योहान्ना 17 - ॱलोवाराङगी क्षीला येशुगी सोवा ग्याप्पा 1 धेनी येशुगी दे काक्या सुङसारती, नाम्खाला चेन शीक्ती सुवालाक, “के याप, धा धी़ भाप्ती, सेगी खेराङगी शीजे ॱङो़न्येगी क्षीला, खेराङगी सेगी शीजे ॱङो़न्दु जे। 2 घीझ्येरी ॱनाना खेराङगी सेला ॱनाङना घीरीला, खोङगी थामेपे छेसोक ॱनाङयेला, खेराङगी सेला मी घीरीगी खाला वाङ ॱनाङ हो़तालाक। 3 धा थामेपे छेसोक ॱनाना, खेराङ को़न्क्षोक धेन्पाला ङोस्येये धाङ खेराङगी ॱङाक्पे, येशु मास्यीकाला ङो स्येयेगो लाक। 4 खेराङगी ङाला ॱङाक्कीन लेगागो ङी डुप्ती, ङी जीक्तेनदु खेराङगी शीजे ॱङो़न्दु च्युकहो़क। 5 धा के याप, जीक्तेन ॱमाको़ एन्ला ङा खेराङमुला हो़ती घाङला, हो़गीन शीजेराङ धान्दा खेराङगी डुङदु ङाला ॱङो़न्दा जे। 6 “खेराङगी जीक्तेन नाङने ङाला ॱनाङना मीक्याला, ङी खेकी छेन ॱङो़न्दु च्युकहो़क। खुङक्या खेराङगी हीन धेनी खेराङगी खुङक्या ङाला ॱनाङा जेजुङ। धेनी खुङक्याई खेराङगी का ॱरुङदुक। 7 धा खेराङगी ङाला ॱनाङना घीरी, खेराङने हीन्गीनगो खुङक्याई ॱहाघोरदुक। 8 घीझ्येरी ॱनाना खेराङगी ङाला ॱनाङना काक्या, ङी खुङक्याला तेरपाहीन धेनी खुङक्याई होदे खेलेन्दी, ङा नी खेराङने झ्युङगीनगो खुङक्याई ॱङोन्ने स्येदुक। धेनी ङा नी खेराङगी ॱङाक्पालाक ॱनेरी खुङक्याई धेपा झ्येदुक। 9 ङा खुङक्याई क्षीला सोवा ग्यावीहो़क। ङी जीक्तेनगी मीक्याई क्षीदु सोवा ग्यावामेन हीना खेराङगी ङाला ॱनाङना मीक्याई क्षीला, ङा सोवा ग्यावाहीन घीझ्येरी ॱनाना खुङक्या खेराङगी हीन। 10 ङी हीन्गीन घीरी खेराङगी हीन धेनी खेराङगी हीन्गीन घीरी ङी हीन। खुङक्याई नाङ ङा शीजेला ॱङो़म्पाहीन। 11 “धेनी धान्दा ङा जीक्तेन नाङला मेक हीना खुङक्या जीक्तेन नाङला हो़तालाक। ङा नी खेराङगी डुङदु च्याराहीन। धाम्पे याप, खेराङगी ङाला ॱनाङना मीक्या होराङ ॱङीउ च्यीक हीन्गीन च्योक्रे खुङक्या च्यीक झ्युङयेला, खेराङगी छेन थोक्ने खुङक्याला ॱरुङा जे। 12 ङा खुङक्यामुला हो़ती घाङला, खेराङगी ॱनाङना छेनगी वाङ थोक्ने ङी खुङक्याला ॱरुरी क्योप हो़क। सुङरापला सुङगीनगो डुप्येगी क्षीला, तोरये हीन्गीन मीगो माना खुङक्याने च्यीया ॱमातोर हो़तालाक। 13 “धान्दा ङा खेराङगी डुङदु हुङाहीन। ङी घाटो खुङक्याई नाङला खाङयेला, ङा जीक्तेनदु हो़ती घाङला ङारी स्येवी। 14 ङी खेराङगी का खुङक्याला तेरपी हीना जीक्तेनगी खुङक्याला दाङा झ्येवालाक। घीझ्येरी ॱनाना ङा जीक्तेनगी मेन्गीन च्योक्रे, खुङक्या जीक्तेनगी मालाक। 15 खेराङगी खुङक्याला दे जीक्तेनने खेरास्योक ॱनेरी, ङा सोवा ग्यावामेन हीना ङेन्पागोने क्योप्पा जे ॱनेरी ङा श्यी़वाहीन। 16 ङा जीक्तेनगी मेन्गीन च्योक्रे, खुङक्या जीक्तेनगी मेन। 17 धेन्पागी थोक्ने खुङक्याला धाम्पा जे, खेराङगी का धेन्पा हीन। 18 खेराङगी ङाला जीक्तेनदु ॱङाक्कीन च्योक्रे, ङीयाः खुङक्याला जीक्तेनदु ॱङाक्पाहीन। 19 खुङक्याः धेन्पागी गोने धाम्पा झ्युङयेगी क्षीला, खुङक्याई क्षीदु ङी ङाराङला धाम्पा शो़हो़क।” धेपा-झ्यीगीनक्याई क्षीदु येशुगी सोवा 20 “ङी स्याम्ला डागीन मी देक्याई क्षीला च्यीगा मेन्दा, खुङक्याई का स्येगीनगी गोने, ङाला धेपा झ्यीगीन मीक्याई क्षीलाः ङा सोवा ग्यावीहो़क। 21 खुङक्या घीरी च्यीक झ्युङयेगी क्षीला ङा सोवा ग्यावाहीन। के याप, खेराङ ङी नाङ श्युक्कीन धाङ ङा खेराङ नाङ हो़गीन च्योक्रे, खुङक्याः होराङ ॱङीउ नाङ च्यीक झ्युङास्योक। धेनी खेराङगी ङाला ॱङाक्पालाक ॱनेरी जीक्तेनगी धेपा झ्यीदास्योक। 22 होराङ ॱङीउ च्यीक हीन्गीन च्योक्रे, खुङक्या च्यीक हुङयेला, खेराङगी ङाला ॱनाङगीन शीजेगो ङी खुङक्याला तेरहो़क। 23 खुङक्या ॱङोन्ने सेम च्यीकला ग्युरयेगी क्षीदु, ङा खुङक्या नाङ धाङ खेराङ ङी नाङ ॱनेहो़क। धेनी खेराङगी ङाला ॱङाक्पा धाङ खेराङगी ङाला झाम्पा जेगीन च्योक्रे, खुङक्याला झाम्पा जेपालाक ॱनेरी जीक्तेनगी ॱहाघोरकीलाक। 24 “के याप, खेराङगी ङाला ॱनाङना घीरी, ङा घारु हो़जारु ङीमुला हो़गीन धाङ ङी शीजे थोङगीनगो, ङा दो़दीहो़क। दे शीजे दे जीक्तेन ॱमाको़ एन्ला, खेराङगी ङाला झाम्पा जेदी ॱनावाहीन। 25 “के ढाङतेनगी याप, जीक्तेनगी खेराङला ॱमेस्येनाः ङी खेराङला ङोस्येलीहो़क। धेनी खेराङगी ङाला ॱङाक्पालाक ॱनेरी ङेनेक्याई स्येलालाक। 26 खेराङगी ङाला जेगीन चेवा दे, खुङक्याई नाङ ॱनेये धाङ ङा खुङक्या नाङ ॱनेयेगी क्षीदु, ङी खेराङगी छेन खुङक्याला ॱङो़न्दु च्युकहो़क धेनी देरे झ्येरी च्योई ॱङो़न्दु च्युक्येहीन।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.