याकोब 5 - ॱलोवाक्षुक्पुक्याला ङेन्ता 1 धा खे क्षुक्पुक्याओ, ङाला ङेन। खीकी खाला भाप्ये हीन्गीन, दुक्पुगी क्षीदु ङी़ धेनी ङुता ग्योप। 2 खीकी ग्युनोरक्या रुदुक धेनी खीकी घोलाकक्या मुक्पी शेदुक। 3 खीकी सेर धाङ ॱङुला ॱया साक्दुक धेनी ॱया देराङ खीकी क्यो़नगी पाङपो झ्युङगीलाक धेनी मेगी च्योक्रे, खीकी स्या शागीलाक। थामे ठीम्चो़गी ङीमाक्याई क्षीदु, खेक्या ग्युनोर साःले? 4 तो़दाङ, खीकी श्यीङ ॱङागीनक्याई ॱलागोला खीकी ॱहाबा झ्येरी, खुङक्या दुकेक ग्यावी धेनी ॱङागीनक्याई दुकेकगो कुवाङ चोवोगी सेन्दुक। 5 खेक्या जीक्तेनदु कीस्युरी ङ्याम तारी धेपालाक। धेनी सेये ङीमोगी क्षीदु खेक्या राङगी राङला ग्याक्वा शो़दुक। 6 खाप्टा झ्यी ॱमीथुप्कीन मी ढाङपो च्यीकला, खीकी क्यो़न चुक्ती सेपालाक। काङे घाङला शो़गोम 7 होझ्येरी पी़नक्याओ, चोवो धाब्ले ॱमाफेप थुक्पे शो़पा झ्यी। पीगी क्षावा धाङ तो़न्गी क्षावा माभाप थुक्पे, श्यीङबाक्या शो़पा झ्येरी साश्यीगी लोदोक चाक्षेला घुक्ती धेगीनला, तो़दाङ। 8 खेक्याः शो़पा झ्यी। चोवो धाब्ले फेप्कीनगी, धी़ ङ्ये ॱलेप हो़गीन झ्येरी, राङगी सेमला तेन्पो शो़। 9 पी़नक्याओ, खेराङक्याला ठीम ॱमेफोक्येगी क्षीला, खेराङक्या घुङदु फाक्तुङ मादुङ। तो़दाङ, ठीम्पो़न नी घो डामदु श्याङदुक। 10 पी़नक्याओ, चोवोगी छेनगी थोक्ने सुङगीन ॱङो़नस्येखेनक्याला, दुक्पु धाङ शो़गोमगी पेला लेन। 11 तो़दाङ, तेन्पो धेगीनक्याला होराङ झ्यीलाप क्षे चीलालाक। खेक्याई योपगी शो़गोमगी कोरला घोर हो़तालाक धेनी चोवो नी ॱङीङजे धाङ ज्याम्सेमगी खारी, थाला खोङबागी जेगीनगो खेक्याई थो हो़तालाक। 12 हीना ङी पी़नक्याओ, घीरीने चा क्षेस्योकगो, नाम्खे श्यीङखाम याङना साश्यी याङना श्येम्मा घीया पाङदु चुक्ती, ॱना ॱमाक्या हीना क्षेपा ॱमेफोक्येगी क्षीदु, खेक्याई हीनगो हीन धेनी मेनगो मेन हुङघो़। धेपे ॱमो़लाम 13 खीकी घुङदु दुक्पु ङ्याङगीन मी रे हो़ते? होदेगी ॱमो़लाम ग्याप्घो़। खेक्याने ङ्यामो घागीन रे हो़ते? होदेगी तो़लु लेन्घो़। 14 खीकी घुङदु नेपा रे हो़ते? होदेगी क्षो़छोकगी गोठीक्या भो़घो़ धेनी खुङक्याई चोवोगी छेनने खी़ खाला ॱनुम ढी़री, ॱमो़लाम ग्याप्घो़। 15 धेनी धेपे ॱमो़लामगी होदे नेपाला क्योप्कीलाक धेनी चोवोगी होदेला ढाक्सो़ ॱनाङगीलाक। धेनी खी़ धीक्पा झ्येहो़ना, खोला घोयाङ थोप्कीलाक। 16 होझ्येरी ढाक्सो़ थोप्येगी क्षीला, फेन्छुन घुङदु राङगी धीक्पा खेलेन झ्यी धेनी च्यीकगी च्यीकला ॱमो़लाम ग्योप। मी ढाङपो च्यीकगी ॱमो़लाम स्युक्क्षे धाङ फेन्क्षे हो़तालाक। 17 एलीया नी, होराङ च्योक्रे मी च्यीक लाक। खी़ क्षावा माग्यास्योक ॱनेरी, ॱमो़लाम स्युक्क्षे ग्याप्पालाक धेनी लो सुम धाङ दावा ढुक थुक्पे, साला क्षावा माग्याप्पालाक। 18 धेनी याङ खी़ ॱमो़लाम ग्याप्पालाक धेनी ॱनामने क्षावा भाप्ती साश्यीने, लोदोक झ्युवालाक। 19 ङी पी़नक्याओ, खेक्या नाङने धेन्पाने खा डारी सोसोवा च्यीकला, याङ मी च्यीकगी छुला ॱलोक्ती ठीक्ती हुङना, 20 होदे नोरवा लामने छुला ॱलोक्ती ठीक्ती हुङगीनगी, होदे मीगी सेम छीवाने क्योप्कीलाक धेनी खी़ धीक्पा माङा सेगीलाक ॱनेरी, खेक्याई स्येघो़। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.