मारकु 13 - ॱलोवाक्षो़खाङ मेताला ताङगीन कोरला ॱङोनस्ये ( मेथा २४:१-२४ ; लुका २१:५-१९ ) 1 धेनी क्षो़खाङ नाङने, येशु फीला फेई घाङला, खोङबागी ङेने च्यीकगी ॱनेवालाक, “ॱलोपो़न ला शीक्रोनाङ, दुरु घीन्गी क्षे धोगोङक्या धाङ खाङबा जेवाक्या दुक।” 2 येशुगी सुवालाक, “खेक्या दे खाङबा खाक्क्षेक्या थोङी? हीना दुरु धोगोङ च्यीकगी खाला श्येम्मा च्यीया ल्हाक्कीमालाक। धोगोङ घीरी ॱलोक्ती ॱयुक्कीलाक।” 3 येशु क्षो़खाङगी दोङला हो़गीन, क्युरुस्यीङगी रीला श्युक हो़तालाक। धेनी पेटो, याकोब धाङ योहान्नागी खोङबाला शुरला खाबा श्यी़वालाक, 4 “हेक्याला सुङरोनाङ, दे घीरी नाम झ्युङगीले? धेनी खोङबागी सुङगीन दे डुप्कीलाक ॱनेरी, हेक्याला ताकगो घी झ्युङगीले?” 5 येशुगी सुवालाक, “चाङजे झ्यी, मी सी़या खेक्याला गो ॱमाकोरास्योक। 6 घीझ्येरी ॱनाना ङी मीङने, ‘ङा मास्यीका हीन’ ॱनेरी ॱमीच्यीकी माङा हुङगीलाक धेनी खुङक्याई मी ॱमीच्यीकी माङाला गो कोरकीलाक। 7 धेनी ॱमाक्ठुक धाङ ॱमाकगी लाबक्या खेक्याई घोरकीलाक हीना माजीक। दे लाबक्या झ्युङ घो़गीलाक हीना होदे थागी धी़चो़गो मालाक। 8 घीझ्येरी ॱनाना मीरीक-मीरीकगी नाङदु धेनी ग्याखाप-ग्याखापगी नाङदु ॱमाक ठुक्कीलाक। साज्या ॱमीच्यीकी माङाला, सायोम हुङगीलाक धेनी मुगेला स्योरकीलाक। देक्या नी, केशुकगी गोमागो च्योक्रे लाक। 9 “खेक्या चाङजे झ्येरी धो़क घीझ्येरी ॱनाना मीक्याई खेक्याला शीम्दी, ठीम्खाङक्याला ठीक्कीलाक धेनी छोक्खाङक्याला ठीक्ती दुङगीलाक। धेनी ङी क्षीला खुङक्याला पाङपो तो़न्येला, खेक्या पो़न्पोक्या धाङ ग्यावुक्या दोङदु लाङ घो़गीलाक। 10 धेनी थागी धी़चो़ हुङये एन्ला, ताम्शाङ दे मीरीक घीरीला स्येघो़गीलाक। 11 मीक्याई खेक्याला शीम्दी ठीम चेजारु ठीक्ती ठीम श्यी़ना, होदे घाङला घी ॱनाये ॱनेरी, एन्दुरु दुङा माझ्यी हीना होदे धी़चो़ला घी ॱनायेला तेरी, होदे ॱनो़ घीझ्येरी ॱनाना होदे ॱनागीनगो ख्यो़ मालाक हीना धाम्पे थुक्ङी लाक। 12 “होदे घाङला आज्योगी नोला सेदु च्युक्कीलाक धेनी आकीगी खोरी भीजाला सेदु चुक्कीलाक। धेनी टुवाक्या राङ फामागी डाला लाङगीलाक धेनी फामाला स्यीरु च्युक्कीलाक। 13 धेनी ङी मीङगी क्षीला खेक्याला, मी घीरीगी थेदा मीझ्यीगीलाक। हीना थागी धी़चो़ थुक्पे शो़पा झ्येरी धेगीनक्या क्योप्कीलाक।” दुक्ङेल क्षे हुङगीन धी़चो़ ( मेथा २४:१५-२८ ; लुका २१:२०-२४ ) 14 “हुङयेराङ मेगीन साज्याला, खेक्याई ॱमीच्यीकी आम्लोवा क्यो़न ताङगीन ॱमेचाङा च्यीक लारी धेता थोङगीलाक (दी दो़न ढोक्कीनक्याई ॱहाघोरास्योक)। होदे घाङला, युदेयाला हो़गीनक्या रीक्या स्योकला डो़री डोवास्योक। 15 खाङबागी थोकला हो़गीनक्या माला माभावास्योक धेनी नाङदु जुरी च्यालाकक्या तो़न्दु माडोवास्योक। 16 श्यीङला हो़गीनक्या राङगी घो़ लेन्दु लोक्ती माडोवास्योक। 17 हीना होदे घाङला, फोवाला टु हो़गीन धाङ होमा तेरकीन केमीक्याला ॱङ्यावाली। 18 दे लाबक्या घुङगा माझ्युङास्योक ॱनेरी, ॱमो़लाम ग्योप। 19 घीझ्येरी ॱनाना होदे घाङला, को़न्क्षोकगी को़पागी गोमाने धान्दा थुक्पे हुङ माङ्युङगीन, दुक्पु क्षे हुङगीलाक धेनी देरे दुक्पु याङ नामा हुङगीमालाक। 20 धेनी को़न्क्षोकगी होदे ङीमागी़ ढाङगा ङ्युङदु ॱमाता हो़ना, मी च्यीया सो़न्पो लेगीमालाक हीना खोङबागी दाम्दा मीक्याई क्षीला, होदे ङीमागी ढाङगा ङ्युङदु ताङा जे हो़तालाक। 21 “धेनी मी रीङगागी खेक्याला, ‘तो़, दुरु मास्यीका दुक’ याङमेना ‘तो़, खोङबा हुरु दुक।’ ॱनेरी ॱनाना खेक्या धेपा माझ्यी। 22 मास्यीका शोक्पोक्या धाङ ॱङो़नस्येखेन शोक्पोक्या थो़न्गीलाक धेनी ॱहाङसागीन ताक धाङ लेगाक्या तो़न्दी, घी थुप्तु को़न्क्षोकगी दाम्दाक्याला गो कोरकीलाक। 23 हीना खेक्या चाङजे झ्यी। ङी खेक्याला लाब घीरी एन्दुरु ॱनेरी श्याक हो़क। 24 “हीना होदे दुक्पु क्षेगी धी़चो़ स्याम्ने, ङीमा मी़नाक झ्युङगीलाक धेनी दावागी हो़ मेगीन झ्युङगीलाक। 25 धेनी ॱनामने कारमाक्या ल्हीम्गीलाक धेनी ॱनामगी स्युकक्या ठुक्कीलाक। 26 धेनी मी-भु ॱरीङगी खोकला ॱमीच्यीकी क्षे वाङ धाङ शीजेला फेप्कीनगो थोङगीलाक। 27 धेनी खोङबागी खोरी भाङछेनक्या झाङगीलाक धेनी जाम्बुलीङगी थामाने, ॱनामगी थामा थुक्पे क्षोक श्यीने राङगी दाम्दा मीक्याला धुगीलाक।” सेयापगी दोङबोने ॱलापच्या ( मेथा २४:३२-३५ ; लुका २१:२९-३३ ) 28 येशुगी याङ सुवालाक, “सेयापगी दोङबोने ॱलापच्या लेन। दी यारकाक्या ङेन्पो झ्युरी लोमाक्या थो़न्लुङ मेताला, धा ॱयाक्का स्यारये झ्यीदी ॱनेरी खेक्याई ॱहाघोरालाक। 29 होझ्येरीराङ ङी ॱनागीन लाब देक्या झ्युङी घाङला, ङा हुङगीन धी़चो़ ॱलेप्जुङ, घोच्चारु ॱलेप्जुङ ॱनेरी ॱहाघोरा झ्यी। 30 ॱङोन्नेराङ ङा खेक्याला ॱनाहीन, दे घीरी माडुप्कीन थुक्पे दे मीराप दे जोक्कीमालाक। 31 नाम्खे श्यीङखाम धाङ जाम्बुलीङ येरी डुगीलाक, हीना ङी का नामा येगीमालाक।” चाङजे झ्येरी धे घो़गीन ( मेथा २४:३६-४४ ; लुका १२:३८ , ४० ) 32 “हीना होदे ङीमा धाङ धी़चो़गी कोरला सुलाः क्षा मेतालाक। यापला माना, नाम्खे श्यीङखामदु हो़गीन को़न्क्षोकगी भाङछेनक्या धाङ को़न्क्षोकगी सेलाः क्षा मेतालाक। 33 होदे धी़चो़ नाम हुङगुलाक ॱनेरी, खेक्याला क्षा मेगीन झ्येरी, चाङजे झ्येरी ॱङी मालोक्वा धो़क। 34 दे नी मी च्यीक खोरी नाङ ॱयोक्पोक्याला ची ग्याप्ती, खोराङ ढु ग्याप्तु डुगीन च्योक्रे लाक। दाक्पोगी़ खोरी ॱयोक्पोक्याला मीरी-मीरी लेगा कुरी, धेनी घोरेगोला ॱङी मालोक्वा धो़क ॱनागीलाक। 35 होझ्येरी ॱङी मालोक्वा धो़क घीझ्येरी ॱनाना नाङगी दाक्पो घोमु छेनगी तीक-तीक याङमेना झ्या केक ग्याई घाङला याङमेना ॱङारोक हुङये हीन्गीन ॱनेरी, नाम लोक्कीनगो ख्यो़ला क्षा मेयोङालाक 36 धेनी ॱहाताक्पाला हुङी घाङला, खी़ खेक्या ॱङी लोक्ती धेगीन ॱमाथुक्वास्योक। 37 खेक्याला ॱनागीन च्योक्रे ङा मी घीरीला ॱनाहीन, ॱङी मालोक्वा धो़क।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.