ॱङो़न्पा 15 - ॱलोवानाम्खे भाङछेन धी़न धाङ दुक्पु धी़नगी कोर 1 धेनी ङी नाम्खे श्यीङखामदु, श्येम्मा ताक क्षे धाङ ॱहाङसागीन च्यीक थोजुङ। नाम्खे भाङछेन धी़नक्याई, थामे दुक्पु धी़न खेर हो़तालाक घीझ्येरी ॱनाना को़न्क्षोकगी थुक्ठो़ नी, होदे दुक्पुला डुप हो़तालाक। 2 धेनी मे मुला डेडा, स्येगी ग्याछो च्योक्रे च्यीक ङी थोजुङ। धेनी ग्याछोगी डामदु सेम्चेन धाङ होदेगी कु धाङ होदेगी मीङगी ढाङगा खाला ग्याखा थोप्थाक्या, राङगी लाक्पाला को़न्क्षोकगी ॱनाङना पीवाङ खेरती लारी धेदुक। 3 धेनी खुङक्याई को़न्क्षोकगी श्याप्ची, मोशे धाङ लुक्टुगी घुरलु दे लेन्बालाक, “के चोवो, कुवाङ को़न्क्षोकला, खेराङगी क्षाक्ले नी क्षे धाङ ॱहालेगीन दुक। के मीरीकक्याई ग्यावु, खेराङगी लाम नी ढाङपो धाङ धेन्पा दुक। 4 के चोवो, खेराङला जीक्टा सी़ मीझ्यीगीलाक से? धेनी खेराङगी छेनला सी़ तो़पा ॱमीपुगीलाक से? घीझ्येरी ॱनाना खेराङ च्यीगा धाम्पा हो़तालाक। धेनी मीरीक घीरी होरी खेराङला क्षाक्क्षो़पा पुगीलाक। घीझ्येरी ॱनाना खेराङगी ढाङतेनगी क्षाक्लेक्या ॱङो़न्दुक।” 5 दे स्याम्ने ङी तेवी धेनी नाम्खे श्यीङखामदु को़न्क्षोकगी घुरखाङगी, क्षो़खाङगी घोगो पेरी श्याकश्यागो, ङी थोजुङ। 6 होदे क्षो़खाङ नाङने, नाम्खे भाङछेन धी़न दुक्पु धी़न खेरती फेप्जुङ। खुङक्याई घो़ चाङमा धाङ हो़ ग्याप्कीन धेनी ढाङगोला सेरगी कुराक ॱनुम हो़तालाक। 7 धेनी होदे सेम्चेन श्यीउने च्यीकगी धी़ तेन्दु ॱनेगीन को़न्क्षोक, खोङबागी थुक्ठो़गी खाङखा सेरगी फोरा धी़नगो, होदे नाम्खे भाङछेन धी़नला ॱनावालाक। 8 धेनी को़न्क्षोकगी शीजे धाङ नी़थुगी झ्येरी, क्षो़खाङ नी धीबागी खावालाक। धेनी होदे नाम्खे भाङछेन धी़नक्याई, दुक्पु धी़नगो माडुप्कीन थुक्पे सुवाः होदे क्षो़खाङ नाङदु जु ॱमाथुक्पालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.