लुका 12 - ॱलोवाङेन्ता धाङ सेमस्युक ( मेथा १०:२६-२७ ) 1 होदे घाङला मी तोङडाक माङा येशुचारु जोम्दी, च्यीकगी च्यीकला छाङगा ग्याप्ती, काङबी ॱलेये झ्येवालाक धेनी येशुगी एन्ला खोरी ङेनेक्याला सुवालाक, “फारुसीपाक्या खाने लाब च्यीक हीना लेगा श्येम्मा झ्यीगीन झ्येरी, देरे क्युरचीने शाप-शाप झ्येरी धो़क। 2 ॱङो़न्दु मीग्युरकीन घीया माबे हो़तालाक धेनी स्येये हीन्गीन घीया सारी माश्या हो़तालाक। 3 होझ्येरी खेक्याई मी़नाक्पाला ॱनेना लाबक्या, हो़क नाङदु घोरकीलाक। धेनी खीम बुकने खाबा ॱनेना लाबक्या, नाङगी थोक्ने सेटाक झ्यीगीलाक। 4 “ङी रोवाक्याओ, ङा खेक्याला ॱनाहीन ली़ च्यीगा से थुप्कीन धेनी होदे स्याम्ने श्येम्मा घीया झ्यी ॱमीथुप्कीन मीक्याला खेक्या माजीक। 5 हीना खेक्या सुला जीक घो़गुले ॱनेरी ङी तो़न्दु। ली़ सेसारती स्याम्ला ॱङ्यावादु ॱयुक्येगी वाङ हो़गीन, खोङबा को़न्क्षोकला जीक। ङा खेक्याला ॱनाहीन, खोङबाला जीक। 6 धा खाङ झीउ ॱङाला आले ॱङी ॱमीखुक्की ले? हीना देक्याने च्यीया को़न्क्षोकगी ढेन्बा माजे हो़तालाक। 7 धेनी खीकी गोवी ॱराक्या रे-रे, ढाङगा ची हो़तालाक। होझ्येरी खेक्या माजीक। खेक्या नी ॱमीच्यीकी माङा खाङ झीउक्याने, खाक्क्षे लाक। 8 “ङा खेक्याला ॱनाहीन, मीक्याई दोङदु ङाला खेलेन्गीनक्याला मी-भुगीयाः, नाम्खे भाङछेनक्याई दोङदु खे लेन्गीलाक। 9 हीना मीक्याई दोङदु ङाला खे मेलेन्गीनक्याला, नाम्खे भाङछेनक्याई दोङदु खे मेलेन्गीलाक। 10 मी-भुला ॱमेटा छीक च्यीक ताङना, होदेला घोयाङ थोप्कीलाक हीना धाम्पे थुक्ङीगी कोरला कुरवा धेप्कीनला, घोयाङ ॱमेथोप्कीलाक। 11 “खेक्याला छोक्खाङक्या धाङ पो़न्पोक्या धाङ वाङग्युर झ्यीगीनक्या दोङदु ठीक्ती हुङी घाङला, राङला घाङगी झ्येरी क्योप्ये याङना घी ॱनाघोगुले ॱनेरी दुङा माझ्यी। 12 घीझ्येरी ॱनाना होदे धी़चो़लाराङ खेक्याई ॱना घो़गीनगो, धाम्पे थुक्ङीगी खेक्याला ॱलावा जेगीलाक।” क्षुक्पु मी ॱलेन्पा च्यीकगी पे 13 धेनी मीछोकगी खोक्ने मी च्यीकगी येशुला श्यी़वालाक, “ॱलोपो़न ला, ङी कादागी थोप्ताङगो, ङाला घो़री तेर ॱनेरी ङी आज्योला सुङाजे।” 14 धेनी येशुगी सुवालाक, “रोवाओ, ख्यी़ खाला ठीम झ्यीये याङना ग्यु घो़गीन, ङाला सी़ को़जो?” 15 खोङबागी होदेक्याला सुवालाक, “शाप-शाप झ्यी, ॱहाबा झ्यीगीन लेगाक्याने च्याङजे झ्येरी धो़क, घीझ्येरी ॱनाना मीगी मीछे खोरी ग्यु माङा हो़गीनला च्यीगा रा मीली़लालक।” 16 धेनी खोङबागी देक्याला पे च्यीक सुवालाक, “मी क्षुक्पु च्यीकगी श्यीङला लोदोक ॱमीच्यीकी घा झ्युवालाक। 17 होदे मीगी साम्लो तावालाक, ‘धा ङा घी झ्यीये हीन्ढी़? ङी लोदोकक्या श्याक्सा घारुवा मीदुक।’ 18 धेनी होदेगी ॱनेवालाक, ‘ङा देरे झ्यीयेहीन। ङारी भाङखाङगो स्यीक्ती, होदेने क्षे शोयेहीन धेनी ङी लोदोक धाङ ग्युनोर घीरी होदुरु श्याक्येहीन। 19 धेनी ङा ङाराङला ॱनायेहीन, “लो ॱमीच्यीकी माङागी क्षीला, ख्यी़ ग्यु साक दुक। धा ल्हो़ झ्यी धेनी शा-थुङ, कीपो तोङ।”’ 20 “हीना को़न्क्षोकगी होदेला सुवालाक, ‘ॱलेन्पो ख्यो़! धीरीङ छेमुराङ ख्यी़ छेसोक ख्यो़ने लेन्गीलाक धेनी ख्यी़ स्याम्दी श्याकश्या ग्युक्याई दाक्पो सु झ्युङगीले?’” 21 येशुगी सुवालाक, “राङगी क्षीला ग्युनोर साक्कीन हीना को़न्क्षोकगी ॱमीक्वादु क्षुक्पु मेगीनगो, होदे मी च्योक्रेराङ लाक।” दुङा माझ्यी ( मेथा ६:२५-३४ ) 22 धेनी येशुगी राङगी ङेनेक्याला सुवालाक, “होझ्येरी ङा खेक्याला ॱनाहीन, ख्यो़री ॱरोकगी क्षीला घी शाये धाङ ख्यी़ ली़गी क्षीला घी घो़न्ये ॱनेरी दुङा माझ्यी। 23 घीझ्येरी ॱनाना शामाला खाक्क्षे ॱरोक लाक धेनी घोलाकने खाक्क्षे ली़ लाक। 24 खोरोकक्याला तो़दाङ। देक्या श्यीङ ताप्ये याङना ॱङाये मीझ्यीदालाक। धेनी डुखाङ धाङ भाङखाङला मेश्यालाक हीना को़न्क्षोकगी देक्याला शाये ॱनाङालाक। धा खेक्या झ्याक्याने ल्हाक ॱमीच्यीकी खाक्क्षे लाक। 25 खेक्याने सी़ दुङा झ्येरी राङगी छेगी खाला, क्षुजी च्यीक ॱनो़न्गा ग्याप थुप्कीलाक से? 26 खेक्या देरे च्यीमे लेगा च्यीया झ्यी ॱमीथुक्कीन झ्येरी, श्येम्मा लाबक्याई क्षीला घीझ्येरी दुङा झ्यीदाले? 27 पाङगी मेन्तोकला तो़दाङ। देक्या काल्ले मेग्यालाक धेनी बा ॱमेखालालाक। हीना ङा खेक्याला ॱनाहीन, सोलोमोनगी खोरी ग्युनोर घीरीनेयाः, दे मेन्तोकक्याने च्यीक च्योक्रे घो़ जेवा घो़न माङ्युङबालाक। 28 ख्ये धेपा च्युङा हो़गीनक्याओ, धीरीङ दुरु हो़गीन हीना ॱङेटो मेला चुक्ये हीन्गीन थाङगी चाक्याला, को़न्क्षोकगी घो़ को़न जेना होदेक्याने ल्हाक खेक्याला को़न्दा जेगीमाले? 29 घी शाये याङना घी थुङये ॱनेरी, खेक्या चारी माधेक धेनी दुङा माझ्यी। 30 घीझ्येरी ॱनाना जाम्बुलीङगी मीक्या देक्या चालालाक। धेनी खेक्याला देक्या घो़लालाक ॱनेरी खीकी यापगी खेन्दालाक। 31 हीना को़न्क्षोकगी ग्यासी चो धेनी देक्या घीरी खेक्याला ॱनाङगीलाक।” 32 “ख्ये ख्यु च्युङाक्याओ, माजीक घीझ्येरी ॱनाना ग्यासीगो खेक्याला ॱनाङयेला खीकी याप थुक्ङेउ जेदालाक। 33 ख्यो़री ग्युनोर चोरी उटेक्याला झ्यीम्बा तोङ। ख्यो़री क्षीला ॱङीङबाला मेडोगीन खुमाक शो़। होदे नाङदु नामाः मेजोक्कीन ग्युनोर, नाम्खे श्यीङखामदु साक्ती श्योक। होदुरु कुमा मेयोङालाक धेनी मुक्पागी मेशालाक। 34 घीझ्येरी ॱनाना खेरी ग्यु घारु हो़जारु, खेरी सेमगोवाः क्षाक्कीलाक।” चोवो फेप्येला डाढीक झ्येरी धो़क 35 “श्याप्ची श्युयेला खीकी केराक रेरी, खीकी क्युङगो पारती श्योक। 36 खोराङक्याई दाक्पो ॱनामा लेन्साने नाम लोक्ती हुङमेयोङ, ॱनेरी घुक्ती धेगीन धाङ घो दुङी घाङला, लाम्साङ घो पेगीन ॱयोक्पोक्या च्योक्रे खेक्या झ्युङघोगीलाक। 37 धेनी दाक्पोगो नाङला लोक्ती हुङी घाङला ॱयोक्पोक्या, ॱङी मालोक्वा धेगीन थुक्ना होदे ॱयोक्पोक्या झ्यीलाप क्षे लाक। ङा ॱङोन्ने खेक्याला ॱनाहीन, होदे दाक्पोगी़ राङगी केराक रेरी, ॱयोक्पोक्याला शामा शायेला धेदु च्युक्ती खुङक्याई श्याप्ची श्युगीलाक। 38 दाक्पोगो छेनगी धी़ ॱङीवा याङना सुम्बाला लोक्ती हुई घाङला, ॱयोक्पोक्या ॱङी मालोक्वा धेगीन थुक्ना, होदे ॱयोक्पोक्या झ्यीलाप क्षे लाक। 39 हीना खेक्याला दे क्षा हुङघो़गीलाक, कुमु हुङगीन धी़चो़गो दाक्पोला एन्दुरु क्षा हो़ना, खी़ खोरी नाङदु कुमु ज्युरु च्युक्ये मेक। 40 खेक्याः डाढीक झ्येरी धो़क घीझ्येरी ॱनाना खेक्याई ॱमासाम्गीन धी़चो़ला मी-भु फेप्कीलाक।” 41 धेनी पेटोगी ढीवालाक, “चोवो, पे दे हेक्याला च्यीगा सुङाले याङना घीरीगी क्षीला सुङाले?” 42 चोवोगी सुवालाक, “धा दाक्पोगी राङगी नाङमीक्याला धी़चो़ ताक-ताकला राङ-राङगी कादागी शामा तेरयेला को़का, ॱङेरपा ॱलो काथुप्कीन धाङ स्येरापचेनगो सुले? 43 दाक्पोगो लोक्ती हुङी घाङला, खी़ होदे झ्येरी धेगीनगो थुक्ना, होदे ॱयोक्पोगो झ्यीलाप क्षे लाक। 44 ङा धेन्पाराङ खेक्याला ॱनाहीन, दाक्पोगी़ राङगी ग्युनोर घीरीगी खाला खोला आङजा तेरकीलाक। 45 हीना ‘ङी दाक्पोगो हुङयेला घोरकीलाक’ ॱनेरी साम्दी श्येम्मा ॱयोक्पो-ॱयोक्मोक्याला दुङये गो चुक्ती धेनी खोराङ शा-थुङ झ्येरी शीरी धेना, 46 होदेगी ॱमासाम्गीन ङीमा धाङ ॱहामाघोगीन धी़चो़ला दाक्पो हुङगीलाक। धेनी खोला दुबु-दुबुला तुप्ती, धेपा मीझ्यीगीन मीक्यामुला ॱयुक्कीलाक। 47 “खोरी दाक्पोगी थेगीनगो ॱहाघोतीयाः डाढीक माझ्येवा, दाक्पोगी थेगीन च्योक्रे मीझ्यीगीन ॱयोक्पोला दुङदाक छाप्क्षे फोक्कीलाक। 48 हीना दाक्पोगी थेगीनगो ॱमेस्येगीन ॱयोक्पोगी़, दुङ घो़गीन लेगा झ्यीना खोला दुङदाक ङ्युङा फोक्कीलाक। माङा थोप्थाक्याने माङा लेन्गीलाक धेनी माङा ची ग्यापक्याने माङा ॱलाङगीलाक।” श्यीदे मेन्दा खा डागीन ( मेथा १०:३४-३६ ) 49 येशुगी सुवालाक, “ङा जीक्तेनदु ठीम्चो़गी मे पारतु होवाहीन। होदे मे एन्दुरु बारसा हो़ना ढीक्येहो़क। 50 ङा ठी़सो़ च्यीक लेन्घोये हो़क। होदे ठी़सो़ माडुप थुक्पे, ङाला ॱमीच्यीकी ङ्या क्षे दुक। 51 ङा जीक्तेनदु श्यीदे क्यारु होवाहीन ॱनेरी ॱमासाम। ङा श्यीदे क्यारु होवामेन हीना मालाक ङा खेक्याला ॱनाहीन, ङा खा टारु होवाहीन। 52 घीझ्येरी ॱनाना धा, देने ॱहाला खाङबा च्यीकदु नाङमी ॱङा हो़ना, होदेक्या ॱयेवा बेरी, मी सुम ॱङीगी धेनी ॱङी सुमगी डाला लाङगीलाक। 53 आकी भीजा धाङ भीजा आकीला धेनी आमा भोमो धाङ भोमो आमाला धेनी आमा ॱनामा धाङ ॱनामागी आमाला झ्येरी ॱयेवा बेरी डाला लाङगीलाक।” धी़चो़गी ताक्चा ( मेथा १६:२-३ ; ५:२५-२६ ) 54 धेनी येशुगी मीमाङक्याला सुवालाक, “खेक्या नुप स्योकला ॱरीङ खोरका थोङना उक्कुरा ॱनालाक, ‘क्षावा ग्याप्ये दुक।’ धेनी होदेराङ झ्युङालाक। 55 धेनी ल्हो स्योकगी ॱलुङबु ग्याप्ना खेक्या ॱनालाक, ‘छाबा छागीलाक।’ धेनी होदेरे झ्युङालाक। 56 खे शोक्पोक्याओ, खेक्या ॱनाम धाङ साला तेरी ॱनामस्यी घारे हुङगीलाक ॱनेरी ॱना थुक्ना, धान्दागी धी़गी ताकक्या खेक्या घीझ्येरी ॱहामेघोराले? 57 राङगी क्षीला ढाङा घीन्गो ले ॱनेरी, घीझ्येरी थाक चे ॱमीथुवाले? 58 ख्यो़ राङगी खाम्जु थुप्कीनमुला ठीम्पो़नचारु डी़ घाङला, लाम्गाला राङ खी़मुला थी़न्ये थापस्यी झ्यी। देरे माझ्येना होदेगी ख्यो़ला ठीम्पो़नचारु ठीक्ती डुगीलाक धेनी ठीम्पो़नगी ख्यो़ला घोचेगी लागाला ची ग्याप्कीलाक धेनी घोचेगी ख्यो़ला चो़न्खाङदु धाक्कीलाक। 59 ङा ख्यो़ला ॱनाहीन, श्युक्योकगी घोमो च्यीकगो माज्याङगीन थुक्पे, ख्यो़ होदेने फीला थारकीमालाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.