योहान्ना 12 - ॱलोवायेशु बेथानीरु ( मेथा २६:६-१३ ; मारकु १४:३-९ ) 1 पेसाक धी़छेनगी ङीमा ढुक एन्ला, येशुगी छीवाने सो़न्पो जेगीन लाजारगी नाङ बेथानीरु खोङबा फेप्पालाक। 2 खुङक्याई येशुगी क्षीला घोमो श्येलाक स्याम्पालाक। मारथागी श्याप्ची श्युवालाक। धेनी लाजारगोवा येशुमुला श्येलाक श्येगीनक्याने च्यीक लाक। 3 मीरीयामगी पाङपो़ने शो़सा ढीस्यीम घोङ क्षे भुम्पा गाङ, येशुगी श्यापला ॱलुक्पालाक। धेनी मोरी ॱरागी खोङबागी श्याप फीवालाक। धा नाङ घीरी पाङपो़ ढीस्यीमगी खावालाक। 4 हीना येशुगी ङेनेक्याने खोङबाला डागी लाकला ची ग्याप्ये हीन्गीन, युदा ईस्कारीयोतगी ॱनेवालाक, 5 “दे ढीस्यीम दे ॱङुगी टाङगा सुमग्याला चोरी उटेक्याला तेरना ढीक्ये हो़तालाक।” 6 खी़ दे उटेक्याला ॱङीङजे केरी ॱनेवामालाक। हीना खो नी कुमा च्यीक लाक। ॱङुगी खुमाकगो खी़ ङ्यारालाक। धेनी होदे नाङदु ॱलुक्कीनने, खो राङला घो़गीनगो कुवालाक। 7 येशुगी सुवालाक, “मोला घीया ॱमाना। ङा धी़ठोदु बेयेगी क्षीला मी़ देरे झ्येवालाक। 8 घीझ्येरी ॱनाना उटेक्या च्योई, खेक्यामुला हुङगीलाक हीना ङा खीकीमुला च्योई हुङगीमालाक।” लाजारला सेयेगी झ्यी़ङेन 9 याहुदापा मीछोकगी येशु बेथानीरु श्युक्दुक ॱनेरी घोरती, खुङक्या खोङबाला ज्यारु च्यीगा मेन्दा हीना छीवाने खोङबागी सो़न्पो ॱलाङला लाजारलाः तारु होवालाक। 10 होझ्येरी क्षो़पो़न क्षेक्याई लाजारला याङ सेयेला झ्यी़ङेन तीवालाक। 11 घीझ्येरी ॱनाना लाजारगी केनगी याहुदापा ॱमीच्यीकी माङा, खुङक्याने खा डारी येशुला धेपा झ्येवालाक। येशु येरुसालेमदु फेप्पा ( मेथा २१:१-११ ; मारकु ११:१-११ ; लुका १९:२८-४० ) 12 ङीमा स्याम्मागोला पेसाकगी धी़छेनला होवा मीछोक क्षे च्यीकगी, येशु येरुसालेमदु फेप्कुलाक ॱनेरी घोरपालाक। 13 होझ्येरी खुङक्याई तालागी स्यीङदोङगी याक्काक्या खेरती, खोङबाला ज्यारु सोवालाक। धेनी केक तो़न्दी ॱनेवालाक, “होसान्ना, चोवोगी छेनने फेप्कीन ईस्राएलगी ग्यावुला टास्यी हुङास्योक।” 14 धेनी येशुला भुङटु च्यीक ॱङेदी होदेगी खाला छीप्पालाक। सुङराप नाङ देरे ढीक्कीनगो डुप्पालाक, 15 “सीयोनगी भोमो, माजीक, खीकी ग्यावु भुङटु खाला छीप्ती फेप्यी।” 16 खोङबागी ङेनेक्याई दी दो़न एन्ला ॱहामाघोरपालाक हीना येशु शीजेला फायी घाङला, दी लाब दे खोङबागी कोरला ढीक्टा धाङ श्येनगी खोङबाला घी झ्येजागो ढेन सो़वालाक। 17 येशुगी लाजारला धी़ठोने भो़री छीवाने सो़न्पो जेदी घाङला, खोङबामुला हो़गीन मीछोकगी खोङबागी कोरला पाङपो तेरजीङ झ्येवालाक। 18 खोङबागी दी ताक दे तो़न्गीनगो घोरती, मीछोकक्या खोङबाला ज्यारु सोवालाक। 19 फारुसीपाक्याई च्यीकगी च्यीकला ॱनेवालाक, “तो़दाङ, जीक्तेन हो़ले खी़ स्याम्ला डाङी। होरी घीया झ्यी थुक्ये मेतालाक।” येशुला गीरीकक्याई ज्यादो़ 20 पेसाकगी धी़छेनला येरुसालेमदु क्षो़पा पुरु हुङगीनक्याने, मी रीङगा गीरीक हो़तालाक। 21 धेनी गालील युछोकगी बेथसेदा युदु धेगीन फीलीपचारु, खुङक्या होरी श्यी़वालाक, “ॱलोपो़न ला, हेक्या येशुला ज्यादो़ हो़क।” 22 फीलीप सोरी आन्डीरीयाला स्येपालाक धेनी आन्डीरीया फीलीपमुला सोरी येशुला श्यी़वालाक। 23 येशुगी खुङ ॱङीउला लेन ॱनावालाक, “मी-भु शीजेला ॱङो़न्येगी धी़चो़ रीन्सोङ। 24 ङा खेक्याला धेन्पा धेनक्याङ ॱनाहीन, डोगी डुदोक सागी नाङला ल्हीम्दी ॱमीस्यीना, होदे च्यीका लेगीलाक। हीना होदे डुदोकगो स्यीना, होदेने ढेबु माङा केलालाक। 25 राङगी ॱरोकला क्षाक्कीनगी़ होदे तोरतु च्युवालाक। धेनी जीक्तेनदु राङगी ॱरोकला मेक्षाक्कीनगी़ होदे थामेपे छेसोकगी क्षीला क्योबालाक। 26 सी़ ङाला श्याप्तोक श्यी़, होदे ङी स्याम्ला डाङ घो़गुलाक धेनी ङा घारु हो़सारु, ङी श्याप्चीगोवा हुङगीलाक। सी़ ङाला श्याप्तोक श्यी़ना, होदेला यापगी कुरती जेगीलाक। राङगी छीवे कोरला येशुगी ॱङो़नस्ये 27 “धा ङी सेम ठुक दुक। ङा घी ॱनागु? के याप, दे धी़चो़ देने ङाला क्योबा जो़। मालाक, ङा दो़न दीगी क्षीलाराङ दे धी़ थुक्पे होवाहीन। 28 याप ला, खेराङगी छेनला शीजे धाङ धेन्पा जेरो।” धेनी नाम्खे श्यीङखामने सुङकेक च्यीकगी सुवालाक, “ङी शीजे धाङ धेन्पा जेहो़क धेनी धाब्ले शीजे धाङ धेन्पा झ्यीयेहीन।” 29 होदुरु लारी धेता मीछोकगी दे घोरती ॱनेवालाक, “डुक दीरी।” श्येम्माक्याई ॱनेवालाक, “को़न्क्षोकगी भाङछेनगी खोङबामुला कामो़न सुङालाक।” 30 येशुगी लेन ॱनावालाक, “सुङकेक दी ङी क्षीला मेन्दा, खेक्याई क्षीला झ्युवालाक। 31 धा जीक्तेनगी ठीम चो़गीनगी धी़ भाप दुक। धा दे जीक्तेनगी वाङग्युर झ्यीगीनगो फीला ॱयुक्कीलाक। 32 धेनी ङा साश्यीने याला फायी घाङला, ङी घीरीला राङगी डुङदु धी़येहीन।” 33 राङगी ङ्याङ घोयेगी छीवागी कोरला खोङबागी देरे सुवालाक। 34 मीछोकगी श्यी़वालाक, “मास्यीकागो ग्युने ग्युन्दु ॱनेगीलाक ॱनेरी, हीकी क्षो़ठीमने घोरसोङ। मी-भु या फाक्कीलाक ॱनेरी खेराङगी घाङ झ्येरी सुङ थुक्वाले? मी-भु दे सुले?” 35 येशुगी खुङक्याला सुवालाक, “हो़ दे खेक्याई मुला धी़ तुङ-तुङ च्यीक ॱनेगीलाक। मी़नाकगी वाङ होकदु ॱमीछी़येला, हो़ हो़ती घाङलाराङ थारा झ्यी। मी़नाकगी नाङला डोगीनगी़ घारु डोगीनगो ॱमेस्येलालाक। 36 हो़ हो़ती घाङलाराङ, खेक्या हो़गी से धाङ सेमो झ्युङयेला हो़गोला धेपा झ्यी।” येशुगी दे सुङसारती खोङबा होदेने फेप्ती, खुङक्याने हीप्ती श्युक्पालाक। मीमाङक्याई धेपा मेगीनगी कोरला 37 खोङबागी मीक्याई दोङदु ताक माङा तो़न्दा जेदीयाः, देक्याई खोङबाला धेपा माझ्येवालाक। 38 होझ्येरी ॱङो़नस्येखेन यस्याया थोक्ने सुङगीन दे डुप्पालाक, “चोवो, हीकी ताम्शाङला सी़ यीच्चे झ्यीये? सुला चोवो राङगी नी़थु ॱङो़न जेदो?” 39 होझ्येरी खुङक्याई धेपा झ्यी ॱमाथुक्पालाक। घीझ्येरी ॱनाना यस्यायागी याङ देरे सुङ हो़तालाक, 40 “को़न्क्षोकगी खुङक्याई ॱमीक श्यारा जेदी, धेनी खुङक्याई सेम ठा जेपालाक। देरे माजे हो़ना, खुङक्याई ॱमीकगी थोङये धाङ, खुङक्याई सेमगी ॱहाघोरयेहो़क। धेनी ङीचारु लोक्येहो़क। धेनी ङी खुङक्याला सो़ये हो़क।” 41 यस्यायागी येशुगी शीजे थोरी, खोङबागी कोरला देरे सुवालाक। 42 देरे झ्येरीया याहुदापा पो़न्रीक नाङने माङागी, येशुला धेपा झ्येवालाक। हीना खुङक्याला याहुदापे छोक्खाङने पी़टु ॱनेरी, फारुसीपाक्याला जीक्ती खेलेन माझ्येवालाक। 43 घीझ्येरी ॱनाना खुङक्या को़न्क्षोकगी कुरती ले ल्हाक, मीगी कुरतीला क्षाक्पालाक। येशु जीक्तेन क्योप्तु फेप्पा 44 धेनी येशुगी सुङकेक क्षेगी थोक्ने सुवालाक, “ङाला धेपा झ्यीगीनगी ङाला मेन्दा, ङाला ॱङाक्कीनला धेपा झ्यीदालाक। 45 धेनी ङाला थोङगीनगी ङाला ॱङाक्कीन खोङबाला ज्यागीलाक। 46 ङाला धेपा झ्यीगीनक्या मी़नाकगी नाङदु ॱमीली़येला, ङा हो़ झ्युरी जीक्तेनदु होवाहीन। 47 ङी काक्या ङेन्दी होदे ॱरुङगीनक्याला ठीम ॱमेताङ। घीझ्येरी ॱनाना ङा जीक्तेनदु क्यो़न चुक्तु होवामेन, हीना जीक्तेन क्योप्येगी क्षीला होवाहीन। 48 ङाला ङोलोक झ्यीगीन धाङ ङी काक्या खे मेलेन्गीनक्याला ठीम्पो़न च्यीक हो़तालाक। ङी स्येगीन क्यागीराङ, थामे ङीमाला होदेगी ठीम ताङगीलाक। 49 घीझ्येरी ॱनाना ङी ङाराङगी थोक्ने स्येदामेन हीना ङाला ॱङाक्कीन यापगीराङ, ङी घी ॱनाघो़गीन धाङ स्येघो़गीनगी़ का ङाला ॱनाङ हो़तालाक। 50 खोङगी ॱनाङगीन का दे थामेपे छेसोक हीन्गीनगो, ङी स्येसुङ। होझ्येरी ङी घी स्येगीनगो यापगी ङाला सुङगीनगोराङ स्येदाहीन।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.