योहान्ना 8 - ॱलोवा1 हीना येशु क्युरुस्यीङगी रीरु फेप्पालाक। 2 ॱङारोक ॱङात्ती याङ, खोङबा क्षो़खाङदु फेप्पालाक। धेनी मी घीरी खोङबागी डुङदु होवालाक धेनी खोङबा श्युक्ती क्षो़ सुवालाक। 3 धा क्षो़ठीमगी ॱलोपो़नक्या धाङ फारुसीपाक्याई लोक्येम झ्यीदी घाङला, शीम्सा केमी च्यीक येशुगी डुङदु ठीक्ती होवालाक धेनी मोला घुङदु ॱलारी, 4 खुङक्याई खोङबाला श्यी़वालाक, “ॱलोपो़न ला, केमी दे लोक्येम झ्यीदी घाङला शीम्सालाक। 5 धा मोशेगी क्षो़ठीमगी होदेरेक्याला धोगोङ श्युरती सो़ ॱनेरी, का ॱनाङ हो़तालाक। होझ्येरी खेराङ घी सुङये हीनो?” 6 खुङक्याई खोङबाला क्यो़न चुक्ये धाङ छो़ घुक्येला खुङक्याई देरे श्यी़वालाक। धेनी येशुगी कुशुक घुक्ती क्षाक्जुपगी साला ढीया जेपालाक। 7 हीना खुङक्याई का श्यी़री धेती घाङला, खोङबा या श्येङदी खुङक्याला सुवालाक, “खेक्याने धीक्पा मेगीनगो एन्ला होरी, मोला धोगोङ श्युरघो़।” 8 धेनी खोङबा धाब्ले कुशुक घुक्ती साला ढीया जेपालाक। 9 हीना खुङक्याई दे घोरती, खुङक्याने गेम्पाने गो चुक्ती, रे-रे झ्येरी लोक्ती सोवालाक। धेनी येशु च्यीका होदुरु लेवालाक धेनी भोमोगोवा खोङबागी दोङदु लेवालाक। 10 येशुगी यार श्येङदी मोला सुवालाक, “भोमो, खुङक्या घाना? सी़या ख्यो़ला ठीम ॱमाचेजे?” 11 मी़ ॱनेवालाक, “चोवो, सी़या ॱमाचेजुङ।” धेनी येशुगी मोला सुवालाक, “धा हाना ङाः ख्यो़ला ठीम ॱमेचे। सोङ धेनी धाब्ले धीक्पा माझ्यी।”] येशु जीक्तेनगी हो़ 12 येशुगी धाब्ले खुङक्याला सुवालाक, “ङा नी जीक्तेनगी हो़ हीन। ङी स्याबाला डागीनक्या मी़नाक नाङला मेडोगीलाक हीना छेगी हो़ थोप्कीलाक।” 13 फारुसीपाक्याई खोङबाला श्यी़वालाक, “ख्यो़ राङगी राङला पाङपो झ्यीदालाक, होझ्येरी ख्यी़ पाङपो धेन्पा मालाक।” 14 येशुगी लेन जेपालाक, “ङी ङाराङला पाङपो झ्यीनाः, ङी पाङपो धेन्पा हीन घीझ्येरी ॱनाना ङा घाने होवा धाङ घारु डोयेगो ङाला स्येयेहो़क। हीना खेक्याई ङा घाने होवा याङना ङा घारु डोये हीन्गीनगो ॱमेस्येलालाक। 15 खेक्या मीगी ङोला तेरी ठीम चेदालाक। हीना ङा सुलाः ठीम ॱमेचेहो़क। 16 घीहीनाः ङी ठीम्चो़ झ्यीना, दे धेन्पा हीन घीझ्येरी ॱनाना दे ङा च्यीगा मेन्दा, ङाला ॱङाक्कीन याप मुला ठीम्चो़ झ्यीदाहीन। 17 खीकी क्षो़ठीमला मी ॱङीगी पाङपो धेन्पा लाक ॱनेरी ढीक्दुक। 18 ङी ङाराङला पाङपो झ्यीदाहीन धेनी ङाला ॱङाक्कीन यापगीया ङाला पाङपो जेदालाक।” 19 धेनी खुङक्याई खोङबाला “ख्यी़ याप घारु हो़ताले?” ॱनेरी ढीवालाक। येशुगी सुङा जेपालाक, “खेक्याई ङाला ङो ॱमेस्ये धेनी ङी यापला ङो ॱमेस्येलालाक। खेक्याई ङाला ङोस्ये हो़ना, ङी यापलाः ङो स्येयेहो़क।” 20 येशुगी सुङ देक्या क्षो़खाङगी ॱङु पुजागी डामदु क्षो़ सुङा जेपालाक। धेनी खोङबागी धी़गो, धोराङा मारीन्बा सी़या खोङबाला माशीम्बालाक। 21 होझ्येरी खोङबागी खुङक्याला सुवालाक, “धा ङा डुगुलाक धेनी खेक्याई ङाला चागीलाक धेनी खेक्या राङगी धीक्पागी नाङदु स्यीगीलाक। ङा घारु डोजारु खेक्या हुङ थुक्कीमालाक।” 22 धेनी याहुदापा पो़न्पोक्याई ॱनेवालाक, “खी़ ‘ङा डोजारु खेक्या हुङ थुक्कीमालाक’ ॱनेरी, खी़ राङगी ॱरोक चेये झ्यीदा हीन्ढी़?” 23 येशुगी खुङक्याला सुङा जेपालाक, “खेक्या होकने हीन धेनी ङा तो़ने हीन। खेक्या दे जीक्तेनगी लाक धेनी ङा दे जीक्तेनगी मेन। 24 खेक्या खेरी धीक्पागी नाङदु स्यीगीलाक ॱनेरी, ङी खेक्याला ॱनेवी। धेनी खेक्याई ‘ङा खोङराङ हीन’ ॱनेरी धेपा मीझ्यीना, खेक्या राङगी धीक्पागी नाङदु स्यीगीलाक।” 25 होझ्येरी खुङक्याई खोङबाला, “खेराङ सु हीनो?” ॱनेरी श्यी़वालाक। येशुगी खुङक्याला सुवालाक, “ङी खेक्याला गोमाने ॱनागीनगोराङ हीन। 26 खीकी कोरला ॱनाये माङा धाङ ठीम चेये, ङाला माङा हो़क हीना ङाला ॱङाक्कीनगो धेन्पा हीन धेनी खोङने ङी घी घोरकीनगो, ङा जीक्तेनला स्येदाहीन।” 27 खोङबागी खुङक्याला यापगी कोरला सुङगीनगो खुङक्याई ॱहामाघोरपालाक। 28 होझ्येरी येशुगी खुङक्याला सुवालाक, “खेक्याई मी-भुला याला ताक्यी घाङला, ‘ङा खोङराङ लाक’ ॱनेरी खेक्याई ॱहाघोरकीलाक। धेनी ङी राङङीला तेन्दी घीया माझ्येवा, हीना यापगी ॱलाप्कीन च्योक्रे स्येगीनगो खेक्याई ॱहाघोरकीलाक। 29 धेनी ङाला ॱङाक्कीनगो ङीमुला हो़क। धेनी ङी च्योई खोङबाला थुक्ङेउ लेगा झ्येजा झ्येरी, खोङगी ङा च्यीका लेरु ॱमाच्युक।” 30 खोङबागी देक्या सुङी घाङला, मी माङागी खोङबाला धेपा झ्येवालाक। आब्राहामगी भुग्युगी कोरला 31 धेनी येशुगी राङला धेपा हो़गीन याहुदापाक्याला सुङा जेपालाक, “ङी काला ॱनेती धेना, खेक्या ॱङोन्नेराङ ङी ङेने लाक। 32 धेनी धेन्पागो खीकी स्येगीलाक धेनी धेन्पागी खेक्याला राङवाङ जेगीलाक।” 33 खुङक्याई खोङबाला श्यी़वालाक, “हेक्या आब्राहामगी भुग्यु हीन धेनी नामा सी़या ढेन्योकला स्योर माङ्युङ। धा खेराङगी हेक्याला ‘खेक्याला राङवाङ जेगीलाक’ सुङगीनगी दो़नगो घी ले?” 34 येशुगी खुङक्याला सुवालाक, “ङा खेक्याला धेन्पा धेनक्याङ ॱनाहीन, धीक्पा झ्यीगीन घीरी धीक्पे ढेन्योक हीन। 35 ढेन्योकगो खीम नाङदु च्योई ॱमेनेलालाक हीना सेगो धी़ तेनगी क्षीला ॱनेलालाक। 36 होझ्येरी सेगी खेक्याला राङवाङ जेना, खेक्याला ॱङोन्ने राङवाङ थोप्कीलाक। 37 खेक्या आब्राहामगी भुग्यु हीन्गीनगो ङाला स्येयेहो़क। घीहीनाः ङी का खेक्याई नाङला ॱने मेता, खेक्या ङाला सेयेगी घोकाप चालालाक। 38 ङी ङाराङगी यापगी डुङदु घी थोङ हो़गीनगो स्येदीहो़क धेनी खेक्या खेरी यापने घी घोरकीनगो झ्यीदालाक।” 39 खुङक्याई “आब्राहाम हीकी याप हीन।” ॱनेरी ॱनेवालाक। धेनी येशुगी खुङक्याला सुवालाक, “खेक्या आब्राहामगी भुग्यु हीन्ना, खेक्या आब्राहामगी घी झ्यीगीनगो झ्यीदी हो़टु। 40 धा ङी को़न्क्षोकगी डुङने घोरकीन धेन्पागो, खेक्याला ॱनेहो़क हीना खेक्या ङाला सेये थापस्यी चालालाक। आब्राहामगी देरे माझ्येवालाक। 41 हीना खेक्या खेरी यापगी झ्यीगीन च्योक्रे झ्यीदालाक।” खुङक्याई खोङबाला ॱनेवालाक, “हेक्या ङ्यालुक मेन। को़न्क्षोकराङ हीकी याप च्यीगारागो हीन।” धी़गी भुग्यु 42 येशुगी खुङक्याला सुवालाक, “को़न्क्षोक खीकी याप हीन्ना, खीकी ङाला चेवा झ्यीयेहो़क घीझ्येरी ॱनाना ङा को़न्क्षोकने होवा झ्येरी, ङा धान्दा दुरु हो़क। ङा राङला तेन्दी होवामेन हीना खोङबागी ङाला ॱङाक्पालाक। 43 ङी ॱनागीन लाबक्या खेक्या घीझ्येरी ॱहामेघोराले? घीझ्येरी ॱनाना खेक्या ङी काला घोम ॱमीथुक्वालाक। 44 खेक्या खेरी याप धी़कगी लाक धेनी खीकी यापगी दो़पा झ्यीयेला खेक्या दो़दालाक। धी़क नी, थोक्मानेराङ ॱरोक चेगीन धाङ धेन्पाला ढेवा घीया मेतालाक घीझ्येरी ॱनाना खी़ नाङ धेन्पा मेतालाक। धेनी खो शोक स्येगीन धाङ शोकगी याप झ्येरी, खी़ शोक स्येदी घाङला राङगी स्यीकाला तेन्दी स्येदालाक। 45 हीना ङी धेन्पागो ॱनेरीया, खेक्या ङाला यी ॱमेक्षेदालाक। 46 खेक्याने सी़ ङाला धीक्पा हो़गीनगी पाङपो झ्यी थुक्कीले? ङी खेक्याला धेन्पागो स्येनाः, खेक्या ङाला घीझ्येरी धेपा मीझ्यीदाले? 47 को़न्क्षोकगी हीन्गीनगी़ को़न्क्षोकगी काला ङेन्दालाक। खेक्याई मेङेन्गीनगी दो़न्दाकगो, खेक्या को़न्क्षोकगी मालाक।” येशु धाङ आब्राहाम 48 याहुदापा पो़न्पोक्याई येशुला ॱनेवालाक, “ख्यो़ सामारीपा लाक धेनी ख्यी़ नाङदु डे जुदुक ॱनेरी, हीकी ॱनागीनगो धेन्पा माले?” 49 येशुगी सुवालाक, “ङी नाङदु डे जु मेतालाक। ङी ङारी यापला कुरती झ्यीदीहो़क हीना खेक्या ङाला ॱमेबेप ताङालाक। 50 ङा ङाराङगी कुरती ॱमेचाहो़क हीना ङी क्षीला कुरती चागीन च्यीक हो़तालाक धेनी खोङबा नी ठीम्पो़न लाक। 51 ङा खेक्याला धेन्पा धेनक्याङ ॱनाहीन, ङी का ॱरुङगीनगी नामाः छीवा मेङ्याङगीलाक।” 52 धेनी खुङक्याई ॱनेवालाक, “धा ख्यी़ नाङदु डे जुदुक ॱनेरी, धान्दा हीकी स्येजुङ। आब्राहाम धाङ ॱङो़नस्येखेनक्या स्यीवालाक हीन्ना ख्यो़ ‘ख्यी़ का ॱरुङगीनगो नामा छीवा मेङ्याङगीलाक’ ॱनेरी ॱनालाक। 53 हीकी याप आब्राहाम ढोवालाक धेनी ॱङो़नस्येखेनक्या ढोवालाक। धा ख्यो़ खुङक्याने खाक्क्षे हीने? ख्यो़ राङला सी़ हीन सामी हो़तो?” 54 येशुगी सुवालाक, “ङी ङाराङला कुरती झ्यीना, ङी कुरती दे दो़न मेगीन झ्युङगीलाक। खेक्याई ‘खोङ नी हीकी को़न्क्षोक लाक’ ॱनेरी ॱनागीन, खोङबा ङी यापगीराङ ङाला कुरती जेगीलाक। 55 खेक्याई खोङबाला ङो ॱमेस्येलालाक हीना ङी खोङबाला ङो स्येलीहो़क। ङी खोङबाला ङो मेस्येहो़क ॱनाना ङा खेक्या च्योक्रे शोक्पो झ्युङगीलाक। हीना ङी खोङबाला ङोस्येलीहो़क धेनी खोङबागी का ॱरुङीहो़क। 56 खीकी याप आब्राहामगी ङी ङीमा थोङङी दो़पालाक धेनी खोङगी थोरी ङ्यामो घेवालाक।” 57 होझ्येरी याहुदापा पो़न्पोक्याई खोङबाला श्यी़वालाक, “ख्यो़ लो ॱङापच्युवाः माशीङबाला आब्राहामला थोङ ङ्युङाले?” 58 येशुगी खुङक्याला सुवालाक, “ङा खेक्याला धेन्पा धेनक्याङ ॱनाहीन, आब्राहाम ॱमाके एन्लाराङ, ङा हो़क।” 59 धा खुङक्याई खोङबाला श्युरयेला धोगोङ धी़वालाक हीना येशु खाबा हीप्ती, क्षो़खाङने फीला थो़न्दी फेप्पालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.