मेथा 6 - ॱलोवाझ्यीम्बा ताङयेगी कोर 1 “मी श्येम्मागी थोङयेगी क्षीला, खुङक्याई दोङदु ढाङतेनगी लेगा मीझ्यीयेला शाप-शाप झ्यी। देरे झ्यीना नाम्खे श्यीङखामदु श्युक्कीन, ख्यी़ यापने ख्यो़ला ज्यागा ॱमेथोप्कीलाक। 2 होझ्येरी उटेक्याला झ्यीम्बा ताङी घाङला, शोक झ्यीगीनक्याई मीक्याने तो़पा थोप्येगी क्षीला, छोक्खाङ धाङ ॱराङगाकक्याला दुङ बी़री ग्युक्कीन च्योक्रे, खेक्या माझ्यी। धेन्पाराङ ङा खेक्याला ॱनाहीन, खुङक्याई ज्यागा खुङक्याला थोप्सालाक। 3 हीना खेक्या उटेक्याला झ्यीम्बा ताङी घाङला, ख्यी़ लाक्पा ॱयेगी तेरकीनगो लाक्पा ॱयो़नगी ॱमाछोरास्योक। 4 देरे झ्यीना, ख्यी़ झ्यीम्बा ताङगीनगो साङवे थोक्ने झ्युङगीलाक। धेनी साङवाने शीक्कीन ख्यी़ यापगी ख्यो़ला ज्यागा ॱनाङगीलाक।” सोवा पुयेगी कोरला ( लुका ११:२-४ ) 5 “धेनी खेक्या सोवा धेबी घाङला, शोक झ्यीगीन मीक्या च्योक्रे माझ्यी। घीझ्येरी ॱनाना मीक्याई थोङयेगी क्षीला, खुङक्या छोक्खाङ धाङ ॱराङगाकगी शुरक्याला लारी, ॱमो़लाम ग्याप्येला घालालाक। ङा खेक्याला धेन्पाराङ ॱनाहीन, खुङक्याई खोरी ज्यागा घीरी थोप्सालाक। 6 हीना खेक्या सोवा धेबी घाङला, ख्यो़री नाङ बुकतु सोरी, घो ग्याप्ती साङवाला श्युक्कीन ख्यी़ यापला सोवा धेप। धेनी साङवाने शीक्कीन ख्यी़ यापगी ख्यो़ला ज्यागा ॱनाङगीलाक। 7 “याङ खेक्या सोवा धेबी घाङला, छीक माङागी झ्येरी धेपा मीझ्यीगीनक्या खोरी ॱमो़लामक्या सेन्गीलाक साम्गीन च्योक्रे, खेक्या दो़न मेगीन छीकक्या भो़चे ॱमाताङ। 8 खुङक्या च्योक्रे माझ्यी घीझ्येरी ॱनाना ख्यो़ला घी घो़गीनगो ख्यी़ माश्युगीन एन्लाराङ, ख्यी़ यापगी खेन्दालाक। 9 खेक्या देरे झ्येरी ॱमो़लाम श्यी़, ‘नाम्खे श्यीङखामदु श्युक्कीन हीकी याप, खेराङगी छेन धाम्पा ॱरुङवास्योक। 10 खेराङगी ग्यासी हुङवास्योक, खेराङगी थुकोङ नाम्खे श्यीङखामला डुप्कीन च्योक्रे, सालाः डुप्पास्योक। 11 हीकी ङीन्रेगी शामा, धीरीङ हेला ॱनाङा जे। 12 हीकी श्येनगी नोन्डु सेल्गीन च्योक्रे, हीकी धीक्पाक्या सेल्वा जे। 13 हेला छो़ताला छी़दु ॱमाच्युक्रो जे, हीना ङेन्पागोने, हेला थारपा जे। ग्यासी, वाङ धाङ शीजे नी, ग्युने ग्युन्दु खेराङगी हीन। आमेन।’ 14 “खीकी मी श्येम्मागी ङेक्यो़नला घोयाङ ताङना, नाम्खे श्यीङखामदु श्युक्कीन खीकी यापगीया खेक्याला घोयाङ ॱनाङगीलाक। 15 हीना खेक्याई मी श्येम्मागी ङेक्यो़नक्या घोयाङ ॱमाताङना, खीकी यापगी खीकी धीक्पाक्या घोयाङ ॱमेनाङगीलाक। ॱङ्युङनेगी कोरला 16 “शोक झ्यीगीनक्याई मी श्येम्माला ॱङ्युङनेला श्युकहो़क, ॱनेरी तो़न्येगी क्षीला, खोराङक्याई ॱनामग्यु ग्युरकीन च्योक्रे, खेक्या ॱङ्युङने ॱरुङी घाङला खुङक्या च्योक्रे, ङो नाक्पो ॱमातो़न। ङा खेक्याला धेन्पाराङ ॱनाहीन, खुङक्याई खोरी ज्यागा घीरी थोप्सालाक। 17 हीना खेक्या ॱङ्युङने ॱरुङी घाङला, राङगी गोला ॱनुम ढी़ धेनी ङोरोङ ठी़। 18 धेनी मीक्याई ख्यी़ ॱङ्युङने श्युक्कीनगो ॱमेथोङा हीना साङवाला श्युक्कीन, ख्यी़ यापगी शीयास्योक। धेनी साङवाला श्युक्कीन ख्यी़ यापगी, ख्यो़ला ज्यागा ॱनाङगीलाक। नाम्खे श्यीङखामदु ग्युनोर ( लुका १२:३३-३६ ; १६:१३ ) 19 “जीक्तेनदु राङगी क्षीला ग्युनोर ॱमासाक, घीझ्येरी ॱनाना दुरु मुक्पा धाङ चागी मेताला ताङगीलाक, धेनी कुमु जुरी कुगीलाक। 20 हीना खेरी क्षीला नाम्खे श्यीङखामदु ग्युनोर सोक, घीझ्येरी ॱनाना होदुरु मुक्पा धाङ चागी ॱमेनोलालाक धेनी कुमु जुरी कुये मेतालाक। 21 घीझ्येरी ॱनाना ख्यी़ ग्युनोर हो़जारु, ख्यी़ सेमगोवा क्षाक्कीलाक। 22 “ॱमीक नी ली़गी मारमे लाक। होझ्येरी ख्यी़ ॱमीक थाङा हो़ना, ख्यी़ ली़ घीरी हो़गी खाङगीलाक। 23 हीना ख्यी़ ॱमीक घा मेना, ख्यी़ ली़ घीरी मी़नाकगी खाङगीलाक। होझ्येरी ख्यी़ नाङदु हो़गीन हो़ दे, मी़नाक्पा हो़ना होदे मी़नाक्पा दे घीन्गी छाप्क्षे ले। 24 “मी च्यीक दाक्पो ॱङीगी ॱयोक ग्युक ॱमीथुवालाक घीझ्येरी ॱनाना ख्यी़ च्यीकला दाङा झ्यीना, श्येम्मागोला चेवा झ्यीगीलाक। याङ च्यीकला ॱलो काना, श्येम्मागोला थोङछुङ झ्यीगीलाक। ख्यो़ को़न्क्षोक धाङ ॱङु ॱङीगारागी ॱयोक ग्युक ॱमीथुक्वालाक। दुङा माझ्यी ( लुका १२:२२-३१ ) 25 “होझ्येरी ङा खेक्याला ॱनाहीन, मीछेगी छीला घी शाये, घी थुङये धेनी ली़गी छीला घी घो़न्ये ॱनेरी दुङा माझ्यी। शामाने खाक्क्षे मीछे धाङ घोलाकने खाक्क्षे ली़ माले? 26 ॱनामगी झ्याक्याला तो़। देक्या साङा ॱमेतावालाक, लोदोक ॱमेङालाक धेनी डुखाङदु ॱमेसालाक, हीना नाम्खे श्यीङखामदु श्युक्कीन ख्यी़ यापगी, देक्याला शामा ॱनाङालाक। खेक्या दे झ्याक्याने ल्हाक खाक्क्षे माले? 27 दुङा झ्येरी, खेक्याने सी़ राङगी मीछेला छुची च्यीक ॱनो़न्गा ग्याप थुक्वाले? 28 “धेनी घो़न्येगी छीला, खेक्या घीझ्येरी दुङा झ्यीदा? चाथाङगी मेन्तोकक्या घाङगी झ्येरी केलो तो़। देक्या लेगा मीझ्यीदालाक धेनी बा ॱमेखालाक। 29 हीना ङा खेक्याला ॱनाहीन, ग्यावु सोलोमोन शीजे क्षेन्बो हीन्ना, दे मेन्तोकक्याने च्यीक च्योक्रे घोलाक जेवा घो़न माङ्युवालाक। 30 धीरीङ केरी धेती ॱङेटो थापला ॱयुक्ये हो़गीन, श्यीङगी चाक्याला को़न्क्षोकगी देरे को़न थुक्ना, ख्ये धेपा च्युङाक्याला, खोङबागी देले ल्हाक को़न ॱमेनाङगीले? 31 “होझ्येरी ‘घी शाये?’ धाङ ‘घी थुङये?’ धाङ ‘घी घो़न्ये?’ ॱनेरी दुङा माझ्यी। 32 घीझ्येरी ॱनाना धेपा मीझ्यीगीनक्या, देक्या घीरी चालालाक धेनी नाम्खे श्यीङखामदु श्युक्कीन खीकी यापगी, खेक्याला दे घीरी घोलालाक ॱनेरी खेन्दालाक। 33 हीना एन्ला को़न्क्षोकगी ग्यासी धाङ खोङबागी ढाङतेनला चो, धेनी दे घीरी खेक्याला ॱनाङगीलाक। 34 होझ्येरी ॱङेटोगी क्षीला दुङा माझ्यी, घीझ्येरी ॱनाना ॱङेटोला ॱङेटोराङगी दुङा हो़तालाक। धीरीङगी दुङा, धीरीङगी क्षीला ढीक्येदुक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.