मारकु 10 - ॱलोवानाङजाङ खा डागीनगी कोरला ( मेथा १९:१-१२ ; लुका १६:१८ ) 1 धेनी येशु होदेने योरदान चाङबु ॱहाकीनगी, युदेया युदु फेप्पालाक। धेनी याङ मीछोक माङा खोङबागी डामदु जोम्बालाक। धेनी च्योई च्योक्रे, खोङबागी खुङक्याला क्षो़ ॱनाङा जेपालाक। 2 फारुसीपा रीङगा होरे, येशुला छो़ता झ्यीयेला देरे ढीवालाक, “केवे ख्योवा च्यीक राङगी केमीमुला, खा डाना क्षो़ठीमला थी़न्दाले?” 3 खोङबागी खुङक्याला सुवालाक, “मोशेगी खेक्याला का घी ॱनाङ हो़ताले?” 4 खुङक्याई ॱनेवालाक, “केवे-फोगी खा डायेगी यीक च्यीक ढीक्ती, मोला भोर छोक्कीलाक ॱनेरी मोशेगी सुदुक।” 5 येशुगी खुङक्याला सुवालाक, “खेक्याई सेम्बा ग्योङा झ्युरी, मोशेगी देरे का ढीक्पालाक। 6 हीना एम्मा जाम्लीङ क्षायी घाङलाराङ, ‘को़न्क्षोकगी मीला फो-मो को़वालाक।’ 7 ‘होझ्येरी केवे-भुगी राङगी फामा भोरती, राङगी केमीमुला थी़न्दी धेतालाक। 8 धेनी खुङ ॱङीउ स्या च्यीकला ग्युरालाक।’ होझ्येरी खुङ ॱङीउ ॱङी मेन्दा च्यीकराङ हीन। 9 होझ्येरी को़न्क्षोकगी च्यीक को़वा जेगीनगो, मीगी खा ॱमाटावा स्योक।” 10 धेनी खीम नाङदु ङेनेक्याई, येशुला दी कोरला याङ ढीवा श्यी़वालाक। 11 खोङबागी खुङक्याला सुवालाक, “केवे ख्यो़वा सु हीन्ना, राङगी केमीमुला खा डारी श्येम्मामुला ॱनामा लेन्ना, होदेगी लोक्येम झ्यीदालाक। 12 धेनी केवे-भोमो राङगी ख्योवामुला खा डारी, श्येम्मामुला डोना, मी़याः लोक्येम झ्यीदालाक।” येशुगी टुवाक्याला झ्यीलाप ॱनाङवा ( मेथा १९:१३-१५ ; लुका १८:१५-१७ ) 13 मीक्याई राङ टुवाक्याला येशुगी क्षाक जेदी, झ्यीलाप ॱनाङास्योक ॱनेरी, खोङबाचारु ठीक्ती होवालाक हीना ङेनेक्याई खुङक्याला आङजी तावालाक। 14 हीना येशुगी होदे शीक्ती, थुक्ठो़ लारी खुङक्याला सुवालाक, “टुवाक्याला ॱमाकाक, ङाचारु हुङदु च्युक घीझ्येरी ॱनाना को़न्क्षोकगी ग्यासी देक्या च्योक्रे, मीक्याई छीला लाक। 15 ङा खेक्याला धेन्पाराङ ॱनाहीन, को़न्क्षोकगी ग्यासीला टु च्यीमे च्यीकगी च्योक्रे खेमेलेन्ना, खो होदे नाङदु डो थुक्कीमालाक।” 16 धेनी येशुगी टुवाक्याला राङगी कुपाङदु ॱनुम्दी, क्षाक श्याक्ती झ्यीलाप ॱनाङा जेपालाक। मी क्षुक्पु च्यीक धाङ को़न्क्षोकगी ग्यासी ( मेथा १९:१६-३० ; लुका १८:१८-३० ) 17 धेनी येशु लाम्गाला फेई घाङला, मी च्यीक भाङ तारी होरी येशुगी डुङदु पीमु साला चुक्ती, खोङबाला श्यी़वालाक, “ॱलोपो़न शाङपो ला, थामेपे छेसोक थोप्येला, ङी घी झ्यी घो़गीले?” 18 धेनी येशुगी खोला सुवालाक, “ख्यो़ ङाला घीझ्येरी शाङपो ॱनाले? को़न्क्षोक च्यीगा माना, श्येम्मा सुवा शाङपो मेतालाक। 19 क्षो़ठीमगी काक्या ख्यो़ला क्षा हो़तालाक, ‘मीगी ॱरोक ॱमाचे धेनी लोक्येम माझ्यी धेनी कुमु ॱमाकु धेनी पाङपो शोक्पो ॱमातेर धेनी गोवा ॱमाकोर धेनी राङगी फामाला चीदोङ झ्यी।’” 20 खी़ खोङबाला ॱनेवालाक, “ॱलोपो़न ला, च्यीमेने ॱहालाराङ दे का दे घीरी ङी ॱरुङहो़क।” 21 धेनी येशुगी खोला शीक्ती, खोला झाम्पा जेदी सुवालाक, “ख्यो़ला धोराङा च्यीक ॱमेछाङा। ख्यो़ सोरी राङला हो़गीन घीरी चोरी, उटेक्याला ज्यीम्बा तोङ धेनी को़न्क्षोकगी ग्यासीदु ख्यो़ला नोर थोप्कीलाक। धेनी होरे, ङी स्याबाला डो।” 22 दे घोरती, खी़ ङोदोङ नाक्पोला ग्युरती, सेम क्यो़री सोवालाक घीझ्येरी ॱनाना खोला ग्युनोर ॱमीच्यीकी माङा हो़तालाक। 23 धेनी येशुगी ॱहाला-छुला शीक्ती, ङेनेक्याला सुवालाक, “मी क्षुक्पुला को़न्क्षोकगी ग्यासी नाङदु डोयेला ॱमीच्यीकी काल्ले दुक।” 24 खोङबागी सुङगीन देला ङेन्दी, ङेनेक्या ॱहालेवालाक। हीना येशुगी खुङक्याला धाब्ले सुवालाक, “टुवाक्याओ, को़न्क्षोकगी ग्यासीला डोये ॱमीच्यीकी काल्ले दुक। 25 मी क्षुक्पु च्यीक को़न्क्षोकगी ग्यासी नाङदु डोयेला ल्हाक, खापगी ॱमीउ नाङने सेम्चेन ॱनाउ जुयेला लेल्हा हो़तालाक।” 26 दे ङेन्दी ङेनेक्या ॱयोल्ले ॱहालेरी, खोङबाला श्यी़वालाक, “धा हीन्ना सुला थारपा थोप्कीले?” 27 येशुगी खुङक्याला शीक्ती सुवालाक, “मीगी क्षीला दे ॱमीथुप्कीलाक हीना को़न्क्षोकने थुप्कीलाक। घीझ्येरी ॱनाना को़न्क्षोकने घीरी डुपालाक।” 28 धेनी पेटोगी खोङबाला ॱनेवालाक, “शीक्रोनाङ, हीकी घीरी भोरती खेराङगी स्याबाला डाहो़क।” 29 येशुगी सुवालाक, “ङा धेन्पाराङ खेक्याला ॱनाहीन, ङा धाङ ताम्शाङगी क्षीला, राङगी खाङबा धाङ पी़नक्या धाङ फामा धाङ टुवाक्या धाङ साश्यीङ भोरकीनगी़, 30 दे छेला दुक्पु मुला-मुला खाङबाक्या धाङ पी़नक्या धाङ फामाक्या धाङ टुवाक्या धाङ साश्यीङ, एम्माले ग्याई माङा थोप्कीलाक धेनी माउपारला थामेपे छेसोक थोप्कीलाक। 31 हीना धाङपो हीन्गीन माङक्षे स्याम्ला लेगीलाक धेनी स्याम्मा हीन्गीनक्या एन्ला झ्युङगीलाक।” राङ ढोङगीनगी कोरला येशुगी ॱङो़नस्ये ॱनाङवा ( मेथा २०:१७-१९ ; लुका १८:३१-३४ ) 32 धेनी खोङबाक्या येरुसालेमदु फेवी घाङला, लाम्गाला येशु खुङक्याई दोङ-दोङला फेप्पालाक। धेनी ङेनेक्या ॱहाङसावालाक धेनी स्याम-स्याम्ला हुङगीनक्या जीक्पालाक। खोङबागी याङ ङेने च्युङङीक्याला शुरला ठीक्ती, राङला घी झ्युङये हो़गीनगी कोरला सुवालाक, 33 “तो़दाङ, होराङक्या धा येरुसालेमला डोवालाक धेनी मी-भु नी क्षो़पो़न क्षेक्या धाङ क्षो़ठीमगी ॱलोपो़नक्याई, लाक्पाला ची ग्याप्कीलाक धेनी खुङक्याई खोला से घो़गीलाक ॱनेरी, ठीम चेदी याहुदापा मेन्गीन मीरीकक्याई लाक्पारु ची ग्याप्कीलाक। 34 खुङक्याई खोला ॱमेटा पाप्कीलाक धेनी थी़याः ग्याप्कीलाक धेनी ताजाकगी श्युरकीलाक धेनी सेगीलाक। धेनी श्याक्मो सुम स्याम्ने, खो याङ सो़न्दी लाङगीलाक।” याकोब धाङ योहान्नागी श्योवा पुवा ( मेथा २०:२०-२८ ) 35 धेनी जेबेदीगी भीजा याकोब धाङ योहान्ना ॱङीउ, येशुगी डुङदु होरे श्यी़वालाक, “ॱलोपो़न ला, हे ॱङीउगी खोङबाला घी श्यी़गीनगो खोङबागी ॱनाङास्योक, ॱनेरी हे श्युवाहीन।” 36 “ङी खे ॱङीउगी क्षीला, घी झ्यीघोये दुओ?” सुरी येशुगी खुङ ॱङीउला सुवालाक। 37 खुङ ॱङीउगी श्यी़वालाक, “खोङबागी शीजे नाङदु हे ॱङीउने च्यीक, खेराङगी ॱये स्योकला धेनी च्यीक, ॱयो़न स्योकला धेदु चुक्रो जे।” 38 येशुगी खुङ ॱङीउला सुवालाक, “खे ॱङीउगी श्युगीनगी दो़नगो, खे ॱङीउ ॱमेस्येलालाक। ङी थुङ घोये दुक्ङेलगी फोरा, खे ॱङीउ थुङ थुप्ये हो़ती धेनी ङी लेन्गीन ठी़सो़गो, खे ॱङीउगी लेन थुप्ये हो़ती?” 39 खुङ ॱङीउगी झ्यी थुक्येहो़क ॱनेरी लेन श्यी़वालाक। धेनी येशुगी सुवालाक, “ङी थुङगीन फोरा देने, खे ॱङीउगी थुङगीलाक धेनी ङी लेन्गीन ठी़सो़ खे ॱङीउगी लेन्गीलाक 40 हीना ङी ॱये-ॱयो़नला धेदु च्युक्कीनगी आङजा ङाला मेक। दे नी सी़ छीला स्यामदुक, होदेगी लाक।” 41 ङेने श्येम्मा च्युक्याई होदे लाबगो घोरती, याकोब धाङ योहान्नाला खोङडो लावालाक। 42 धेनी येशुगी ङेनेक्याला भो़री सुवालाक, “याहुदापा मेन्गीन मीरीकक्याई पो़न्पोक्या, राङ घी थेगीन झ्येरी खुङक्या खाला आङ झ्यीदालाक धेनी मी खाक्क्षेक्यागीया, खुङक्या खाला आङजा झ्यीदालाक ॱनेरी खेक्याला स्येये हो़तालाक। 43 हीना खेक्या खोक्दु देरे झ्युङगीमालाक। खेक्याने क्षे हुङी दो़गीनगो, खेक्याई ॱयोक्पो झ्युङ घो़गुलाक। 44 धेनी खेक्याने एन्योक झ्युङी दो़गीनगी़, श्येम्मा घीरीगी ढेन्योक झ्युङ घो़गुलाक। 45 घीझ्येरी ॱनाना मी-भुवाः श्याप्ची, राङला राक्येला मेन्दा श्येम्माक्याला पुयेला होवालाक धेनी मीमाङला थारपा ॱनाङयेला राङगी ॱरोक ॱलो़ ताङयेला होवालाक।” बारतीमा ॱनागीन श्यारा च्यीक ( मेथा २०:२९-३४ ; लुका १८:३५-४३ ) 46 होदेने खोङबाक्या यारीकोदु फेप्पालाक। राङगी ङेनेक्या धाङ मीछोक क्षेमुला, येशु यारीकोने थो़न्दी घाङला, तीमेउसगी भीजा बारतीमा ॱनागीन ॱलोङगीन श्यारा च्यीक लाम्गारु धे हो़तालाक। 47 धेनी खी़ खोङबा नाजारेतगी येशु फेप्कीनगो ॱहाघोरती, फेरा ग्याप्ती श्यी़वालाक, “दावीदगी से येशु, ङाला ॱङीङजे जेरोनाङ।” 48 मी माङक्षेगी खोला खाबा धो़क ॱनेरी, आङजी तावालाक हीना खो ॱयो़ल्ले केक क्षे ग्याप्ती श्यी़वालाक, “दावीदगी से, ङाला ॱङीङजे जेरोनाङ।” 49 धेनी येशु फेप्येला छाम श्याक्ती सुवालाक, “खोला ङीचारु स्योक ॱनो़।” धेनी खुङक्याई श्यारागोला केक तारी ॱनेवालाक, “ख्यो़ सेम ॱमाफाम, लोङ खोङबागी ख्यो़ला स्योक सुङी।” 50 खो घोलाक ॱयुक्ती, याला फाक्ती येशुचारु होवालाक। 51 धेनी येशुगी खोला सुवालाक, “ख्यी़ क्षीला ङा घी झ्यीगु?” श्यारागी खोङबाला श्यी़वालाक, “ॱलोपो़न ला, ङी ॱमीक थोङये हो़गीन जेरोनाङ।” 52 धेनी येशुगी खोला सुवालाक, “राङगी लाम्गाला सोङ। ख्यो़री धेपागी ख्यो़ चो़गा झ्युजुङ।” लाम्साङ मीगो ॱमीक थोङगीन झ्युवालाक धेनी येशुगी स्याबाला डावालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.