याकोब 4 - ॱलोवा1 खीकी घुङदु च्यो़पा धाङ ठुक्पाक्या घाङगी झ्येरी झ्युङाले? देक्या खीकी खोक्पी नाङदु थाप्ती धेगीन दो़क्षाकक्याने झ्युवामालाक से? 2 खेक्याई दो़गीनगो ॱमेथोबा खेक्या मीगी ॱरोक चेदालाक। धेनी खेक्या ॱहाम्दो़ झ्यीदालाक हीना खेक्याला ॱमेथोबा खेक्या च्यो़पा धाङ ठुक्पा ग्यालाक। धेनी खेक्या को़न्क्षोकला मीश्यी़वाला खेक्याला ॱमेथोबालाक। 3 खेक्याई घी श्यी़गीनगो ॱमेथोबालाक घीझ्येरी ॱनाना खेक्या राङगी दो़क्षाक खाङयेला, सेम्बा ङेन्पे गोने श्योवा पुलालाक। 4 खे लोक्येम्पाक्याओ, जीक्तेनला क्षाक्कीनक्या नी को़न्क्षोकगी डाला लाङालाक ॱनेरी खेक्या ॱमेस्येलाले? होझ्येरी जीक्तेनला क्षाक्ङी दो़गीनक्याई राङला को़न्क्षोकगी डा शोवालाक। 5 याङना “को़न्क्षोकगी होरी नाङदु ॱनेरु च्युक्कीन थुक्ङी नी ठादोकगी खाङ हो़तालाक।” ॱनेरी सुङरापगी दो़न्मेला देरे सुङवा हीन्ढु ॱनेरी, खेक्या सामी हो़ती? 6 हीना खोङगी होराङला देले ल्हाक थुक्जे ॱनावालाक। होझ्येरी सुङरापगी देरे सुङालाक, “को़न्क्षोकगी ङागेलचेनला ङोलोक जेदालाक हीना ॱङ्यामच्युङला थुक्जे ॱनाङा जेदालाक।” 7 होझ्येरी राङला को़न्क्षोकगी क्षाक होकला पु। धी़कला ङोलोक झ्यी। धेनी खो खेक्याने डो़री डोगीलाक। 8 खेक्या को़न्क्षोकगी ङ्येला स्योक धेनी खोङबा खीकी ङ्येरु फेप्कीलाक। धीक्चेनक्याओ, राङगी लाक्पा चाङमा शो़। साम्लो ॱङी ताङगीनक्याओ, राङगी सेम चाङमा शो़। 9 खेक्या दुङा झ्यी, दुक ॱरुङ धेनी ङी़। खीकी घेमोगो ङुताला ग्युर धेनी खीकी घाटोगो दुक्पुला ग्युर। 10 चोवोगी डुङदु राङला ॱङ्यामच्युङ शो़ धेनी खोङबागी ख्यो़ला याला क्या जेगीलाक। 11 पी़नक्याओ, च्यीकगी च्यीकला छीक ङेन्पा ॱमाना। राङगी पी़नला छीक ङेन्पा ॱनागीन याङना राङगी पी़नला क्यो़न चुक्कीनगी़ क्षो़ठीमगी कोरला ङेन्पा ॱनालाक धेनी क्यो़न चुक्वालाक। धा ख्यी़ क्षो़ठीमला क्यो़न चुक्ना, ख्यो़ क्षो़ठीम ॱरुङगीन मेन्दा क्षो़ठीमगी पो़न्पो झ्युङालाक। 12 क्योप जे थुप्कीन धाङ मेताला जे थुप्कीन क्षो़ठीम ॱनाङगीन धाङ ठीम्पो़न च्यीक च्यीगा हो़क। हीना राङगी खीम्चेला क्यो़न चुक्कीन, ख्यो़ सु हीनो? ॱङेटोगी कोरला खाप्ले स्येगीन 13 “धीरीङ याङना ॱङेटो हुई ग्याजारु डो धेनी होदुरु लो च्यीक धेती छोङ ग्याप्ती खेब्साङ शोउ” ॱनेरी ॱनागीनक्या, धा ङाला ङेन। 14 ॱङेटो घी झ्युङगीनगो खेक्या ॱमेस्येलालाक। खीकी मीछे दे घी लाक से? घीझ्येरी ॱनाना खेक्या नी धी़ तीते च्यीक ॱङो़न्दी, येरी डुगीन ॱमुक्पा च्योक्रे लाक। 15 दी छापला खेक्या “चोवोगी थुकोङ हो़ना, होराङक्या सो़न्पो धेतु धेनी देरे-हुरे झ्यीदु।” ॱनेरी ॱनाघो़। 16 हीना धान्दा, खेक्या ङागेल च्यारी खाप्ले स्येदी। देरे खाप्ले स्येगीन घीरी ङेन्पा लाक। 17 होझ्येरी शाङा झ्यीदा स्येरीयाः मीझ्यीना धीक्पा लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.