लुका 16 - ॱलोवाॱङेरपा च्यीकगी पे 1 येशुगी राङगी ङेनेक्याला सुवालाक, “मी क्षुक्पु च्यीकला ॱङेरपा च्यीक हो़तालाक। खी़ ग्युनोरगो ॱङेरपागी़ ॱयारी धेगीनगो, मीक्याई खोला स्येबालाक। 2 धेनी खी़ ॱङेरपागोला भो़री ॱनेवालाक, ‘ख्यी़ कोरला ङी घोरकीन दे घी ले? ख्यी़ लेगा झ्येजागी चीगो ङाला तेर घीझ्येरी ॱनाना धीरीङने ॱहाला, ख्यो़ ङी ॱङेरपा झ्युङगुमालाक।’ 3 धेनी ॱङेरपागी़ साम्लो तावालाक, ‘धा, ङा घी झ्यीये घीझ्येरी ॱनाना ङी दाक्पोगी ङाला दे लेगाने पी़दी झाङये झ्यीदीक। सा ॱलोक्येला ङाला आङबु मेक धेनी ॱलोङमो ॱलाङयेला ङा ङोछी। 4 धा ङाला दे लेगाने पी़दी झाङना, मीक्याई ङाला खोरी नाङदु सुयेला, ङी घी झ्यीघोगुले ॱनेरी, ङी साम्लो तासाहो़क।’ 5 धेनी खी़ खोरी दाक्पोगी भुलीन्पा रे-रेला भो़री धाङपोगोला ॱनेवालाक, ‘ख्यी़ ङी दाक्पोला भुलीङ घाजो़ ज्याङ घोये हेतो?’ 6 खी़ ॱनेवालाक, ‘मुगु जामा ग्यागी भुलीङ हो़क।’ धेनी खी़ ॱनेवालाक, ‘ख्यी़ ची श्याक्कीन धेप लेन धेनी ग्योक्जे धेदी, जामा ॱङापच्यु ढीक।’ 7 धेनी श्येम्मागोला ॱनेवालाक, ‘ख्यी़ भुलीङ घाजो़ हेतो?’ खी़ ॱनेवालाक, ‘ढो बोङरे ग्या हो़क।’ ॱङेरपागी ॱनेवालाक, ‘ख्यी़ ची श्याक्कीन धेप लेन धेनी बोङरे ग्याच्यु ढीक।’ 8 धा दाक्पोगी़ होदे ॱङेरपा मेढाङाला राङगी क्षीला, देरे चाङग्यु झ्यीगीनगोला तो़टा तावालाक। घीझ्येरी ॱनाना दे जीक्तेनगी मीक्या राङगी च्योक्रेक्यामुला चाङग्यु झ्यीयेला, हो़गी टुक्याने खेवा हो़तालाक। 9 ङा खेक्याला ॱनाहीन ख्यो़री क्षीला जीक्तेनगी ग्युनोर भो़चे झ्येरी रोवाक्या शो़ धेनी होदे ग्युक्या जोक्साना, खुङक्याई ख्यो़ला थामेगीन ॱनेसाला सुगीलाक। 10 “दो़न ङ्युङाला ढाङा हो़गीनगो नी, माङालाः ढाङा हुङालाक। धेनी दो़न ङ्युङाला मेढाङा हो़गीनगो माङालाः मेढाङा हुङालाक। 11 होझ्येरी खेक्या जीक्तेनगी ग्युला मेढाङा हो़ना, खेक्याला ग्युनोर ॱङोन्नेगी आङजा सी़ तेरकीलाक से? 12 धेनी खेक्या मी श्येम्मागी ग्युला ढाङपो माझ्ये हो़ना, खेक्याला राङगी ग्यु सी़ तेरकीलाक से? 13 “ॱयोक्पो च्यीकगी दाक्पो ॱङीला श्याप्तोक पु ॱमीथुक्वालाक घीझ्येरी ॱनाना खी़ याङना च्यीकला ॱमेथेदा झ्येरी श्येम्मागोला चेवा झ्यीगीलाक। याङना च्यीकला चीरी श्येम्मागोला यामे ताङगीलाक। खेक्या को़न्क्षोक धाङ ग्युनोर ॱङीगारागी श्याप्तोक पु ॱमीथुक्कीलाक।” 14 धा ग्युनोरला सेम क्षाक्कीन फारुसीपाक्याई, दे घीरी घोरती खोङबाला ॱमेज्यु तावालाक। 15 खोङबागी होदेक्याला सुवालाक, “मीक्याई दोङदु राङला ढाङपो तो़न्गीनगो, खेराङक्याराङ लाक हीना को़न्क्षोकगी खीकी सेम खेन्दालाक। मीक्याई दोङदु थोवा चीगीनगो, को़न्क्षोकगी शीक्ताङला आम्लोवा हुङालाक।” येशुगी कालोप श्येम्माक्या 16 क्षो़ठीम धाङ ॱङो़नस्येखेनक्या योहान्नागी धी़ थुक्पे च्यीगा सेटाक झ्येवालाक। धेनी होदे धी़चो़ने, को़न्क्षोकगी ग्यासीगी ताम्शाङगो सेटाक झ्ये हो़तालाक। धेनी मी घीरी होदे नाङदु जुयेला छाङगा ग्यालाक। 17 ॱनाम धाङ सा ॱङी येरी डुगीलाक हीना क्षो़ठीमगी छीक च्यीया येगीमालाक। 18 खोरी केमीला भोरती श्येम्मामुला ॱनामा लेन्ना, होदेगी लोक्येम झ्यीदालाक धेनी राङगी ख्योवाने, खा डागीन केमीमुला ॱनामा लेन्गीन मीगीया लोक्येम झ्यीदालाक। मी क्षुक्पु धाङ लाजार 19 याङ येशुगी सुवालाक, “श्याक्मो डाङी कीपो तारी घो़छेन धाङ थेरमागी घो़ घो़न्गीन, मी क्षुक्पु च्यीक हो़तालाक। 20 धेनी ॱमागी तुम्दा लाजार ॱनागीन मी उटे च्यीक खी़ घोच्चारु श्यालाक। 21 होदे क्षुक्पु मीगी सोच्योकने, ल्हीम्ला शामाक्या शायेला खो रेवा झ्यीदालाक। धेनी कीक्या होरी खी़ ॱमाक्या दालाक। 22 “धेनी उटे मीगो स्यीवालाक धेनी नाम्खे भाङछेनक्याई, खोला खेरती आब्राहामगी भोलोक्तु श्याक्पालाक। धेनी होदे क्षुक्पु मीगोवा स्यीरी रोगो सा होकला बेवालाक। 23 धेनी ॱङ्यावादु ॱलेप्ती ॱमीच्यीकी दुक्पु राक्ई घाङला, खी़ तो़ला तेवालाक धेनी थाक्रीङादु आब्राहाममुला लाजारला थोवालाक। 24 धेनी क्षुक्पु मीगी़ फेरा ग्याप्ती ॱनेवालाक, ‘याप आब्राहाम, ङाला ॱङीङजे जेदी लाजारला झाङरोनाङ धेनी खी़ खोरी जुगो क्षुला चुक्ती, ङी च्येमो सीसाई जेदु च्युक्रोनाङ। घीझ्येरी ॱनाना ङाला मेचे दी नाङला ॱमीच्यीकी दुक्पु क्षे दुक।’ 25 हीना आब्राहामगी सुवालाक, ‘भीजाओ, ख्यो़ सो़न्पो हो़ती घाङला शाङा थोप्कीन धाङ लाजारला दुक्पु थोप्कीनगो ढेन्सो़ झ्यी। हीना धान्दा खोला दुरु कीपो दुक धेनी ख्यो़ला दुक्पु दुक। 26 होदे च्यीगा मेन्दा, देने सुवा ख्यो़चारु डो ॱमीथुक्ये धाङ होदेने हीकी चारु सुवा हुङ ॱमीथुक्येला, ख्यो़ धाङ हेक्याई घुङदु ॱमीच्यीकी क्षे दोङ-दोङ हो़तालाक।’ 27 धेनी खी़ ॱनेवालाक, ‘याप, देरे हीन्ना ङा खेराङला श्योवा पुलाहीन। खेराङगी लाजारला ङी आकीगी खाङबाला झाङरो ॱनाङ। 28 घीझ्येरी ॱनाना ङाला पी़न ॱङा हो़क धेनी खुङक्याला दा ताङदु ताङा जे। मेन्ना खुङक्याः दे दुक्पु राक्कीन ॱङ्यावाला ॱलेप्टु।’ 29 “हीना आब्राहामगी सुवालाक, ‘खुङक्याईमुला मोशे धाङ ॱङो़नस्येखेनक्याई ढीक्टा धेबक्या हो़तालाक। खुङक्याई होदे ङेन्दास्योक।’ 30 खी़ ॱनेवालाक, ‘मालाक, याप आब्राहाम, स्यीम्बुक्याने च्यीक खुङक्याचारु डोना, खुङक्याई खोरी धीक्पा पारी सेम ग्युरकीलाक।’ 31 आब्राहामगी खोला सुवालाक, ‘मोशे धाङ ॱङो़नस्येखेनक्याई सुङला, खुङक्याई मेङेन्ना स्यीम्बुक्याने च्यीक सो़न्दी डोनाः, खुङक्याई यीच्चे मीझ्यीगीलाक।’” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.