फीलीप्पीपा 2 - ॱलोवामास्यीका च्योक्रे ॱङ्यामच्युङ झ्युङयेगी पे 1 होझ्येरी मास्यीकागी नाङ खेक्याला सेमस्युक रे हो़ना, झाम्पे सेम्सो रे हो़ना धेनी धाम्पे थुक्ङीगी थी़न्डील हो़ना धेनी झाम धाङ ॱङीङजे हो़ना, 2 खेक्या साम्लो च्यीक्पा तारी, च्यीकगी च्यीकला चेवा च्यीक्पा झ्येरी, सेमने साम्लो च्यीकला थी़न्दी, ङी घाटो खाङदु च्युक। 3 राङगी दो़पा काङयेगी ॱमीक्यु याङना ङोम्सेमगी थोक्ने, घीया माझ्यी हीना ॱङ्यामच्युङ झ्युरी च्यीकगी च्यीकला राङने क्षे ची। 4 राङगी दो़न्दाक च्यीगा ॱमाचा हीना मी श्येम्माक्याई दो़न्दाक्याला तो़। 5 खेक्याई साम्लोगोवाः मास्यीका येशुगी नाङ हो़गीन च्योक्रे झ्युङघो़। 6 खोङ को़न्क्षोकगी स्यीकाला झ्येरीयाः, को़न्क्षोक ढाडा चीयेगी लाबला शीम्दी माश्युक। 7 हीना राङला तोङबा जेदी, ढेन्योकगी स्यीका ॱनुम्दी, मीगी ली़ला ठुङ। 8 धेनी मीगी स्यीकाला झ्युरी, राङला ॱङ्यामच्युङ जेदी, छीवा थुक्पे च्यीगा मेन्दा, ग्याङस्यीङगी छीवा थुक्पे, को़न्क्षोकगी काला ङेन। 9 होझ्येरी को़न्क्षोकगी खोङला ॱमीच्यीकी थोवा जेदी, छेन घीरीने थोस्योक हीन्गीन, छेनगो खोङला ॱनाङ। 10 होझ्येरी ॱनाम धाङ सा धेनी सा तीङला हो़गीन घीरीगी, येशुगी छेनला पीमु चुक्ती क्षाक छाघो़। 11 धेनी याप को़न्क्षोकला शीजे हुङयेगी क्षीदु, येशु मास्यीकाराङ चोवो हीन ॱनेरी, च्येमो हो़लेगी खेलेन झ्यीगीलाक। जीक्तेनदु हो़ च्योक्रे स्यारये 12 होझ्येरी ङी चेवेक्याओ, खेक्याई च्योई ङी खाला ङेन्गीन च्योक्रे, ङा हो़ती घाङला च्यीगा मेन्दा, हीना देले ल्हाक ङा मेताराङ, खेक्या जीक्नाङ धाङ घुस्यापगी थोक्ने, राङगी थारपागी क्षीला काल्ले ग्योप। 13 घीझ्येरी ॱनाना को़न्क्षोकगी थुकोङ शाङागी क्षीला, खेक्या दो़पा धाङ लेगा ॱङीगारा झ्यीयेला, को़न्क्षोकगीराङ, खेक्या नाङ क्षाक्ले जेदालाक। 14 हुदुक याङना चो़लीङ मीझ्यीदा लेगा घीरी झ्यी। 15 धेनी खेक्या क्यो़न मेगीन धाङ चाङमा झ्युरी, दे मेढाङा धाङ दुकच्याक मीरापगी खोक्दु, क्यो़न मेगीन को़न्क्षोकगी से धाङ सेमो झ्युङास्योक। धेनी खेक्या जीक्तेनदु खुङक्या खोक्दु ॱनामगी कारमाक्या च्योक्रे स्यारती, 16 छेसोकगी काला तेन्पो झ्येरी, शीम्दी धो़क। धेनी ङा ॱहाला-छुला ग्युक्कीन धाङ काल्ले ग्याप्कीनगो दो़न्मेदु ॱमासोजुङ, ॱनेरी ङा मास्यीकागी ङीमाला ङोम्सो झ्यीये राक्कीलाक। 17 हीना खेक्याई धेपागी क्षो़पा धाङ ॱङीङकुर डुप्येगी क्षीला, ङी ठाक नी सेरकेम च्योक्रे फी़ घोये हीन्ना, ङा ङ्यामो घी धेनी खेक्या घीरीमुला घाटो झ्यीयेहीन। 18 होझ्येरी खेक्याः ङीमुला ङ्यामो घेरी घाटो झ्यी। तीमोथेउ धाङ ईपाप्रोदीतो 19 खेक्याई ॱनेछु घोरती, ङाः ङ्यामो घायेगी क्षीदु, ङा तीमोथेउला खेक्याचारु ग्योक्जे ताङयेगी रेवा दे, चोवो येशुला झ्यीदीहो़क। 20 घीझ्येरी ॱनाना खेक्याई दो़न्दु ॱङोन्ने सेम्डा झ्यीगीन, खो च्योक्रे ङीमुला श्येम्मा सुवाः मेक। 21 मी श्येम्माक्या नी येशु मास्यीकागी दो़नला मेन्दा, राङगी दो़न्दाक च्यीगा चाली। 22 हीना तीमोथेउ नी मी घारे च्यीक ले, ॱनेरी खेक्या स्येलालाक घीझ्येरी ॱनाना भीजा च्यीकगी राङगी आकीला श्याप्ची श्युगीन च्योक्रे, ताम्शाङगी लेगाला खी़ ङीमुला श्याप्ची श्यी़वालाक। 23 होझ्येरी ङाला दुरु घी झ्युङये हीन्गीनगो स्येलुङ मेताला, ङा खोला खीकीचारु झाङयेगी रेवा झ्यीदीहो़क। 24 धेनी ङाः ग्योक्जे हुङये राक्कुलाक ॱनेरी, चोवोला यीच्चे हो़क। 25 हीना ङी पी़न धाङ लेरोक धेनी ॱमाक्रोक धेनी ङी खो़चेक्याला रोवा झ्यीयेला, खेक्याई झाजा खीकी भाङछेन हीन्गीन, ईपाप्रोदीतोला खीकीचारु ॱलोक्ती झाङयेगो गेक्षे दुक ॱनेरी, ङा सामीहो़क। 26 घीझ्येरी ॱनाना खो खेक्या घीरीला ॱमीच्यीकी ढेन्दालाक धेनी खोराङ नागीनगी कोरला खेक्याई घोरती, खो सेम्डा झ्यीदालाक। 27 ॱङोन्नेराङ खो नेरी स्यीगु झ्येवालाक। हीना को़न्क्षोकगी खोला थुक्जे शीया जेपालाक। खोला च्यीगा मालाक हीना ङाला दुङागी खाला दुङा ॱमाफारास्योक ॱनेरी, ङाला थुक्जे शीक्जुङ। 28 होझ्येरी खोला धाब्ले थोरी खेक्या ङ्यामो घाये धाङ ङी दुङागो ङ्युङदु डोवास्योक ॱनेरी, ङा खोला खीकीचारु झाङयेला ॱमीच्यीकी दो़दीहो़क। 29 होझ्येरी चोवोगी नाङदु घाटोगी थोक्ने, खोला फेप्सु श्यी़ धेनी खो च्योक्रे मीक्याला चीकुर झ्यी। 30 घीझ्येरी ॱनाना मास्यीकागी लेगागी दो़नला, खो स्यीलाक झ्येवालाक। खीकी छापला ङाला श्याप्ची श्युयेगी क्षीदु, खी़ खोरी मीछेराङ ङेन्काला ताजुङ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.