लुका 10 - ॱलोवायेशुगी ङेनेक्या झावा 1 होदे स्याम्ने, चोवोगी श्येम्मा मी धी़न्चु धो़न्ङीला दामा जेपालाक धेनी खुङक्याला मी ॱङी-ॱङी झ्येरी, खोङबाराङ फेप्ये जेगीन ग्याजा धाङ यु घीरीला खोङबागी एन्ला झावालाक। 2 खोङबागी देक्याला सुवालाक, “तो़न्दोक माङा दुक हीना मीलाकक्या ङ्युङा दुक। होझ्येरी तो़न्दोकगी चोवोला, राङगी तो़न्दोकगी क्षीला मीलाक ताङरोनाङ ॱनेरी सोवा धेप। 3 धा सोङ, ङा खेक्याला चुङगुक्या खोकला लुक्टु च्योक्रे झ्येरी ताङाहीन। 4 खीकीमुला आले धाङ खुमाक धाङ पोल्ले ॱमाखेर धेनी लामला थुक्कीन सुलाः छाम्डी माश्यी़। 5 खेक्या जुजा नाङगोरु एन्ला देरे ॱनो़, ‘दे खाङबाला श्यीदे भाबास्योक।’ 6 होदे नाङदु श्यीदेगी मी हो़ना, खेक्याई श्यीदे खोला ॱनेगीलाक हीना मेना होदे खेक्याला राङ लोक्ती हुङगीलाक। 7 धेनी होदे नाङदुराङ घी तेरकीनगो, शा-थुङ झ्येरी धो़क। घीझ्येरी ॱनाना लेगा झ्यीगीनला खोरी ॱलाज्या थोप घोगीलाक। धेनी खाङबा च्यीकने श्येम्माला माडो। 8 “खेक्या ग्याजा च्यीकला जुरी, होदेगी मीक्याई खेक्याला ॱनेचाङ ॱयारना खीकी दोङदु घी श्याक्कीनगो शो। 9 होदुरु हो़गीन नेपाक्याला चो़गा झ्यी धेनी होदेक्याला ॱनो़, ‘को़न्क्षोकगी ग्यासी खीकी ङ्येला ॱलेप्सादुक।’ 10 हीना खेक्या ग्याजा घारु जुली, होदेगी मीक्याई खेक्याला ॱनेचाङ ॱमेयारना होदेगी ॱराङगाकक्याला सोरी देरे ॱनो़, 11 ‘हीकी काङबी थीला गो़गा खीकी ग्याजागी थालागोवा खेक्याला ॱरुक्वाहीन।’ घीहीन्ना दे ॱहाघोरा झ्यी, ‘को़न्क्षोकगी ग्यासी ङ्ये ॱलेप्सादुक।’ 12 ङा खेक्याला ॱनाहीन, ठीम चेगीन ङीमाला सादोम ग्याजाने ल्हाक, दे ग्याजा देला ठीम फोक्कीलाक। 13 “ख्यो़ कोराजीन ॱङ्याली! ख्यो़ बेथसेदा ॱङ्याली! घीझ्येरी ॱनाना खीकी घुङदु झ्युजुवा ॱहाङसागीन लेगाक्या, ताएर धाङ सीदोनदु झ्युङहो़ना खुङक्याई चारे घो़न्दी, घोक्था ढी़री एम्मानेराङ धीक्पा पारी सेम ग्युरहो़टु। 14 हीना ठीम चेगीन ङीमागोला ताएर धाङ सीदोनने ल्हाक खेक्याला ठीम फोक्कीलाक। 15 धेनी काफारनाहुमगी मीक्याओ, खेक्या नाम्खे श्यीङखामदु ताक्टु सामी? मालाक, खेक्या ॱङ्याल्वे तीङला डुगीलाक।” 16 येशुगी ङेनेक्याला सुवालाक, “खेक्याला ङेन्गीनगी़ ङाला ङेन्गीलाक। धेनी खेक्याला खेमेलेन्गीनक्याई ङाला खेमेलेन्दालाक धेनी ङाला खेमेलेन्गीनक्याई ङाला ताङगीनला खेमेलेन्दालाक।” ङेनेक्या लोक्पा 17 धा ङेने धी़नच्यु धो़न्ङीक्या ङ्यामो घेरी, लोक्ती होरी ॱनेवालाक, “चोवो, खेराङगी छेनगी थोक्ने ॱनो़पाक्याः हीकी खाला ङेन्दी।” 18 येशुगी होदेक्याला सुवालाक, “ङी नाम्खे श्यीङखामने ॱलोकख्युकगी हो़क ग्याप्कीन च्योक्रे, सातान ल्हीम्दी हुङगीनगो थोजुङ। 19 ङी खेक्याला डु धाङ धीक्पा राचाकक्याला काङबी ॱलेये धाङ डागी वाङ घीरीगी, खाला आङजा तेरहो़क धेनी घीन्गीया खेक्याला ॱनो़ क्यागीमालाक। 20 घीहीन्ना ॱनो़पाक्या खीकी खाला ङेन्दी ॱनेरी, देला ङ्यामो माघा हीना नाम्खे श्यीङखामदु खीकी मीङ ढीक्कीनगोला ङ्यामो घो़।” 21 होदे घाङला येशु धाम्पे थुक्ङीगी थोक्ने ङ्यामो घेरी सुवालाक, “नाम्खा धाङ जाम्बुलीङगी चोवो, ङी याप, खेराङला ङा तो़टा पुलाहीन। घीझ्येरी ॱनाना खेराङगी दे लाबक्या खेवाक्या धाङ रीक्पा च्याङाक्याने साङा जेदी, टुवाक्याला तो़न जेपालाक। लाक याप, देराङ खेराङगी थुकोङ शाङपोगो लाक। 22 “ङी यापगी ङाला घीरी ॱनाङा जे हो़तालाक। यापगी माना सेला सी़या ॱमेस्येलालाक। याङ से धाङ सेगी तो़न्ये दो़पा जेगीन मीक्या माना, याप सु हीन्गीनगो सुला स्येये मेतालाक।” 23 धेनी खोङबागी ङेनेक्याई स्योकला शीक्ती खुङक्याला शुरला सुवालाक, “खेक्याई घी थोथागो थोङगीन ॱमीकक्या झ्यीलाप क्षे लाक। 24 घीझ्येरी ॱनाना ङा खेक्याला ॱनाहीन, खेक्याई घी थोथागो थोङये धाङ खेक्याई घोकोवागो ङेन्येगी दो़पा, ॱङो़नस्येखेनक्या धाङ ग्यावु माङागी दो़पालाक हीना ॱमाथोवालाक धेनी माघोपालाक।” सामारीपा च्यीकगी पे ( मेथा २२:३४-४० ; मारकु १२:२८-३१ ) 25 ङीमा च्यीक क्षो़ठीमगी ॱलोपो़न च्यीकगी, येशुला छो़ता झ्यीयेला लारी ॱनेवालाक, “ॱलोपो़न ला, थामेपे छेसोक थोप्येला ङी घी झ्यीघो़गुले?” 26 धेनी खोङबागी खोला सुवालाक, “क्षो़ठीम नाङदु घी ढीक्दो? ख्यो़ घाङ झ्येरी ढोक्ई हेतो?” 27 धेनी खी़ ॱनेवालाक, “ख्यो़ ख्यो़री चोवो को़न्क्षोकला, ॱङीङ तीङने धाङ सेमगी तीङने धाङ राङगी तोप घीरीने धेनी राङगी नी़पा घीरीने चेवा झ्यी। धेनी राङगी खीम्चेला, राङला च्योक्रे चेवा झ्यी।” 28 धेनी खोङबागी खोला सुवालाक, “ख्यी़ धेन्पा ॱनेजुङ। धा ख्यो़ देरे झ्यी धेनी ख्यो़ सो़न्पो ॱनेगीलाक।” 29 हीना खो राङला ढाङपो हो़क ॱनेरी खुङ क्यायेला येशुला श्यी़वालाक, “धा ङी खीम्चेगो सुले?” 30 येशुगी सुवालाक, “मी च्यीक येरुसालेम ग्याजाने येरीको स्योकला डी़ हो़तालाक। धेनी खो झ्याक्पाक्याई लाक्पाला ठेपालाक। धेनी खुङक्याई खी़ घोलाकक्या रारी पी़दी धेनी खोला धुरी, ॱमास्यी चो़ शो़री भोरती सोवालाक। 31 धा होदे लाम्गाने क्षो़पो़न च्यीक डोगीन खाप्तु ग्याप्पालाक। धेनी खी़ खोला थोरी लाम श्येम्माने सोवालाक। 32 देरेराङ झ्येरी लेवी च्यीक, होदे साजारु होरी खोला थोरी लाम श्येम्माने सोवालाक। 33 हीना सामारीपा डुवा च्यीक खो हो़जारु ॱलेप्पालाक। धेनी खी़ खोला थोरी ॱङीङ झ्येवालाक। 34 धेनी खो होदे मी डामदु सोरी, खी़ ॱमाला ॱनुम धाङ घुन्क्षाङ ॱलुक्ती रेगी दाम्बालाक। धेनी खी़ खोला राङगी भुङगु खाला क्यो़न्दी डो़न्खाङ च्यीकदु खेरपालाक धेनी खी़ दाक्पो ग्याप्पालाक। 35 धेनी ॱङेटोगो खी़ ॱङुगी टाङगा ॱङी तो़न्दी, डो़न्खाङगी दाक्पोला तेरती ॱनेवालाक, ‘खोला दाक्पो ग्याप्रो झ्यी धेनी देने माङा डोसोङ डोना, ङा लोक्ती हुई घाङला ख्यो़ला कीपा तेरु’।” 36 धेनी येशुगी ढीवालाक, “ख्यी़ साम्लोला, दे सुमने झ्याक्पाक्याई लागाला ठेठा मीगी़ खीम्चे सु हीन्ढी़?” 37 धेनी क्षो़ठीमगी ॱलोपो़नगी़ ॱनेवालाक, “होदे मीला ॱङीङजे तो़न्गीनगो।” धेनी येशुगी खोला सुवालाक, “ख्यो़ सोङ धेनी देरेराङ झ्यी।” येशु मारथा धाङ मीरीयामगी नाङला 38 धा येशु धाङ खोङबागी ङेनेक्या फेई घाङला, खोङबाक्या यु च्यीक नाङदु फेप्पालाक। धेनी मारथा ॱनागीन केमी च्यीकगी, खोङबाला मोरी नाङदु फेप्सु श्यी़वालाक। 39 मोला मीरीयाम ॱनागीन नुमो च्यीक हो़तालाक। मीरीयाम चोवोगी श्याप डामदु धेदी, खोङबागी कालोप ङेन्दी धे हो़तालाक। 40 हीना मारथा श्याप्ची श्युये लेगाला गो यारी धे हो़तालाक। धेनी मो येशुचारु च्यारती श्यी़वालाक, “चोवो, ङी नुमोगी ङा च्यीगा लेगा झ्यीयेला भोरती श्याक्कीनगो, खेराङ मीशीयाले? ङाला रोवा झ्यीयेला मोला का ॱनाङरो ॱनाङ।” 41 हीना येशुगी मोला लेन जेपालाक, “मारथा, मारथा! ख्यो़ लेगा माङागी कोरला सेम्डा धाङ खोङडो झ्यीदी। 42 हीना घो़गीनगो च्यीक च्यीगा लाक। मीरीयामगी लेगा शाङागो दाम दुक धेनी होदे मोने ठोक्की मालाक।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.