लुका 19 - ॱलोवाठा धुगीन जाखाया 1 येशु येरीको ग्याजाने फेई हो़तालाक। 2 होदुरु जाखाया ॱनागीन मी च्यीक हो़तालाक। खो ठा धुगीनगी चोगो लाक धेनी खो ॱमीच्यीकी क्षुक्पु हो़तालाक। 3 खो येशु सु हीन्ढी़ ॱनेरी ज्याङी दो़पालाक हीना खी़ शु च्युङा झ्येरी, मीछोकगी खोक्ने ज्या ॱमाथुक्पालाक। 4 होझ्येरी खो दोङला भाङ तारी सोरी, सेयापगी दोङबो च्यीकगी खाला जाक्पालाक। घीझ्येरी ॱनाना खोङबा होदेने ॱहाला फेई हो़तालाक। 5 धेनी येशु होदे साज्यारु फेप जेदी याला शीक्पालाक धेनी खोला सुवालाक, “जाखाया, ग्योक्जे माला भाप्ती स्योक घीझ्येरी ॱनाना धीरीङ ङा ख्यी़ नाङला धे घोयेहो़क।” 6 होझ्येरी जाखाया लाम्साङ माला भाप्ती होरी ङ्यामो घेरी खाङबाला फेप श्यी़वालाक। 7 दे थोरी मीक्या घीरीगी फाक्तुङ दुरी ॱनेवालाक, “खोङबा मी धीक्चेन च्यीकगी नाङदु डो़नला फेई।” 8 हीना जाखाया लारी चोवोला श्यी़वालाक, “चोवो शीक्रोनाङ, ङा ङारी ग्युनोरने फेक उटेक्याला झ्यीम्बा ताङयेहीन धेनी मीक्याने गो कोरती ग्यु ॱली़ हो़ना, ङा होदेगी दाप श्यी ॱलोक्येहीन।” 9 धेनी येशुगी खोला सुवालाक, “धीरीङ दे नाङदु थारपा ॱलेप्दुक घीझ्येरी ॱनाना मी देयाः आब्राहामगी भु लाक। 10 घीझ्येरी ॱनाना मी-भु नी तोरताक्याला ॱयाङये धाङ क्योप्येगी क्षीला होवालाक।” ॱङुटाङ धाङ ॱयोक्पो सुमगी पे ( मेथा २५:१४-३० ) 11 धा मीक्याई दे ङेन्दी घाङला, येशुगी खुङक्याला पे च्यीक सुवालाक घीझ्येरी ॱनाना खोङबा येरुसालेमगी ङ्येरु हो़तालाक धेनी मीक्याई को़न्क्षोकगी ग्यासी उक्कुरा च्यीकला ॱङो़न्टु साम्बालाक। 12 होझ्येरी खोङबागी सुवालाक, “कुटाक्पा च्यीक ग्यावुगी आङजा थोप्ये धाङ लोक्ती हुङयेला, यु थाक्रीङा च्यीकदु सोवालाक। 13 होझ्येरी खी़ खोरी ॱयोक्पो च्युला भो़री, रे-रेला ॱङुटाङ च्यु तेरती ॱनेवालाक, ‘ङा लोक्ती मायोङ थुक्पे दे टाङगाने छोङ झ्यी।’ 14 “हीना खी़ युगी मीक्या खोला थेदा मीझ्यीदालाक होझ्येरी होदेक्याई खी़ स्याबाला देरे ॱनेरी भाङछेनक्या झावालाक, ‘हेक्याला मी दे ग्यावु मेघो।’ 15 हीना ग्याखापगो थोप्ती लोक्ती होरी, खी़ आले ताता ॱयोक्पोक्याई छोङ ग्याप्ती घाजो़ खेब्साङ साक्दुई, ॱनेरी स्येयेला खुङक्याला खोरीचारु भो़येला का तेरपालाक। 16 धेनी ॱयोक्पो धाङपोगो खी़ दोङदु होरी ॱनेवालाक, ‘चोवो, खेराङगी ॱनाङना टाङगाने ङी टाङगा यालीङ च्यु साक्हो़क।’ 17 ग्यावुगी खोला ॱनेवालाक, ‘होछुङ, ॱयोक्पो शाङा ख्यो़, ख्यो़ ङ्युङागी खाला ढाङपो थो़न्दी धा ख्यो़ ग्याजा च्युगी खाला वाङ झ्यीगीलाक।’ 18 धेनी ॱयोक्पो ॱङीवागो होरी ॱनेवालाक, ‘चोवो, खेराङगी टाङगाने यालीङ टाङगा ॱङा साक हो़क।’ 19 खी़ खोला ॱनेवालाक, ‘ख्यो़लाः ग्याजा ॱङागी खाला वाङ थोप्कीलाक।’ 20 ॱयोक्पो श्येम्मा च्यीक होरी देरे ॱनेवालाक, ‘चोवो, खेराङगी टाङगा दुरु हो़क। ङी देला रेगी धाम्दी श्याक्पी। 21 ङा खेराङला जीक्जुङ घीझ्येरी ॱनाना खेराङ मी ग्योङा च्यीक लाक। खेराङगी माश्याक्कीनने खेराङ लेन्दालाक धेनी ॱमाताप्कीनने खेराङ ॱङालाक।’ 22 ग्यावुगी खोला ॱनेवालाक, ‘ॱयोक्पो ङेन्पा ख्यो़, ख्यी़ छीकक्यानेराङ ङा ख्यो़ला ठीम ताङयेहीन। ङा माश्याक्कीनने लेन्गीन धाङ ॱमाताप्कीनने ॱङागीन मी ग्योङा च्यीक लाक ॱनेरी ख्यी़ स्येरीयाः 23 घीझ्येरी ख्यी़ ङी टाङगागो ॱङुखाङदु माश्याक्पा? ॱङुखाङदु श्याक्हो़ना ङा लोक्ती हुई घाङला होदे टाङगामुला भेब गोवा जोरये हो़क।’ 24 धेनी ॱये-ॱयो़नला लारी धेताक्याला ग्यावुगी ॱनेवालाक, ‘खोने होदे टाङगा लेन्दी श्येम्मा टाङगा च्यु साक्सागोला तेर।’ 25 खुङक्याई ग्यावुला ॱनेवालाक, ‘चोवो, खोला टाङगा च्यु हो़तालाक।’ 26 ग्यावुगी ॱनेवालाक, ‘ङा खेक्याला ॱनाहीन, हो़गीनला ॱयो़ल्ले माङा तेरकीलाक हीना मेगीनक्याने खोला हो़गीनगोवा खोने ठोक्कीलाक। 27 हीना ङा ग्यावु झ्युङगीनगो ॱमेथेगीन ङी डाक्याला दुरु ठीक्ती स्योक धेनी खुङक्याला ङी दोङदुराङ सो़क।’” येशु येरुसालेमदु फेप्पा ( मेथा २१:१-११ ; मारकु ११:१-११ ; योहान्ना १२:१२-१९ ) 28 धा येशुगी देक्या सुङसारती खोङबा येरुसालेम स्योकला फेप्पालाक। 29 खोङबा बेथफागे धाङ बेथानी ॱनागीन युगी भोलोक्तु हो़गीन क्युरुस्यीङगी री ॱनागीन रीला फेया जेपालाक। धेनी खोङबागी ङेनेक्याने ॱङीला देरे सुरी झावालाक, 30 “ख्यी़ दोङगी युला सोङ धेनी होदे नाङदु खेक्याई सुवाः श्यो़न माङ्युङगीन भुङटु च्यीक ताक्ती श्याकश्या थोङगीलाक। होदे टोरी दुरु ठीक्ती स्योक। 31 धेनी मीक्याई घीझ्येरी टोलाले ॱनेरी खेक्याला ढीना, देरे ॱनो़, ‘चोवोला दे घोयेदुक।’” 32 होझ्येरी खुङक्या सोवालाक धेनी खोङबागी खुङक्याला सुङगीन च्योक्रे थुक्पालाक। 33 खुङक्याई भुङटुगो टोली घाङला दाक्पोक्याई खुङक्याला ढीवालाक, “घीझ्येरी खेक्या दे भुङटु टोलाले?” 34 खुङक्याई ॱनेवालाक, “चोवोला दे घोयेदुक।” 35 ङेनेक्याई होदे येशुचारु ठीक्ती होवालाक। धेनी खोरी घो़क्या होदेगी खाला श्याक्ती, येशुला होदे खाला क्षीप्तु च्युक्पालाक। 36 खोङबा भुङटु श्यो़न्दी फेई घाङला, मीक्याई राङगी घो़क्या लाम्गाला तीवालाक। 37 धेनी येशु येरुसालेमगी भोलोक्तु हो़गीन, क्युरुस्यीङगी रीगी थुरला फेया जेपालाक। होदे घाङला खुङक्याई थोथा ॱहाङसागीन क्षाक्लेक्याई क्षीला, ङ्यामो घेरी को़न्क्षोकला केक क्षेला तो़पा पुरी ॱनेवालाक, 38 “चोवोगी छेनला फेप्गीन ग्यावुगो झ्यीलाप क्षे! नाम्खे श्यीङखामदु श्यीदे धाङ ॱलानामेपेला तो़टा!” 39 धेनी मीमाङक्याने फारुसीपा रीङगाक्याई ॱनेवालाक, “ॱलोपो़न ला, खेराङगी ङेनेक्याला काको़न ॱनाङाजे।” 40 हीना खोङबागी सुवालाक, “ङा खेक्याला ॱनाहीन, देक्या खाबा धेना धोगोङक्याराङ फेरा ग्याप्कीलाक।” येरुसालेमगी क्षीला येशु स्युम्बा 41 येशु येरुसालेमगी भोलोक्तु फेप्पालाक धेनी ग्याजागोला थोरी खोङबा स्युमा जेपालाक, 42 धेनी सुवालाक, “श्यीदे घाने हुङगीनगो ख्यी़ धीरीङ ङीमाला ॱहाघोर हो़ना ढीक्येहो़क। हीना धा दे खीकी ॱमीक्वाने ॱयीप हो़तालाक। 43 घीझ्येरी ॱनाना खेरी डाक्याई खेरी थामा घीरीने कोरती क्षोक घीरीने, खेक्याला काक्ती श्याक्कीन ङीमागोक्या खीकी खाला भाप्कीलाक। 44 धेनी खुङक्याई ख्यो़ धाङ ख्यी़ टुवाक्याला साला दाप्कीलाक। खुङक्याई धोगोङ च्यीकगी खाला श्येम्मा धोगोङ च्यीया ल्हाक्तु च्युक्कीमालाक घीझ्येरी ॱनाना ख्यी़ को़न्क्षोक फेप्कीन धी़गो ङो ॱमास्येवालाक।” येशु क्षो़खाङ नाङदु ( मेथा २१:१२-१७ ; मारकु ११:१५-१९ ; योहान्ना २:१३-२२ ) 45 धेनी येशु क्षो़खाङ नाङदु फेप्ती होदुरु छोङ ग्याप्ती, धेगीन छोङबाक्याला होदेने पी़दी 46 सुवालाक, “सुङरापला देरे ढीक हो़तालाक, ‘ङी खाङबा ॱमो़लामगी खाङबा झ्युङगीलाक।’ हीना खेक्याई देला झ्याक्पाक्याई छाङ शो़दुक।” 47 धेनी येशु ङीमा तेनग्याङ क्षो़खाङदु क्षो़ सुङी हो़तालाक। हीना क्षो़पो़न क्षेक्या धाङ क्षो़ठीमगी ॱलोपो़नक्या धाङ होदे लुङबागी पो़न्पोक्याई, खोङबाला सेये थापस्यी झ्यीदी हो़तालाक। 48 हीना मी घीरी खोङबागी काला ॱङीङने चीगीन झ्येरी, खुङक्याला थापस्यी घीया ॱमाङेबालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.