लुका 18 - ॱलोवायुक्जामा धाङ ठीम्पो़न 1 धेनी च्योई सोवा धेप्ये धाङ सेमस्युक मेक्षाक्येगी क्षीला, येशुगी ङेनेक्याला पे च्यीक सुवालाक। 2 “ग्याजा च्यीकदु को़न्क्षोकला जीक्नाङ मीझ्यीगीन धाङ मीला चीदोङ मीझ्यीगीन ठीम्पो़न च्यीक हो़तालाक। 3 होदे ग्याजादुराङ युक्जामा च्यीक हो़तालाक। मो खी़चारु हुङजीक झ्येरी ॱनालाक, ‘ङाला ङी डाने ठीम ढाङपो जेरो ॱनाङ।’ 4 थेङ घाजीङ खी़ होदे युक्जामागी लाब माङेन्बालाक। हीना स्याम्ला खी़ खोरी सेमला ॱनेवालाक, ‘ङा को़न्क्षोकला जीक्नाङ मीझ्यीहो़क धेनी मीला चीदोङ मीझ्यीहो़क। 5 हीना दे युक्जामागी ङाला चाशीङदु चुक्ती, ङा देला ठीम चेयेहीन। देरे मीझ्यीना मो हुङजीक झ्येरी, ङाला हुदुक्तु च्युक्कीलाक।’” 6 धेनी येशुगी सुवालाक, “ठीम्पो़न मेढाङा दी ॱनागीन दे ङेन। 7 धेनी को़न्क्षोकगी राङगी दाम्दा मीक्याई ङीन्घाङ-छेन्घाङ सोवा ग्याप्ना, खुङक्याला ठीम ढाङपो चेदा जेगीमालाक से? खोङबागी खुङक्याला रोवा झ्यीयेला धाला जेगीलाक से? 8 ङा खेक्याला ॱनाहीन, खोङबागी खुङक्याई ठीम ग्योक्जे चे जेगीलाक। घीहीन्ना मी-भु फेई घाङला, दे जाम्बुलीङदु धेपा-झ्यीगीनक्या ॱङेटी़?” फारुसीपा धाङ ठा धुगीनगी पे 9 राङ-राङला ढाङा साम्गीन धेनी श्येम्माक्याला थोङछुङ झ्यीगीन मी रीङगाक्याला, येशुगी पे दे सुवालाक, 10 “क्षो़खाङदु फारुसीपा च्यीक धाङ ठा धुगीन, मी च्यीक ॱमो़लाम ग्याप्तु सोवालाक। 11 फारुसीपागो खोराङ च्यीगा लारी ॱमो़लाम दे पुवालाक, ‘के को़न्क्षोक, खेराङला थुक्जेक्षे घीझ्येरी ॱनाना ङा श्येम्माक्या च्योक्रे ॱहाम्बा झ्येरी, ग्यु ठोक्कीन धाङ मेढाङा धाङ लोक्येम झ्यीगीन धाङ दे ठा धुगीन मी च्योक्रे मेक। 12 ङा धी़न्डाला थेङमा ॱङी ॱङ्युङने ॱरुङीहो़क धेनी ङाला हो़गीन घीरीगी ग्याजा च्यु खेराङला पुलीहो़क।’ 13 हीना ठा धुगीनगो थाक्रीङाने लारी, नाम्खा स्योकला ॱमीक ताक झ्यी ॱमाक्थुवा, राङगी ढाङगो दुरी ॱनेवालाक, ‘के को़न्क्षोक, ङा धीक्चेन च्यीकला ॱङीङजे शीक्रोनाङ।’” 14 धेनी येशुगी सुवालाक, “ङा खेक्याला ॱनाहीन, श्येम्मा मीगो मेन्दा, दे मी दे को़न्क्षोकगी डुङदु याङदाक्पा झ्युरी, खोरी नाङला लोक्पालाक। घीझ्येरी ॱनाना राङला थोवा शोगीनक्या, घीरी ॱमावा जेगीलाक धेनी राङला ॱमावा शोगीन घीरीला थोवा जेगीलाक।” येशु धाङ टुवाक्या ( मेथा १९:१३-१५ ; मारकु १०:१३-१६ ) 15 मीक्याई राङगी टुवाक्याला येशुगी क्षाक्वाङ ॱनाङास्योक ॱनेरी, खोङबागी डुङदु खेरती हुङी हो़तालाक। धेनी दे थोरी ङेनेक्याई खुङक्याला आङजी तावालाक। 16 हीना येशुगी टुवाक्याला राङचारु भो़री सुवालाक, “टुवाक्याला ॱमाकाक। ङीचारु हुङदु च्युक घीझ्येरी ॱनाना को़न्क्षोकगी ग्यासी देक्याई क्षीला लाक। 17 ङा खेक्याला ॱङोन्ने ॱनाहीन, को़न्क्षोकगी ग्यासीला टुवा च्यीकगी च्योक्रे झ्येरी, खेमेलेन्गीन सुवाः होदे नाङदु नामाः मीजुगीलाक।” पो़न्पो क्षुक्पु च्यीक ( मेथा १९:१६-३० ; मारकु १०:१७-३१ ) 18 पो़न्पो च्यीकगी येशुला श्यी़वालाक, “घेगेन शाङपो ला, थामेगीन मीछे थोप्येला ङा घी झ्यीघो़गुले?” 19 येशुगी खोला सुवालाक, “ख्यो़ ङाला घीझ्येरी शाङपो ॱनालाक? को़न्क्षोक च्यीका माना शाङपो सुवाः मेतालाक। 20 क्षो़ठीमगी काक्या ख्यो़ला स्येये हो़तालाक। लोक्येम माझ्यी, मी ॱमासे, कुमु ॱमाकु, पाङपो शोक्पो ॱमातेर धेनी फामाला घुस्याप झ्यी।” 21 धेनी खी़ ॱनेवालाक, “दे काक्या घीरी ङी च्युङाने ॱहालाराङ ॱरुङहो़क।” 22 दे सेन्दी येशुगी खोला सुवालाक, “ख्यी़ धोराङा लेगा च्यीक झ्यीयेला ल्हाक दुक। ख्यो़ला हो़गीन घीरी चोरी, उटेक्याला ज्यीम्बा तोङ धेनी ख्यो़ला नाम्खे ग्यासीदु तेर थोप्कीलाक। धेनी ङी स्याम्ला स्योक।” 23 हीना दे लाब ङेन्दी खी़ सेम क्योवालाक घीझ्येरी ॱनाना खो ॱमीच्यीकी क्षुक्पु हो़तालाक। 24 धेनी येशुगी खोला शीक्ती सुवालाक, “मी क्षुक्पुक्याला को़न्क्षोकगी ग्यासी नाङदु जुयेला ॱमीच्यीकी काल्ले दुक। 25 मी क्षुक्पु च्यीकला को़न्क्षोकगी ग्यासी नाङदु छी़येनेः, सेम्चेन ॱनाउला खापगी ॱमीक नाङदु जुयेला लेल्हा हो़टु।” 26 दे ङेन्गीनक्याई ढीवालाक, “धा ॱहाना, सुला थारपा थोप्कीले?” 27 खोङबागी सुवालाक, “मीक्याई क्षीदु झ्यीथुप्ये मेगीनगो, को़न्क्षोकगी जे थुक्कीलाक।” 28 धेनी पेटोगी ॱनेवालाक, “शीक्रोनाङ, हीकी हेरी नाङक्या भोरती, खेराङगी स्याम्ला डाहो़क।” 29 धेनी खोङबागी खुङक्याला सुवालाक, “धेन्पाराङ ङा खेक्याला ॱनाहीन, को़न्क्षोकगी ग्यासीगी क्षीला राङगी नाङ याङना केमी याङना पी़नक्या याङना फामाक्या याङना टुवाक्या भोरती हुङगीनक्याला, 30 मीछे देला होदेने माङा थोप्कीलाक धेनी हुङये हीन्गीन धी़ला थामेपे छेसोक थोप्कीलाक।” येशुगी छीवे कोरला ( मेथा २०:१७-१९ ; मारकु १०:३२-३४ ) 31 येशुगी खोरी ङेने च्युङङीला ठीक्ती सुवालाक, “तो़दाङ, होराङक्या येरुसालेम स्योकला डोयेलाक धेनी मी-भुगी कोरला ॱङो़नस्येखेनक्याई ढीक्टा घीरी डुप्कीलाक। 32 घीझ्येरी ॱनाना खोला याहुदापा मेन्गीन मीरीकक्याई लागाला ची ग्याप्कीलाक। धेनी खुङक्याई खोला ॱमेबेप ताङगीलाक धेनी ङोजा पाप्ती छीमाक तोरकीलाक। 33 खुङक्याई खोला ताजाक श्युरती सेगीलाक धेनी श्याक्मो सुम्बागोला खो ॱलार सो़न्गीलाक।” 34 हीना ङेनेक्याई देक्या घीन्दा ॱहामाघोपालाक। खुङक्याई क्षीला दे लाबगी दो़न्दाकगो साङ हो़तालाक धेनी खुङक्याई दे लाबक्या घीन्दा शीम ॱमाथुक्पालाक। ॱलोङगीन श्यारा च्यीक ( मेथा २०:२९-३४ ; मारकु १०:४६-५२ ) 35 धा येशु यरीकोगी भोलोक्तु फेप जेपालाक। होदुरु मी श्यारा च्यीक लाम्गागी, शुरला ॱलोङमो ॱलाङी हो़तालाक। 36 मीछोकक्या होदेने डुगीनगो घोरती खी़ “दुरु घी झ्युङीओ?” ॱनेरी ढीवालाक। 37 मीक्याई खोला ॱनेवालाक, “नाजारेतगी येशु देने ॱहाला फेई।” 38 धेनी खी़ देरे ॱनेरी फेरा ग्याप्पालाक, “दावीदगी से येशु, ङाला ॱङीङजे जेरोनाङ।” 39 दोङला हो़गीनक्याई खोला खाबा धो़क ॱनेरी आङजी तावालाक। हीना खी़ ॱयोल्ले केक क्षे तो़न्दी फेरा ग्याप्पालाक, “दावीदगी से, ङाला ॱङीङजे जेरोनाङ।” 40 धेनी येशुगी छाम श्या जेदी, खोला ठीक्ती हुङयेला का ॱनावालाक। धेनी खो भोलोक्तु ॱलेप्ती, खोङबागी खोला ढीवा जेपालाक, 41 “ङा ख्यी़ क्षीला घी झ्यीगीनगो दो़दी हेतो?” खी़ ॱनेवालाक, “चोवो, ङा ॱमीक थोङी दो़दीक।” 42 धेनी येशुगी खोला सुवालाक, “ख्यो़ थोङवा स्योक। ख्यो़री धेपागी ख्यो़ला चो़गा झ्येवालाक।” 43 धेनी लाम्साङ खो थोङगीन झ्युवालाक। धेनी को़न्क्षोकगी तो़टा ताङी, खो खोङबागी स्याम्ला डावालाक। दे थोरी मी घीरीगी को़न्क्षोकला तो़पा पुवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.