ॱङो़न्पा 14 - ॱलोवालुक्टु धाङ मी बुम च्यीक धाङ तोङ श्यीपच्यु श्येवीगी कोर 1 धा ङी तेवी। धेनी लुक्टुगो सीयोनगी रीला श्याङदी श्युक्कीन धाङ खोङमुला मी बुम च्यीक धाङ तोङ श्यीपच्यु श्येवीगो थोजुङ। खुङक्याई टाल्लेला खोङबागी छेन धाङ खोङबागी यापगी छेन ढीक्दुक। 2 धेनी नाम्खे श्यीङखामने ग्युक्क्षु क्षेगी हुरडा धाङ डुक्डा क्षेगी केक च्योक्रे, थो़न्गीन सुङकेक च्यीक ङी घोरजुङ। ङी घोरका सुङकेक दे, पीवाङ ताङगीनक्याई पीवाङ ताङगीन ढा च्योक्रे दुक। 3 धेनी को़न्क्षोकगी श्युक्ठी धाङ होदे सेम्चेन श्यी धाङ ॱलोपो़नक्याई दोङदु, खुङक्याई ॱलु साबा च्यीक पुवालाक। धेनी साश्यीने रीङ तेरती ॱली़ला, मी बुम च्यीक धाङ श्यीपच्यु श्येवीक्या माना, श्येम्मा सी़या होदे ॱलुगो झाङ ॱमाथुक्पालाक। 4 खुङक्या नी, भोमोक्यामुला माडेवा राङला चाङमा श्याक हो़तालाक। खुङक्या नी, लुक्टु घारु फेप्सारु स्याबाला डागीनक्या लाक। धेनी खुङक्या नी, को़न्क्षोक धाङ लुक्टुगी क्षीदु, लोदोकगी फी़ च्योक्रे, मीक्याने रीङ तेरती ॱली़लोवाक्या लाक। 5 खुङक्याई खाला शोक घीया मेतालाक धेनी खुङक्या क्यो़न मेगीन लाक। नाम्खे भाङछेन सुमगी कोर 6 धेनी नाम्खे भाङछेन श्येम्मा च्यीक ॱनामगी बारनाङला फुरती धेगीनगो, ङी थोजुङ। धेनी साश्यीदु हो़गीन, मीरीक धाङ ग्युपा धाङ केरीक धाङ मी घीरीला सेटाक झ्यीये हीन्गीन, थामेगीन ताम्शाङगो खोङबाला हो़तालाक। 7 खोङबागी सुङकेक क्षेला सुवालाक, “को़न्क्षोकला जीक्नाङ झ्यी धेनी तो़पा पु घीझ्येरी ॱनाना खोङबागी ठीम्चो़गी धी़चो़गो ॱलेप्दुक। नाम्खे श्यीङखाम धाङ साश्यी धाङ ग्याछो धाङ क्षु क्षुमीकक्या को़ जेगीन, खोङबाला क्षाक्क्षो़पा पु।” 8 धेनी नाम्खे भाङछेन ॱङीवागो, होदेगी स्याम-स्याम्ला डारी देरे सुवालाक, “ग्याजा क्षे बाबीलोनगो धीप्जो! धीप्जो! दे ग्याजागी मीरीक घीरीला, राङगी लोक्येमगी घुन्क्षाङ घारागो थुङदु च्युक्पालाक।” 9 धेनी नाम्खे भाङछेन सुम्बागो, होदेक्याई स्याम्ला डारी सुङकेक क्षेला देरे सुजुङ, “होदे सेम्चेन धाङ होदेगी कुला क्षाक्क्षो़पा पुये धाङ होदेगी ताकगो, राङगी टाल्ले याङना लाक्पाला ग्याप हो़ना, 10 होदे मीगीयाः को़न्क्षोकगी थुक्ठो़गी छो़स्याल नाङदु घीया ॱमारेवा ॱलुक्ला, को़न्क्षोकगी थुक्ठो़गी घुन्क्षाङगो थुङगीलाक। धेनी धाम्पे नाम्खे भाङछेनक्या धाङ लुक्टुगी डुङदु, खोला मे धाङ मुशेगी दुक्पु ताङगीलाक। 11 धेनी खुङक्याई दुक्पु ङ्याङगीनगी धी़बागो, धी़ तेनगी क्षीदु याला डुगीलाक। धेनी होदे सेम्चेन धाङ होदेगी कुला क्षाक्क्षो़पा पुगीन धाङ होदेगी मीङगी ताकगो थोप्थाक्याला, ङीन-छेन ङासुये राक्कुमालाक।” 12 दे नी को़न्क्षोकगी का ॱरुङगीन धाङ येशुला धेपा झ्यीगीन धाम्पे मीक्याई क्षीदु, शो़पागी भो़टाक लाक। 13 धेनी नाम्खे श्यीङखामने देरे सुङकेक च्यीक ङी घोरजुङ, “देरे ढीक। धा देने ॱहाला चोवोला धेपा झ्येरी, ढोङगीनक्या झ्यीलाप क्षे लाक।” धेनी धाम्पे थुक्ङीगी सुङालाक, “लाक। खुङक्या राङगी काल्लेने ङासुगीलाक घीझ्येरी ॱनाना खुङक्याई लेगागी ज्यागा खुङक्याला ॱनाङगीलाक।” साश्यीगी लोदोक धी़गीनगी कोर 14 धेनी ङी तेवी। धेनी ॱरीङबा काउ च्यीक धाङ होदेगी खाला मी-भु च्योक्रे श्युक्कीन च्यीक, ङी ज्याजुङ। खोङगी उला सेरगी चो़पेन धाङ खोङगी क्षाकला शोरा ॱनोवा च्यीक दुक। 15 धेनी नाम्खे भाङछेन श्येम्मा च्यीक क्षो़खाङ नाङने फेप्ती, ॱरीङबा खाला श्युक्कीनगोला सुङकेक क्षेगी सुवालाक, “खेराङगी शोरा ॱनुमा जे धेनी ॱङारोक जे घीझ्येरी ॱनाना साश्यीगी लोदोक घीरी छो़ सारसा झ्येरी, लोदोक ॱङायेगी धी़चो़ भाप्दुक।” 16 होझ्येरी ॱरीङबा खाला श्युक्कीनगी राङगी शोरा साश्यी खाला ग्यावा जेपालाक धेनी साश्यीगी तो़न धी़वालाक। 17 धेनी नाम्खे श्यीङखामदु हो़गीन, क्षो़खाङने नाम्खे भाङछेन श्येम्मा च्यीक फेप्जुङ धेनी खोङबालाः शोरा ॱनोवा च्यीक दुक। 18 धेनी क्षो़ठीगी मेगी तादोक जेगीन, नाम्खे भाङछेन श्येम्मा च्यीक क्षो़ठी नाङने फेप्जुङ। धेनी शोरा ॱनोवा हो़गीन, नाम्खे भाङछेनगोला सुङकेक क्षेला सुजुङ, “ख्यो़री शोरा ॱनोवागो ग्योप धेनी साश्यीगी घुन्डुमगी छाक्पाक्या रुक घीझ्येरी ॱनाना साश्यीगी घुन्डुम घीरी छो़सादुक।” 19 होझ्येरी होदे नाम्खे भाङछेनगी राङगी शोरा साश्यीगी खाला ग्याप्पालाक धेनी साश्यीगी घुन्डुमक्या रुक्पालाक। धेनी को़न्क्षोकगी थुक्ठो़गी घुन्क्षाङ चीरसा, श्योङ क्षे नाङदु ॱयुक्पालाक। 20 होदे घुन्डुमक्या ग्याजा फीला हो़गीन, घुन्क्षाङ चीरसा श्योङ नाङदु चीरपालाक धेनी होदे श्योङने ठाक थो़न्दी होवालाक। धेनी होदे ठाकगो तागी ॱराप थुक्पे ॱलेप्कीन, धाङ ग्याङडा कीलो मीटार सुमग्या चो़ थो़न्बालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.