लुका 7 - ॱलोवाग्यापो़नगी धेपा ( मेथा ८:५-१३ ) 1 येशुगी का घीरी मीक्याला सुङसारती, खोङबा काफारनाहुमदु फेप्पालाक। 2 होदुरु ग्यापो़न च्यीकला ॱयोक्पो ढीन्चेन च्यीक हो़तालाक। धेनी खो नेपा झ्युरी, स्यीगु झ्यीदी हो़तालाक। 3 येशुगी कोरला ग्यापो़नगी ॱहाघोरती, खोरी ॱयोक्पोला चो़गा झ्यीयेला याहुदापा गेम्पाक्याला येशुला श्युरु झावालाक। 4 धेनी खुङक्या येशुचारु होरी खोङबाला श्योवा पुवालाक, “ग्यापो़न देला, खेराङगी रोक्राम थोप्ना ढीक्ये हो़तालाक। 5 घीझ्येरी ॱनाना खो हीकी मीरीकला चेवा झ्यीदालाक धेनी खी़ हीकी छोक्खाङगोवाः चीक्पालाक।” 6 धेनी येशु खुङक्यामुला फेप्पालाक। खोङबा ग्यापो़नगी खाङबा भोलोक्तु हो़ती घाङला, ग्यापो़नगी खोरी रोवाक्याला दे ॱनायेला झावालाक, “चोवो काल्ले माजेरोनाङ घीझ्येरी ॱनाना ङा खेराङला ङी नाङदु फेप्सु श्युरीन खाये मेक। 7 होझ्येरी ङा खेराङचारु च्यारीन खाये मेक। हीना खेराङगी कागो ॱनाङरो जे धेनी ङी ॱयोक्पो ढाक्कीलाक। 8 घीझ्येरी ॱनाना ङाः मी श्येम्मागी वाङगी होकदु हो़क धेनी ङी होकला ॱमाक्मीक्या हो़क। ङी च्यीकला सोङ ॱनाना, खो डोवालाक धेनी श्येम्मा च्यीकला स्योक ॱनाना खो हुङालाक। धेनी ङी ॱयोक्पोला दे झ्यी ॱनाना, खी़ होदे झ्यीदालाक।” 9 दे घीरी सेन्दी येशु ॱहाङसावालाक। धेनी खोङबागी स्याम्ला डागीन मीछोक स्योकला श्याल ग्युरती सुवालाक, “ङा खेक्याला ॱनाहीन, ङी ईस्राएल नाङदुवाः देरे धेपा हो़गीन मी ॱमाथो।” 10 धेनी खी़ झाजा रोवाक्या खाङबाला लोक्ती हुई घाङला, ॱयोक्पोगो ढाक्सागीन थुक्पालाक। युक्जामागी भीजा येशुगी सो़न्पो जेपा 11 होदे स्याम्ने येशु नाईन ॱनागीन युला फेप्पालाक धेनी खोङबागी ङेनेक्या धाङ मीछोक क्षे च्यीक, खोङबामुला सोवालाक। 12 खोङबा होदे युगी घोई भोलोक्तु फेई घाङला, युक्जामा च्यीकगी भीजा च्यीगारागी़ फुङबुगो खेरती डी़ हो़तालाक। होदे युगी मीछोक क्षे च्यीक मी़मुला हो़तालाक। 13 धेनी चोवो येशुगी मोला शीक्ती, खोङबागी सेम ॱङीङजेगी खारी मोला सुवालाक, “माङु।” 14 धेनी खोङबा भोलोक्तु फेप्ती फुङबु हो़गीन, ख्योकस्यीङला ज्युवा जेपालाक धेनी फुङबु खेरकीनक्या घुक्पालाक। धेनी खोङबागी सुवालाक, “ख्योक्तोङ ख्यो़, ङा ख्यो़ला लोङ ॱनाहीन।” 15 धेनी स्यीम्बुगो लारी लाब तावालाक। धेनी येशुगी खोला खोरी आमाला ची ग्याप जेपालाक। 16 धेनी मी घीरी ॱमीच्यीकी जीक्ती, को़न्क्षोकला तो़टा पुरी ॱनेवालाक, “होरी घुङदु ॱङो़नस्येखेन खाक्क्षे च्यीक थो़न्दुक।” धेनी “को़न्क्षोकगी खोरी मीरीकला थुक्जे शीक्दुक।” 17 खोङबागी कोरला दे लुग्यु दे, युदेया धाङ ॱये-ॱयो़न घीरीला ख्याप्पालाक। येशु धाङ ठी़सो़खेन योहान्ना ( मेथा ११:२-१९ ) 18 ठी़सो़खेन योहान्नागी ङेनेक्याई, येशुगी जेजा क्षाले घीरी खोला स्येपालाक धेनी योहान्नागी खोरी ङेनेक्याने ॱङीला भो़री 19 चोवोचारु देरे ॱनेरी झावालाक, “फेप्कुलाक ॱनागीनगो, खेराङ राङ हीने याङमेना हे श्येम्मा च्यीकला घुक्की़?” 20 होदे मीक्या येशुचारु च्यारती श्यी़वालाक, “ठी़सो़खेन योहान्नागी हेला देरे ॱनेरी खेराङचारु ताजुङ, ‘फेप्कुलाक ॱनागीनगो खेराङ राङ हीने याङमेना हे श्येम्मा च्यीकला घुक्कु?’ ” 21 धेनी होदे घाङलाराङ येशुगी नाजाक्या धाङ शुकक्या धाङ ॱनो़पाक्या हो़गीन, मी माङाला चो़गा जेपालाक धेनी श्यारा माङाला थोङगीन जेपालाक। 22 धेनी खोङबागी खुङक्याला सुवालाक, “सोङला खेक्याई थोङगीन धाङ घोरकीनगो योहान्नाला स्यो़क। श्याराक्याई थोङी, श्याक्योवाक्या घोबा चुई, जेनेक्या दाक्यी, घुक्याक्या घोरी, स्यीम्बुक्या सो़न्पो ॱलाङी धेनी ताम्शाङगो उटेक्याला स्येदुक। 23 ङाला तेरी धेपाने मेलोक्कीनक्या झ्यीलाप क्षे हीन।” 24 योहान्नागी झाजा ङेनेक्या लोक्सारती, खोङबागी मीछोकला योहान्नागी कोरला सुवालाक, “रीतोङदु खेक्या घी तारु सोवा? ॱलुङबुगी घुगीन चाला तारु सोवा? 25 होदे मेन्ना खेक्या रीतोङदु घी तारु सोवा? घो़ ज्याबो घो़न्गीन मीला तारु सोवा? घो़ पी़मा घो़न्गीन धाङ कीदा झ्येरी धेगीनक्या ग्यावुगी फोडाङदु हो़तालाक। 26 धा ॱहाना, खेक्या घी तारु सोवा? ॱङो़नस्येखेन च्यीकला तारु? लाक, ङा खेक्याला ॱनाहीन, खेक्याई ॱङो़नस्येखेनने ल्हाक च्यीकला तारु सोवालाक। 27 खो होदेराङ लाक, सी़ क्षीला देरे ढीक हो़तालाक, ‘तो़दाङ, ख्यो़ने एन्ला ख्यी़ फेप्लाम डाढीक झ्यीयेला, ङा ङी भाङछेन ख्यी़ दोङदु झाङाहीन।’ 28 “ङा खेक्याला ॱनाहीन केमीक्याने, केक्या योहान्नाला खाक्क्षे सुवा मेतालाक हीना को़न्क्षोकगी ग्यासीला च्युङस्योकगो खोनेः क्षे लाक।” 29 धेनी मी घीरी धाङ ठा धुगीनक्याई दे घोरती, योहान्नागी लागाने ठी़सो़ लेन्दी, को़न्क्षोकगी ढाङतेनला खेलेन्बालाक। 30 हीना फारुसीपाक्या धाङ क्षो़ठीमगी ॱलोपो़नक्याई खोने ठी़सो़ मालेन्बा, को़न्क्षोकगी थुकोङ राङगी क्षीला खेमालेन्बालाक। 31 येशुगी सुवालाक, “धी़राप दी मीक्याला ङा घीन्गी मुला दुरये? देक्या सु च्योक्रे ले? 32 देक्या ठोमला च्यीक-च्यीकला देरे ॱनेरी केक ग्याप्कीन टुवाक्या च्योक्रे दुक, ‘हेक्याई ख्यी़ क्षीला ॱलीङबु तावी धेनी ख्यी़ घा चेगी मीदुक। हेक्याई धुक्लु तावी धेनी ख्यो़ ङुगी मीदुक।’ 33 “ठी़सो़खेन योहान्ना ग्याङगा मेशा, क्षाङ ॱमाथुवा फेप्पालाक। धेनी खेक्याई, ‘खोला डे जुदुक’ ॱनेवालाक। 34 मी-भु शा-थुङ झ्येरी होवालाक धेनी खेक्याई खोला, ‘खोला तो़दाङ, फोक्चाङा, क्षाङदुवा ठा धुगीनक्या धाङ धीक्चेनक्याई रोवा!’ ॱनेरी ॱनेवालाक। 35 हीना स्येराप याङदाक्पा हीन्गीनगो, दी टुवाक्याई खुङ क्यालालाक।” केमी धीक्चेन च्यीकला घोयाङ 36 फारुसीपाक्याने च्यीकगी येशुला डो़नला भो़वालाक धेनी खोङबा होदी फारुसीपागी नाङदु फेप्ती, श्यालाक श्येयेला श्युक्पालाक। 37 होदी ग्याजागी केमी धीक्चेन च्यीकगी, येशु होदे फारुसीपागी नाङदु श्युक्टाला श्युक दुक, ॱनेरी घोरती धो कामारुगी भुम्पा घाङ पो़क्षु खेरती होदुरु होवालाक। 38 धेनी येशुगी ग्याप स्योकला, खोङबागी श्यापदु लारी ङी़री धेपालाक धेनी मी़ ॱमीक्क्षुगी खोङबागी श्याप ॱलो़म्बा शो़री, मोरी ॱरागी होदी ॱमीक्क्षु फीवालाक। धेनी खोङबागी श्यापला ओ झ्येरी, पो़क्षुगो ढी़वालाक। 39 खोङबाला डो़नला भो़गीन, फारुसीपागी़ दे थोरी खोरी सेम नाङदु देरे साम्बालाक, “दे मी दे ॱङो़नस्येखेन च्यीक हीन्ना खोराङला जुगीन केमीगो सु धाङ घारे च्यीक ले, ॱनेरी ॱहाघोरये हो़तालाक घीझ्येरी ॱनाना मो धीक्चेन च्यीक लाक।” 40 धेनी येशुगी खोला सुवालाक, “सीमोन, ङा ख्यो़ला लाब च्यीक ॱनायेहो़क।” धेनी खी़, “गेन्ला, सुङरो ॱनाङ।” ॱनेरी श्यी़वालाक। 41 “भुलीङ ताङगीन दाक्पो च्यीकला, भुलीङ ढेगीन मी ॱङी हो़तालाक। च्यीकगी ॱङुगी टाङगा ॱङापग्या धाङ श्येम्मागी़ ॱङापच्यु भुलीङ कीवालाक। 42 हीना खुङ ॱङीउगी भुलीङ झाङ ॱमाथुक घाङला, दाक्पोगी़ खुङ ॱङीगारागी भुलीङगो सेपालाक। धा, दे ॱङीउने सी़ खोला चेवा माङा झ्यीगीले?” 43 धेनी सीमोनगी ॱनेवालाक, “ङी साम्लोला भुलीङ माङा सेगीनगी़।” धेनी खोङबागी खोला सुवालाक, “ख्यी़ ढाङपो ॱनेजुङ।” 44 धेनी होदे केमी स्योकला शीक्ती, खोङबागी सीमोनला सुवालाक, “दे केमीला थोङी? ङा ख्यी़ नाङदु जुरी, ख्यी़ ङाला काङबा ठुगीन क्षु तेरकी मीदुक हीना मी़ ङी काङबा मोरी ॱमीक्क्षुगी ठी़री मोरी ॱरागी फीजुङ। 45 ख्यी़ ङाला ओ झ्यीगी मीदुक हीना ङा होने ॱहाला, मी़ ङी काङबाला ओ झ्यीये भोरकी मीदुक। 46 ख्यी़ ङी गोवाला ॱनुम ढी़गी मीदुक हीना मी़ ङी काङबाला पो़क्षु ॱलुक्जुङ। 47 होझ्येरी ङा ख्यो़ला ॱनाहीन, मी़ धीक्पा माङागोला सेसालाक घीझ्येरी ॱनाना मी़ माङा चेवा झ्येवालाक। हीना घोयाङ ङ्युङा थोप्कीनगी़ चेवा ङ्युङा झ्यीदालाक।” 48 धेनी खोङबागी मोला सुवालाक, “ख्यी़ धीक्पाक्या सेल्जुङ।” 49 श्युक्टाला धेगीनक्याई खोराङक्या नाङदु ॱनेवालाक, “धीक्पा सेल्गीन दे सुले?” 50 धेनी खोङबागी होदे केमीला सुवालाक, “ख्यो़री धेपागी ख्यो़ला क्योप्पालाक। धा श्यीदेला सोङ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.