, मीक्या धाङ मीमाङक्या धाङ मीरीकक्या धाङ केरीकक्या लाक। 16 धेनी ख्यी़ थोथा होदे राक्योक च्यु धाङ होदे सेम्चेनगी, होदे श्याङचोङमाला दाङा झ्यीगीलाक। धेनी मोला हो़गीन घीरी ठोक्ती, मोला ॱमाराङा शोगीलाक धेनी खुङक्याई मी़ स्या शागीलाक धेनी मोला मेला ॱराक्ती मेताला ताङगीलाक। 17 घीझ्येरी ॱनाना को़न्क्षोकगी का माडुप्कीन थुक्पे, खोङबा राङगी क्षास्यीगो डुप्तु च्युक्येला, खोङबागी खुङक्याला सेम च्यीक झ्युरी, राङगी ग्यावुगी आङजागो होदे सेम्चेनला तेरतु च्युक्पालाक। 18 ख्यी़ थोथा होदे भोमोगो नी, साश्यीगी ग्यावुक्याई खाला वाङग्युर झ्यीगीन, होदे ग्याजा क्षेगो लाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.