मारकु 6 - ॱलोवानाजारेतदु येशुला ङो ॱलोक्पा ( मेथा १३:५३-५८ ; लुका ४:१६-३० ) 1 येशु होदेने थो़न जेदी, राङगी फायुला फेप्पालाक धेनी खोङबागी ङेनेक्या खोङबामुला डावालाक। 2 ङासुगीन ङीमागोला छोक्खाङ नाङदु, खोङबागी क्षो़ तो़न्ये गो चुक्पालाक धेनी खोङबाला ङेन्गीन माङक्षे ॱहालेरी ॱनेवालाक, “दे मीला दे घीरी घाने थोप्पाले? खोला थोप्था स्येराप दे घी ले? खी़ लाक्पाने देरे ॱहाङसागीन लेगाक्या घाङ झ्येरी झ्युवाले? 3 दे मीरीयामगी भीजा, याकोब धाङ योसेफ धाङ युदा धाङ सीमोनगी आज्यो, होदे स्यीङचोवागो माले? धेनी खी़ नुमोक्या होराङमुला दुरु हो़तामाले?” धेनी खुङक्याई खोङबाला ङो ॱलोक्पालाक। 4 धेनी येशुगी सुवालाक, “ॱङो़नस्येखेन च्यीकला, राङगी यु धाङ राङगी पी़न्दाक्या धाङ राङगी नाङदु माना श्येम्मा घीरीरु घुस्याप झ्यीदालाक।” 5 येशुगी नेपा तीते च्यीकला क्षाक श्याक्ती, चो़गा जेपालाक। होदे माना खोङबागी श्येम्मा ॱहालेगीन क्षाक्ले जे ॱमाथुक्पालाक। 6 खुङक्याई धेपा मेगीनगो शीक्ती, येशु ॱहालेवालाक। धेनी खोङबा यु-युक्याला फेप्ती, क्षो़ ॱनाङा जेपालाक। ङेने च्युङङीला झावा ( मेथा १०:५-१५ ; लुका ९:१-६ ) 7 येशुगी ङेने च्युङङीक्याला खोराङचारु भो़री, ॱनो़पाक्या खाला आङजा ॱनारी, देक्याला ॱङी-ॱङी झ्येरी झाङयेला गो चुक्पालाक। 8 येशुगी खुङक्याला देरे का ॱनावालाक, “ख्यो़री ढुला भेक्योक माना, शामा धाङ खुमाक धाङ केराकला आले टीरी ॱमाखेर, 9 हीना शो़म्बा घो़न धेनी यालीङ घोलाक ॱमाखेर।” 10 येशुगी खुङक्याला सुवालाक, “खेक्या होदे युने माडोगीन थुक्पे, खेक्या जुजा नाङदुराङ धो़क। 11 धेनी साजा घारेदु खेक्याला फेप्सु माझ्येवा, खीकी लाबला माङेन्ना, खेक्या होदेने डी़ घाङला, खुङक्याला पाङपो हुङयेला, खेरी काङबी थालाक्या ॱरुक।” 12 धेनी खुङक्या होदेने सोरी मीक्याला धीक्पा पारी, सेम ग्युर घो़गीलाक ॱनेरी क्षो़ ॱलाप्पालाक। 13 धेनी खुङक्याई ॱमीच्यीकी माङा डेक्या तो़न्बालाक धेनी नेपाक्याला ॱनुम ढी़री चो़गा झ्येवालाक। ठी़सो़ ॱनाङगीन योहान्ना सेपा ( मेथा १४:१-१२ ; लुका ९:७-९ ) 14 येशुगी छेन घीरीदु ख्याप्ती, ग्यावु हेरोदेगीयाः खोङबागी कोरला ॱहाघोरपालाक। रीङगागी, “ठी़सो़ ॱनाङगीन योहान्ना ढोरीयाः सो़न्पो लाङदुक होझ्येरी खो देरे ॱहाङसागीन लेगा झ्यी थुक्वालाक।” ॱनेरी ॱनेवालाक। 15 हीना श्येम्माक्याई, “खो नी ॱङो़नस्येखेन एलीया लाक।” ॱनेरी ॱनेवालाक। धेनी धोराङा श्येम्माक्याई, “खो नी धाङबी ॱङो़नस्येखेनक्या च्योक्रे ॱङो़नस्येखेन च्यीक लाक।” ॱनेरी ॱनेवालाक। 16 हीना हेरोदेगी दे घोरी घाङला, खी़ देरे ॱनेवालाक, “गो च्येदी ङी सेसापा, योहान्नागो सो़न्दी लाङदुक।” 17 हेरोदेगी खोरी नो फीलीपगी केमी, हेरोदीयास खोरी केमी शो़वालाक। धेनी मी़ क्षीला खोरी मीक्या झारी, योहान्नाला शीम्दु चुक्ती, चो़न्खाङ नाङदु धाक्पालाक। 18 घीझ्येरी ॱनाना योहान्नागी हेरोदेला, “ख्यो़री नोगी केमीमुला धे मेछोक्कीलाक।” ॱनेरी ॱनाजीङ झ्येवालाक। 19 होझ्येरी हेरोदीयासगी राङ सेम नाङदु योहान्नागी क्षीला, ॱमीच्यीकी ॱङीङनाक शीम्दी धेपालाक धेनी खो सेङी दो़पालाक हीना मी़ से ॱमाथुक्पालाक। 20 घीझ्येरी ॱनाना हेरोदेगी योहान्ना मी ढाङपो च्यीक धाङ धाम्पे मी च्यीक लाक ॱनेरी स्येरी, खोला जीक्ती क्योप्ती श्याक्पालाक। योहान्नागी लाबला ङेन्दी घाङला, खो ॱमीच्यीकी गो खोरालाक हीना खो ङ्यामो घेरी ङेन्दालाक। 21 हेरोदे केगीन ङीमागी़ धी़छेनला, खोरी श्युङगी पो़न्पोक्या धाङ ॱमाक्पो़नक्या धाङ गालीलगी, मी क्षेक्याला डो़न कावालाक। होदे धी़चो़ला हेरोदीयासला घोकाप जोरपालाक। 22 हेरोदीयासगी भोमो होरी घार चेरी, हेरोदे धाङ खी़ डो़न्बोक्याला ङ्यामो घारु च्युक्पालाक। होदे घाङला ग्यावुगी़ भोमोला ॱनेवालाक, “ख्यो़ला घी दो़गीनगो ङाला ॱलोङ धेनी होदेगो ङी ख्यो़ला तेरो।” 23 धेनी “ख्यी़ घी ॱलोङना, ङी ख्यो़ला तेरो। ङी ग्याखापगी फे ॱलोङना होदेयाः तेरु” ॱनेरी खी़ मोला ॱना क्यावालाक। 24 धेनी मो फीला सोरी, मोरी आमाला, “ङा घी ॱलाङगी़?” ॱनेरी ढीवालाक। मी़ “ठी़सो़ ॱनाङगीन योहान्नागी गोवागो ॱलोङ।” ॱनेरी ॱनेवालाक। 25 धेनी मो लाम्साङ ॱमीच्यीकी ढेला झ्येरी, नाङदु ग्यावुचारु होरी ॱनेवालाक, “धान्दाराङ ङाला ठी़सो़ ॱनाङगीन योहान्नागी गोवागो, देरमा नाङदु ॱनाङरोझ्यी ॱनेरी, ङा श्यी़लाहीन।” 26 ग्यावुगो ॱमीच्यीकी सेम फाम्बालाक हीना खोरी ॱना क्यागीन धाङ डो़न्बो झ्येरी, मी़ श्यी़गीन लाबला ङोलोक ॱमाथुक्पालाक। 27 धेनी लाम्साङ ग्यावुगी ॱमाक्मी च्यीकला, योहान्नागी गोवा च्येदी खेरती हुङयेला झावालाक। धेनी खो सोरी, चो़न्खाङ नाङदुराङ योहान्नागी गोवा च्येपालाक। 28 धेनी थीलीङ च्यीक नाङदु, खी़ गोवा खेरती होरी, भोमोगोला तेरपालाक। भोमोगी़ मोरी आमाला होदे तेरपालाक। 29 धेनी योहान्नागी ङेनेक्याई होदे घोरती, खुङक्या होरी खी़ फुङबुगो खेरती, धी़ठोदु श्याक्पालाक। येशुगी मी ॱङातोङला श्येलाक ॱनाङवा ( मेथा १४:१३-२१ ; लुका ९:१०-१७ ; योहान्ना ६:१-१४ ) 30 कुछापक्या येशुचारु लोक्पालाक धेनी खोराङक्याई घी झ्यीगीन धाङ ॱलाप्कीन घीरी, खोङबाला स्येपालाक। 31 धेनी येशुगी खुङक्याला सुवालाक, “खेक्या ङीमुला साज्या एन्दा च्यीकला डो धेनी तीते च्यीक ङासी़।” घीझ्येरी ॱनाना होदुरु मी हुङगीन धाङ डुगीन माङा झ्युवालाक धेनी खोङबाक्याला श्येलाक छो़लोङ माझ्युवालाक। 32 होझ्येरी खोङबाक्याराङ डु श्यो़न्दी, साज्या एन्दा च्यीकला फेप्पालाक। 33 हीना मी माङक्षेगी खोङबाक्या फेप्कीनगो थोरी, खोङबाक्या ङोस्येरी ग्याजा घीरीने मीक्या घोबा चुक्ती, भाङ तारी सोरी खोङबाक्यालाः एन्ला होदुरु ॱलेप्पालाक। 34 येशु डुने थो़न्दाराङ मीछोक क्षे च्यीक झीउ मेगीन लुकक्या च्योक्रे शीक्ती, खुङक्याला ॱङीङजे केवालाक। धेनी खुङक्याला क्षो़ ॱमीच्यीकी माङा ॱलाबा जेपालाक। 35 धेनी ङीमा फेप्कु झ्यीदी घाङला, खोङबागी ङेनेक्या खोङबाचारु होरी ॱनेवालाक, “दे साज्या दे थाक्रीङा साज्या च्यीक लाक धेनी धी़चो़गोवा ॱमीच्यीकी फीसादुक। 36 देक्याला साज्या ङ्येक्या धाङ यु ङ्येक्याला झारी खोराङक्याला शाये रे, ङ्योरु डोयेला घोङपा जेरोझ्यी।” 37 हीना येशुगी खुङक्याला लेन ग्यावा जेपालाक, “खेक्याराङ खुङक्याला शाये रे तेर।” धेनी खुङक्याई खोङबाला ॱनेवालाक, “हेक्या सोरी दीनारी ङीग्या चो़गी ग्याङगा ङ्यो़री, खुङक्याला शाये तेरये?” 38 “खेक्याला ग्याङगा घाजो़ हो़तो? सोरी तो़।” सुरी खोङबागी सुवालाक। धेनी खुङक्याई तेरी होरी ॱनेवालाक, “ग्याङगा ॱङा धाङ ङ्या ॱङी दुक।” 39 धेनी येशुगी मीक्याला छोखाक-छोखाक झ्येरी, पाङ ॱङोम्पोला धेयेला का ॱनावालाक। 40 होझ्येरी खुङक्या ग्या-ग्या धाङ ॱङापच्यु-ॱङापच्युगी छोखाक झ्येरी धेपालाक। 41 धेनी खोङबागी ग्याङगा ॱङा धाङ ङ्या ॱङीगो क्षाकदु ॱनुम्दी, नाम्खाला शीक्ती झ्यीलाप जेदी ग्याङगागो च्या जेपालाक। धेनी मीमाङक्याला घोयेला ङेनेक्याला ॱनावालाक। धेनी ङ्या ॱङीगोवा घीरीला घो़वालाक। 42 खुङ घीरीगी डागीन थुक्पे शेवालाक। 43 धेनी ग्याङगा धाङ ङ्या ल्हाक्माक्या बाक्ता च्युङङी, गाङ-गाङ ङेनेक्याई धी़वालाक। 44 ग्याङगा शागीनक्याने केवे-फो ॱङातोङ हो़तालाक। येशु क्षुखाला फेप्पा ( मेथा १४:२२-३६ ; योहान्ना ६:१५-२१ ) 45 लाम्साङ येशुगी मीछोकक्याला घोङपा ॱनाङी घाङला, खोराङगी ङेनेक्याला डु श्यो़न्दी, राङने एन्ला ॱहाकीनला बेथसेदारु सोङ सुवालाक। 46 धेनी मीछोकक्याला तारी, खोङबा रीला ॱमो़लाम श्युरु फेप्पालाक। 47 ॱरो रुई घाङला डुगो ग्याछो घुङला हो़तालाक धेनी खोङबा च्यीगा सा खाला श्युक हो़तालाक। 48 धेनी ॱलुङबुगो दोङने खुङक्या स्योकला ग्याप्ती, खुङक्या डु ताङयेला हुदुक्ती धेगीनगो खोङबागी शीक्पालाक। धेनी ॱनाम शारा-शीरीला येशु खुङक्या स्योकला, क्षुखाला श्याप चुक्ती फेप्पालाक। खोङबा खुङक्या स्योकने फेप्ये जेपालाक 49 हीना खुङक्याई खोङबा क्षुखाला श्याप चुक्कीन थोरी, खोङबा धी़क हीन्ढु ॱनेरी फेरा ग्याप्पालाक। 50 घीझ्येरी ॱनाना खुङ घीरीगी खोङबाला थोवालाक धेनी जीक्पालाक। हीना खोङबागी लाम्साङ खुङक्याला सुवालाक, “सेम ल्हो़ झ्यी। ङा हीन, खेक्या माजीक।” 51 धेनी खोङबा खुङक्यामुला डु नाङदु फेप्पालाक धेनी ॱलुङबुगो छो़पालाक। खुङक्या ॱमीच्यीकी ॱहाङसावालाक। 52 धेनी खुङक्याई सेमगो ॱरा झ्युरी होदे ग्याङगा तेरकीन, ॱहाङसागीन लेगागी दो़न्दाकगो ॱहामाघोरपालाक। 53 खोङबाक्या ग्याछो थारसारती, गेन्नेसारेत युदु फेप्पालाक। होदुरु डुगो छो डामला ताक्पालाक। 54 खोङबाक्या डुने फीला फेई घाङला, मीक्याई येशुला लाम्साङ ङोस्येरी 55 मीक्या युछोक घीरीदु भाङ तारी सोरी, नेपाक्याला ङ्याजेमुलाराङ खोङबा घारु श्युक्दो ॱनेरी घोरजारु, खेरती हुङये गो चुक्पालाक। 56 धेनी यु धाङ ग्याजा धाङ साज्या घारु खोङबा फेई, होदुरु खुङक्याई ठोम्साक्याला मी नेपाक्या श्यालाक। धेनी खोङबागी नाशागी थामा च्यीगा हीन्ना, जुरु च्युक्रोझ्यी, ॱनेरी श्योवा पुवालाक धेनी जुगीन घीरी ढाक्पालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.