ॱङो़न्पा 13 - ॱलोवाग्याछोने थो़न्दी होवा सेम्चेनगी कोर 1 धेनी ग्याछो नाङने, राक्योक च्यु धाङ गोवा धी़न हो़गीन सेम्चेन च्यीक थो़न्दी हुङगीनगो, ङी थोजुङ। होदेगी राक्योकक्याला चो़पेन च्यु दुक धेनी होदेगी गोवाक्याला, को़न्क्षोकला कुरवा धेप्कीन मीङ दुक। 2 ङी थोथा सेम्चेनगो शीक च्योक्रे दुक धेनी होदेगी काङबागो, दोमगी काङबा धाङ खागो सीङगेगी खा च्योक्रे दुक। धेनी होदे डुकगी, होदे सेम्चेनगोला राङगी नी़थु धाङ राङगी ठी धाङ राङगी आङजा क्षेगो तेरपालाक। 3 होदे सेम्चेनगी गोवाक्याने च्यीकला, ॱमा छाप्क्षे च्योक्रे च्यीक थोङी हीना ॱमागो सो़री लाजुङ। धेनी जीक्तेन हो़ले ॱहालेरी, होदे सेम्चेनगी स्याबाला डावालाक। 4 धेनी डुकगी राङगी आङजागो, होदे सेम्चेनला तेरता झ्येरी, मीक्या खोला क्षाक्क्षो़पा पुलालाक धेनी होदे सेम्चेनगोलाः देरे ॱनेरी क्षाक्क्षो़पा पुलालाक, “सेम्चेन दे च्योक्रे सु हेतो? धेनी देमुला टाप थुक्कीन सु हेतो?” 5 होदे सेम्चेनला राङतो़ झ्येरी, को़न्क्षोकला कुरवा धेप्कीनगी खा तेर हो़तालाक धेनी दावा श्यीपच्यु श्येङी थुक्पे, वाङग्युर झ्यीरु च्युक हो़तालाक। 6 धेनी होदेगी को़न्क्षोकला कुरवा धेप्येला, खोङबागी छेन धाङ खोङबागी श्युक्ठी धाङ नाम्खे श्यीङखामदु, श्युक्कीन घीरीला ॱमेटा तावालाक। 7 धेनी होदेला धाम्पे मीक्यामुला टाप्ये धाङ खुङक्या खाला ग्यायेगी नी़थु तेरपालाक। धेनी ग्युपा घीरी धाङ मी घीरी धाङ केरीक घीरी धाङ मीरीक घीरीगी खाला खोला आङजा तेरपालाक। 8 धेनी सेदी श्याकश्या लुक्टुगी छेसोकगी धेप नाङला, जीक्तेन ॱमाको़ एन्लाराङ, मीङ माढीक्टा साश्यीदु धेगीन मी घीरीगी, होदे सेम्चेनला क्षाक्क्षो़पा पुगीलाक। 9 आमच्योक हो़गीनक्याई ङेन्दास्योक। 10 “चो़नदु डो घोगीनक्या चो़नदुराङ डुगीलाक, धेनी राल्डीगी सेये हीन्गीनक्या राल्डीने राङ सेगीलाक।” दे नी को़न्क्षोकगी मीक्याई क्षीदु, शो़पा धाङ धेपागी भो़टाक च्यीक लाक। साश्यीने थो़न्दी होवा सेम्चेनगी कोर 11 धेनी साश्यी नाङने सेम्चेन श्येम्मा च्यीक थो़न्दी, हुङगीनगो ङी थोजुङ। होदेला लुक्टुगी च्योक्रे राक्योक ॱङी दुक हीना डुक च्योक्रे लाब ताङी। 12 होदेगी सेम्चेन धाङपोगी छापला, खी़ वाङ घीरी भो़चे झ्यीदालाक धेनी साश्यी धाङ दुरु हो़गीन घीरीला, ॱमा छाप्क्षे सो़सागो सेम्चेन धाङपोगोला, क्षाक्क्षो़पा पुरु च्युक्वालाक। 13 धेनी मीक्याई थोङसारु ॱनामने, साला मे पाप्कीन च्योक्रे, ॱहाङसागीन ताक क्षेक्या होदेगी तो़न्बालाक। 14 धेनी सेम्चेन धाङपोगी छापला ॱहाङसागीन ताकक्या तो़न्येगी नी़थु, खोला तेर हो़तालाक धेनी दी थोक्ने, होदेगी साश्यीगी मीक्याला ॱली़वालाक। धेनी राल्डीगी ॱमा शो़रीया सो़न्पो झ्युजा सेम्चेन धाङपोला, ॱमीक्ती कु शोयेला होदेगी मीक्याला कुवालाक। 15 धेनी होदे कुगो लाब ताङ थुक्कीन झ्युङये धाङ होदेला क्षाक्क्षो़पा ॱमीपुगीन घीरी सेदु च्युक्येगी क्षीला, होदे सेम्चेन धाङपोगी कुला उप तेरयेगी नी़थु, होदे सेम्चेन ॱङीवागोला तेर हो़तालाक। 16 धेनी होदेगी च्युङा धाङ क्षे धेनी क्षुक्पु धाङ उटे धेनी राङवाङ हो़गीन धाङ ढेन्योक घीरीला, खुङक्याई लाक्पा ॱये याङना टाल्लेला ताक ग्याप्तु च्युक्पालाक। 17 धेनी होदे ताक दे मेताला सी़या ङ्यो-चोङ झ्यी ॱमेछोक्वालाक। होदे ताकगो, होदे सेम्चेन धाङपोगी मीङ याङना होदेगी मीङगी ढाङगा लाक। 18 दो़न दे ॱहाघोरयेगी स्येराप घोयेदुक। स्येराप हो़गीनगी, होदे सेम्चेनगी ढाङगागो ची ग्याप्घो़ घीझ्येरी ॱनाना होदे नी, मी च्यीकगी ढाङगा लाक। धेनी ढाङगागो ६६६ लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.