फीलीप्पीपा 1 - ॱलोवा1 मास्यीका येशुगी ढेन्योक, पाउलु धाङ तीमोथेउने फीलीप्पीरु हो़गीन, मास्यीका येशुगी नाङ धाम्पे मीक्या धाङ क्षो़छोकगी तातोक्पाक्या धाङ श्याप्तोक्पाक्यामुला घीरीला, 2 होरी याप को़न्क्षोक धाङ चोवो येशु मास्यीकाने, थुक्जे धाङ श्यीदे खेक्याला थोप्पास्योक। काटीन्क्षे धाङ ॱमो़लाम श्युवा 3 खेक्याला ढेन्दी घाङला, ङा नाम्हीना ङी को़न्क्षोकला काटीन्क्षे श्यी़हो़क। 4 ङी ॱमो़लाम घीरीला, खेक्या घीरीगी क्षीदु ङा घाटोगी थोक्ने ॱमो़लाम ग्यावीहो़क। 5 घीझ्येरी ॱनाना मास्यीकागी कोरला ताम्शाङ दे, खेक्यागी गोमा घोरका ङीमाने, धान्दा थुक्पे दे स्येयेला खेक्या ङी रोवा झ्युहो़क। 6 धेनी खीकी नाङ ले शाङा गो चुक्कीन, को़न्क्षोक खोङगीराङ मास्यीका येशु फेप्कीन ङीमा थुक्पे, दी लेगा दे डुप्पा जेगीलाक ॱनेरी, ङा ॱलोते हो़क। 7 खेक्या ङी सेम नाङदु झ्येरी खेक्या घीरीगी कोरला, देरे छोरनाङ केये दे ङी क्षीदु धेन्पा दुक। ङा चो़न्खाङदु हो़ती घाङला याङना ताम्शाङला ॱरुङक्योप धाङ धेन्पाङ झ्यीदी घाङला, खेक्या घीरी ङीमुला को़न्क्षोकगी थुक्जे थोप हो़तालाक। 8 मास्यीका येशुगी झाम्पागी थोक्ने, ङा खेक्याला ॱमीच्यीकी थुक्ङी दो़दीक। धेनी देला को़न्क्षोकगी ङाला धेन्पाङ जेदालाक। 9 ङी ॱमो़लाम ग्याप्कीनगी दो़न नी, खेक्याई झाम्पा नी स्येराप धाङ स्येयो़न घीरीगी थोक्ने माङदु-माङदु फेरी, 10 खेक्याई शाङा घी हीन्गीनगो, दाम थुक्वा धाङ मास्यीकागी ङीमा थुक्पे चाङमा धाङ क्यो़न मेगीन हुङवास्योक। 11 धेनी को़न्क्षोकगी शीजे धाङ तो़पागी क्षीदु, येशु मास्यीकागी थोक्ने थोप्कीन ढाङतेनगी ढेबुगी, खेक्या खाङास्योक। ताम्शाङ फेगीनगी कोर 12 पी़नक्याओ, ङाला घी झ्युझ्यागी़ ॱङोन्ने झ्यीना, ताम्शाङ फेयेला फेन थोक्पालाक, ॱनेरी खेक्याई स्येलाझ्यी ॱनेरी ङा दो़दीहो़क। 13 दी दोक्पो नी, फोडाङगी ॱरुङमाकक्या धाङ श्येम्मा घीरीला ङा मास्यीकागी दो़नला, चो़न्खाङदु छी़गीनगो सावो झ्युदुक। 14 धेनी ङा चो़न्खाङदु छी़गीनगी झ्येरी, पी़न माङक्षे चोवोगी नाङ ॱलोतेक्षे धाङ मीजीया ताम्शाङ स्येयेला, ॱलोगोक क्षे झ्युदुक। 15 मी रीङगा ठादोक धाङ ढेन्दुरगी झ्येरी, मास्यीकागी कोरला क्षो़ स्येदालाक हीना श्येम्माक्या सेम ढाङपोगी थोक्ने स्येदालाक। 16 धेनी देक्याई झाम्पागी थोक्ने, क्षो़ स्येदालाक घीझ्येरी ॱनाना ङा ताम्शाङगी ॱरुङक्योप झ्यीयेगी क्षीला, दुरु हो़गीनगो खुङक्याई स्येलालाक। 17 हीना ङाला चो़न्खाङदु दुक्पु ताङयेगी साम्लो तारी, ढेन्दुर झ्यीगीनक्याई सेम ढाङपोगी थोक्ने मेन्दा, राङगी दो़पा काङयेगी क्षीदु क्षो़ स्येदालाक। 18 धा घीहीन्ना, ढाङपो थोक्ने हीन्ना लाक याङना मेढाङा थोक्ने हीन्ना लाक, चोगो घीरीगी थोक्ने मास्यीकागी क्षो़ स्येदुक। होझ्येरी देलाराङ ङा ङ्यामो घी। धेनी ङा ङ्यामो घायेहीन, 19 घीझ्येरी ॱनाना खेक्याई ॱमो़लाम धाङ येशु मास्यीकागी थुक्ङीगी रोक्रामने, ङाला घी झ्युङगीनगो ङी थारपागी क्षीदु झ्युङगीलाक ॱनेरी, ङाला स्येयेहो़क। 20 ङी सेम नाङगी दो़पा धाङ रेवा नी, ङाला ङोजा पाप्कीन घाने मीझ्युङवा, हीना ॱङीङक्षे झ्युरी सो़न्पो याङना छीवा हो़ना, ङी ली़ नाङ च्योक्ई च्योक्रे, धान्दा मास्यीकागी घुस्याप झ्युङये लाक। 21 घीझ्येरी ॱनाना ङी क्षीदु सो़न्पो धेयेगी दो़न नी, मास्यीका लाक धेनी छीवा नी खेब्साङ लाक। 22 धा ङा ली़ला सो़न्पो धेये हीन्ना, होदे ङी क्षीदु दोक्पो हो़गीन काल्ले झ्युङगीलाक। घीहीन्ना ङा घी दाम घोयेगो ङी ॱमेस्येहो़क। 23 ङा दे ॱङीउगी खोक्दु छी़दी धेहो़क। ङा दे जीक्तेनने दारी, मास्यीकामुला झ्युङयेगो ङी दो़पा हो़क घीझ्येरी ॱनाना दे ॱमीच्यीकी घा दुक। 24 हीना खेक्याई क्षीदु, ङा ली़ला धे घोयेगो ॱयोल्ले गेक्षे दुक। 25 दे लाबला ङा तेन्दा झ्युरी ॱनाहीन। ङा सो़न्पो धेगुलाक धेनी खेक्या धेपागी नाङ यारके डोये धाङ घाटो झ्युङयेगी क्षीदु, ङा खेक्या घीरीमुला च्योई धेगुलाक ॱनेरी ङाला स्येयेहो़क। 26 होझ्येरी ङा खीकीचारु धाब्ले हुङी घाङला, ङी केनगी खेक्याला मास्यीका येशु खाला ङोम्सो झ्यीयेगी दो़न माङा थोप्कीलाक। 27 खेक्याई मीछेगी चो़लामगो, मास्यीकागी ताम्शाङला थी़न्गीन हुङघो़। धेनी ङा होरी खेक्याला थुक्ना याङना ङा मेनाः, खेक्या थुक्ङी च्यीकला तेन्पो ॱनेगीन धाङ धेनी ताम्शाङगी धेपागी क्षीला, खेक्या सेम्ङी च्यीक झ्युरी काल्ले ग्याप्कीन धाङ 28 खीकी ग्याप्केलला मेगीनक्यामुला घीन्गी थोक्नेयाः, मीजीक्कीनगो ङी घोरास्योक। दे नी, खुङक्याला खोराङक्याई तोरस्यीक धाङ खेक्याला खेरी थारपागी ताक लाक धेनी दे ताक दे को़न्क्षोकने लाक। 29 घीझ्येरी ॱनाना खेक्याला मास्यीकाला धेपा झ्यीये च्यीगा मेन्दा, खोङगी दो़नला दुक्पु ङ्याङयेगी थोप्ताङगोवाः ॱनाङ हो़तालाक। 30 धेनी खेक्याई ङी ङ्याङगीन दुक्पुगो, थोङ ङ्युङालाक धेनी धान्दा ङी ङ्याङगीनगो खीकी घोरालाक। दे दुक्पु देराङ खेक्याः ङ्याङी हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.