याकोब 3 - ॱलोवाच्येमो दाक्पो ग्याप्येगी कोरला 1 पी़नक्याओ, खेक्याने माङक्षे ॱलोप्खेन माझ्युङ घीझ्येरी ॱनाना हे ॱलाप्कीनक्याला, ॱयो़ल्ले ल्हाक ठीम दाम्बो चेगीलाक ॱनेरी, खेक्या स्येलालाक। 2 घीझ्येरी ॱनाना होराङ घीरी नोन्डु माङा झ्यीदालाक। राङगी स्येगीन तामला नोन्डु मीझ्यीगीन मी नी, याङदाक्पा मी च्यीक लाक धेनी खी़ राङगी शु घीरीला च्याक ग्याप थुक्कीलाक। 3 ता च्यीकला होरी वाङदु धी़येला, होदेगी खाला ॱराप को़न्ना, होदेगी ली़ घीरी होराङ घारु थेजारु ठीक थुवालाक। 4 डुशीङक्याला तो़दाङ, देक्या ॱमीच्यीकी क्षे हो़ना धेनी ॱलुङ स्युक्क्षेगी देना, डुपागी राङगी थेजा स्योकला कोरयेला, क्या च्युङा च्यीकगी देक्याला ठीयालाक। 5 देरेराङ झ्येरी च्येमो नी, ली़गी येन्लाक च्युङा च्यीक हीन्नाः, दो़न क्षे-क्षेगी खाप्ले स्येतालाक। तो़दाङ, मेचे च्युङा च्यीकगीया स्यीङनाक क्षेला ॱरालाक। 6 च्येमो देया मे च्योक्रे लाक। दे नी होरी ली़गी येन्लाकक्याने ङेन्पागी खाङखा जाम्बुलीङ च्यीक लाक। देगी ली़ घीरीला, ॱमेचाङा शोवालाक धेनी ॱङ्याल्वे मेगी खी़ मीछेगी छोवा घीरी मेला ॱरालाक। 7 सेम्चेन धाङ झ्या झ्यीउक्या धाङ तोडोक्या धाङ ग्याछो नाङदु हो़गीन, सेम्चेन ॱनाछोक घीरीला वाङदु धु थुबालाक धेनी मीगी रीग्युने राङ वाङदु धु थुबालाक। 8 हीना च्येमोला मी सी़या वाङदु धु ॱमीथुवालाक। दे नी, ॱरोक चे थुप्कीन दुकगी खाङखा धाङ वाङदु धु ॱमीथुप्कीन ङेन्पा लाक। 9 होराङ देगी थोक्नेराङ चोवो धाङ यापला तो़पा पुलालाक धेनी दी थोक्नेराङ, को़न्क्षोकगी ॱयीपला को़का मीक्याला ॱमेमो ग्यालाक। 10 खा च्यीक्नेराङ तो़पा धाङ ॱमेमो ॱङीगारा थो़न्दालाक। ङी पी़नक्याओ, देरे नी हुङये मेगीन ची लाक। 11 क्षुमीक च्यीकगी खाने थुङक्षु धाङ छाक्षु ॱङीगारा थो़न्दालाक से? 12 ङी पी़नक्याओ, सेयापगी दोङबोने क्युरुस्यीङगी स्यीङदोक धाङ घुन्डुमगी दोङबोने सेयापगी स्यीङदोक के थुबालाक से? छाक्षुगी क्षुमीकने थुङक्षु ॱमेथो़न्दालाक। को़न्क्षोकने थोप्कीन स्येराप 13 खेक्याने खेवा धाङ साम्लो थोङागो सु हो़तो? मी देगी राङगी चो़लाम शाङपो धाङ स्येरापने झ्युङगीन, ॱङ्यामच्युङगी गोने राङगी लेगा घीरी तो़न्घो़। 14 हीना खीकी सेम नाङदु ठादोक खाक्तीया धाङ राङदो़गी दो़क्षाक हो़ना, खेक्या खेवा हो़क ॱनेरी खाप्ले स्येदी, धेन्पाला शोक ॱमास्ये। 15 देरे स्येराप नी, को़न्क्षोकने मालाक हीना दे नी, जीक्तेन धाङ स्याठाक धाङ धी़गी स्येराप लाक। 16 घीझ्येरी ॱनाना ठादोक धाङ राङदो़गी दो़क्षाक हो़जारु, शीङठुक धाङ ङेन्पा ॱनाछोकगी लेगा हुङगीलाक। 17 हीना को़न्क्षोकने झ्युङगीन स्येराप नी, धाङपो चाङमा धाङ फीनसुम्चेन धाङ क्यो़न मेगीन धाङ साम्लो थोङा धाङ ॱङीङजे धाङ ढेबु शाङपोक्या तेरकीन धेनी क्षोक्री मेगीन धाङ शोक मेगीन हुङालाक। 18 धेनी श्यीदे शोगीनक्याई श्यीदेगी साङा ताप्ती, ढाङतेनगी ढेबु धुगीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.