याकोब 2 - ॱलोवाक्षोक्री मीझ्यीयेगी कोरला 1 ङी पी़नक्याओ, खेक्याई धेपा होरी शीजेगी चोवो, चोवो येशु मास्यीका खाला हो़गीन झ्येरी, क्षोक्री माझ्यी च्यीक। 2 खेक्याई छोक्दुरु सेरगी सोप्तोक धाङ घोलाक पी़मा घो़न्गा मी च्यीक धाङ घोलाक ॱरुल्दुक्पा घो़न्गा मी उटे च्यीक हुङना, 3 खेक्याई होदे घोलाक पी़मा घो़न्गा मीगोला चीकुर झ्येरी, “खेराङ श्युक्देन दुरु श्युक।” ॱनेरी ॱनालाक धेनी मी उटेगोला, “ख्यो़ हुरु लारी धो़क” याङना “ङी होकदु धो़क” ॱनेरी ॱनालाक। 4 धा खेक्या खेरी नाङदुराङ ॱयेवा झ्येरी, खेक्या साम्लो ङेन्पागी ठीम्पो़न झ्युवामाले? 5 ङी चेवे पी़नक्याओ, ङेन च्यीक, को़न्क्षोकगी जीक्तेनगी उटेक्याला धेपाला क्षुक्पु जेदी, नाम्खे ग्यासीगी ग्युज्यीन जेबा माले? खोङबाला चेवा झ्यीगीनक्याला ग्यासी दे ॱनाङये धाम्चा जेपालाक। 6 हीना खेक्याई उटेक्याला थोङछुङ झ्येदुक। खेक्याला ॱनो़ क्यागीनगो, क्षुक्पुक्याराङ माले? धेनी खेक्याला ठीम्खाङदु ठीक्ती, डुगीनगोवा खुङक्याराङ माले? 7 धेनी खेक्याई तो़पा पुगीन धाङ खीकी ढेवा हो़गीन छेन गोला, कुरवा धेप्कीनगो खुङक्या माले? 8 सुङरापला, “खेक्याई राङगी खीम्चेला राङला च्योक्रे, चेवा झ्यी” सुरी सुङसा ग्यावुगी का दे ॱङोन्ने डुप्तु च्युक्ना, खेक्याई शाङा झ्यीदालाक। 9 हीना खेक्याई ॱयेवा चेगीन लेगा झ्यीना खेक्याई धीक्पा झ्यीदालाक धेनी काठीमगी थोक्ने, खेक्या ठीमला ॱमीचीगीन झ्युङालाक। 10 घीझ्येरी ॱनाना मी च्यीकगी ठीम घीरी ॱरुरी हीना च्यीकला च्यीगा लेना, खो क्षो़ठीमगी ठीम घीरी ॱमारुङगीनगी क्यो़न फोक्कीलाक। 11 घीझ्येरी ॱनाना “लोक्येम माझ्यी” सुङगीनगी “मीगी ॱरोक ॱमाचे” सुरीया सुङ हो़तालाक। खेक्याई लोक्येम मीझ्यीना हीना मीगी ॱरोक चेना, ख्यी़ क्षो़ठीम ॱमीरुङालाक। 12 होझ्येरी राङवाङ ॱनाङगीन क्षो़ठीमगी थोक्ने, ठीम्चो़ थोप्कीनक्याई च्योक्रे, खीकी ताम धाङ चो़पा हुङास्योक। 13 घीझ्येरी ॱनाना श्येम्माला ॱङीङजे मीझ्यीगीनला, ॱङीङजे मेगीन ठीम फोक्कीलाक। ठीम्चो़गी खाला ॱङीङजेगी ग्यालालाक। धेपा धाङ लेगा 14 ङी पी़नक्याओ, मी च्यीकगी राङला धेपा हो़क ॱनाना, हीना धेपाला थी़न्गीन लेगागो मीझ्यीना, देला फेन्थोक घी हो़तालाक से? खी़ धेपागी खोला क्योप थुक्कीले? 15 खीकी पी़नक्याने च्यीकला घो़न्येला घोलाक धाङ ङीन्रेगी शामा शायेला ॱमेछाङ हो़ना, 16 खेक्याने च्यीकगी खोला, “दुङा मीझ्यीदा सोङ, घोलाक डोजे घो़न धेनी शामा घाजे शो” च्यीगा ॱनेरी, हीना खी़ ली़ला घो़गीनगो ॱमेतेरना, देला फेन्थोक घी हो़तालाक से? 17 देरे झ्येरी लेगा मीडुप्कीन, धेपा नी स्यीवा हीन। 18 हीना मी च्यीकगी, “ख्यो़ला धेपा हो़तालाक धेनी ङाला लेगाक्या हो़क।” ॱनेरी ॱनाना, लेगा मेगीन ख्यी़ धेपा दे ङाला तो़न धेनी ङी ङारी लेगागी थोक्ने, ङी धेपा ख्यो़ला तो़न्दु ॱनेरी, ङा ॱनायेहीन। 19 खेक्या को़न्क्षोक च्यीकराङ हीन ॱनेरी, धेपा झ्यीदालाक धेनी दे घा लाक। डेक्याः धेपा झ्यीदालाक धेनी जीक्ती दारालाक। 20 खे ॱलेन्पाक्याओ, लेगा मेगीन धेपा फेन मेगीनगी पाङपोगो, खेक्याला तो़न घोयेदुई? 21 होरी धाङबी मेमे आब्राहामगी ॱमारछो़ पुयेला, राङगी भीजा क्षो़ठीरु पुली घाङला, खो खोरी लेगागी थोक्नेराङ ढाङपो चीवा माले? 22 खी़ धेपागो खी़ लेगामुला थी़न्दी डुगीन धाङ लेगागी थोक्ने, धेपागो छाङबो झ्युङगीनगो खेक्या थोङालाक। 23 धेनी सुङरापला देरे ढीक्टा कागो डुप्पालाक, “आब्राहामगी को़न्क्षोकला धेपा झ्येवालाक धेनी दी थोक्ने, खो ढाङतेनगी मी च्यीक चीवालाक।” धेनी खोला को़न्क्षोकगी छोटोक ॱनेरी ॱनालाक। 24 मी च्यीक धेपागी च्यीगा मेन्दा, लेगागी गोने ढाङतेनला चीगीनगो खेक्या थोङालाक। 25 देरेराङ झ्येरी राहाब ॱनागीन, श्याङचोङमागी मोरी नाङदु भाङछेनक्याला फेप्सु श्यी़री, खुङक्या डो़री डोयेला लाम्गा श्येम्मा स्योकला झावालाक। धा मोरी लेगागी थोक्ने, मो ढाङपो चीवा माले? 26 ली़ सेमने डाना स्यीगीन च्योक्रे, धेपागोवा लेगाने डाना स्यीस्या च्योक्रे लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.