ईब्रीपा 9 - ॱलोवाजीक्तेनगी घुरखाङ नाङदु क्षाक्क्षो़पा पुवा 1 धाम्चा धाङपोगी नाङला, क्षाक्क्षो़पा झ्यीगीनगी ठीमक्या धाङ जीक्तेनदु, क्षाक्क्षो़पा झ्यीसा च्यीक हो़तालाक। 2 घुरखाङ च्यीक पुक हो़तालाक। होदेगी खीम धाङपोगोला, क्षो़मी श्याक्सा धाङ को़न्क्षोकगी कुदी़नदु पुपा ग्याङगाक्या हो़गीन सोच्योक हो़तालाक। देला धाम्पे ॱनेसा ॱनालाक। 3 होदुरु योल्वा च्यीक हो़तालाक धेनी योल्वागी ग्यापला धाम्पे धाम्पा ॱनेसा ॱनागीन, खीम ॱङीवागो हो़तालाक। 4 होदे नाङदु पो़ पारसा सेरगी क्षो़ठी धाङ छोक घीरीने सेरगी तुम्दा, धाम्चागी गाम हो़तालाक। गाम दी नाङदु ॱमान्ना ॱनागीन शामा हो़गीन, सेरगी भुम्पा धाङ आरोनगी भेक्योक धाङ धाम्चागी धोलेप हो़तालाक। 5 धेनी गामगी तो़ला को़न्क्षोकगी शीजेगी ताक हीन्गीन, केरुब ॱनागीन सेम्चेनक्या हो़तालाक। धेनी होदेक्याई स्योक्पागो थुक्जेगी श्युक्ठीगी खाला, क्याङक्या हो़तालाक हीना धान्दा दी कोरला हेक्या ढेस्ये माङा ग्याप थुक्येमेक। 6 देक्या घीरी डाढीक झ्येसारती, क्षो़पो़नक्या खोङ राङगी श्याप्ची श्युयेला घुरखाङगी खीम धाङपोरु च्योई डोवालाक। 7 हीना खीम ॱङीवा नाङला चो क्षो़पो़न च्यीगा, लोला थेङमा च्यीक डोवालाक। धेनी ठाक ॱमेखेरा नामाः मेडोवालाक। ठाक दे नी राङ धाङ मीक्याई ॱमास्येवा झ्येजा, धीक्पाक्याई दो़न्दु पुलालाक। 8 दे घीरीगी थोक्ने खीम धाङपोगो हो़गीन थुक्पे, धाम्पे धाम्पा ॱनेसा नाङदु जुजा मेतालाक ॱनेरी, धाम्पे थुक्ङीगी तो़न जेदालाक। 9 दे नी धान्दागी धी़ला तो़न्गीन ताक च्यीक लाक। धेनी दी, को़न्क्षोकला पुपा क्षो़पा धाङ ॱमारछो़क्याई क्षाक्क्षो़पा पुगीनक्याई, स्येशाङ चाङमा शो़ ॱमीथुक्वालाक ॱनेरी तो़न्दालाक। 10 देक्या नी शाये धाङ थुङये धाङ ठी़ ॱनाछोक झ्यीगीनगी ॱरो च्यीगा लाक। धेनी को़न्क्षोकने का साबा ॱमाथोप थुक्पे, देक्या नी फीदाने झ्यीगीन ठीमक्या लाक। मास्यीकागी कुठाकगी कोरला 11 होझ्येरी मास्यीका नी, धान्दा झ्युजा शाङा घीरीगी चो क्षो़पो़न झ्युवालाक। धेनी खोङबा मीगी लाक्पागी शो़सा मेन्दा, याङना जीक्तेन देगी मेन्गीन घुरखाङ चाक्षेस्योक धाङ याङदाक्पागी नाङने फेप्पालाक। 12 धेनी रा धाङ भीक्याई ठाक मेन्दा, मास्यीका राङगी कुठाकगी गोने घीरीगी क्षीदु थेङ च्यीक्लाराङ धाम्पे धाम्पा ॱनेसा नाङदु फेप्ती, थामेपे थारपागो ॱनाङा जेपालाक। 13 धा रा धाङ ॱलुङगी ठाक धाङ भीप्मो ॱराक्रा घोक्थागो, मी ॱमेचाङाक्याई खाला तोराराङ, खुङक्याई ली़गो चाङमा झ्युङना, 14 होराङ सो़न्पो को़न्क्षोकला श्याप्ची श्यु थुप्येगी क्षीदु, मास्यीकागी कुठाकगी होरी स्येशाङला, धीक्पे लेगाक्याने देले ल्हाक चाङमा शो थुप्की माले? घीझ्येरी ॱनाना थामेपे थुक्ङीगी नी़थुगी गोने, होरी धीक्पाक्याई क्षीदु मास्यीकागी राङला याङदाक्पे ॱमारछो़ च्योक्रे को़न्क्षोकला पुवालाक। 15 को़न्क्षोकगी खुङक्याला उ ॱना श्येस्या थामेपे ग्युज्यीनगो, भो़पा घीरीला थोप्येगी क्षीदु, खोङबा नी को़न्क्षोक धाङ मीगी घुङदु धाम्चा साबागी भारमी जेगीनगो लाक। होदे धाम्चा धाङपोगी धी़ला मीक्याई झ्येजा धीक्पाक्याई छेपाने, खुङक्याला थारपा ॱनाङयेला मास्यीका ढोङवा जेपालाक। 16 धा खाछेम श्याक्हो़ना, होदे खाछेम श्याक्गीनगो स्यीछागीनगो धेन्पाङ झ्यीघो़। 17 घीझ्येरी ॱनाना खाछेम श्याक्गीनगो सो़न्पो हो़गीन थुक्पे, होदे खाछेमगो ॱमीचीलालाक। धेनी खो स्यीरी च्यीगा होदे चीलालाक। 18 होझ्येरी धाम्चा धाङपोगोवाः, ठाक मेताला ॱमाचीवालाक। 19 मोशेगी क्षो़ठीमगी का रे-रे मी घीरीला ढोक सारती, खी़ भी धाङ राक्याई ठाक धाङ क्षु ॱरेवालाक धेनी खुलु ॱमाउ धाङ हीसोप ॱनागीन चीस्यीङगो, होदे ठाकला बारी क्षो़ठीमगी पेजा धाङ मीक्याई खाला तोरपालाक। 20 धेनी खोङगी देरे सुवालाक, “को़न्क्षोकगी खेक्याला का ॱनाङना धाम्चागी ठाकगो दे लाक।” 21 देरेराङ झ्येरी खी़ घुरखाङ धाङ क्षो़पागी ॱनो़चे घीरीगी खाला ठाकगो तोरपालाक। 22 ॱङोन्ने झ्यीना क्षो़ठीमला तेन्ना, घीरी ठाकगी थोक्ने चाङमा झ्यीदालाक धेनी ठाक ॱमाली़वा धीक्पाक्या सेये मेतालाक। 23 नाम्खे श्यीङखामगी पेला हो़गीन, घुरखाङ धाङ दे नाङला हो़गीन घीरीला, ॱमारछो़गी चाङमा झ्यीघो़। हीना को़न्क्षोकगी श्यीङखामदु हो़गीनक्याला, देले ल्हाक ॱमारछो़ शाङा घो़वालाक। 24 मास्यीका नी धाम्पे ॱनेसा ॱङोन्नेगी पे हीन्गीन, मीगी लाक्पी शो़सा घुरखाङ नाङला ॱमाफेप्पालाक। हीना होरी छापला धान्दा को़न्क्षोकगी डुङदु ज्यायेला, खोङबा नाम्खे श्यीङखामदु राङ फेप्पालाक। 25 चो क्षो़पो़न राङगी मेन्गीन ठाक खेरती, लो रे-रेला धाम्पे धाम्पा ॱनेसारु फेप्कीन च्योक्रे, मास्यीका नाम्खे श्यीङखामदु राङला याङ-याङ पुयेला फेप्पा मालाक। 26 देरे मेन्ना जीक्तेन को़ने ॱहाला, खोङबागी याङ-याङ दुक्पो ङ्याङ घोये हो़तालाक। हीना खोङबा राङगी ॱमारछो़गी थोक्ने, धीक्पा घीरी सेयेगी क्षीला, थेङ च्यीक्लाराङ घीरीगी क्षीदु दे धी़गी थाला ॱङो़न जेपालाक। 27 याङ मीक्या थेङ च्यीक स्यी घोवालाक धेनी होदे स्याम्ने, ठीम्चो़ हुङगीन च्योक्रे, 28 मास्यीका मी माङागी धीक्पा खुरयेला, थेङ च्यीक्लाराङ ॱमारछो़ झ्युवालाक। धेनी धीक्पा खुरयेगी क्षीदु मेन्दा, हीना खोङबाला घुक्ती धेताक्याला क्योप्येगी क्षीदु, खोङबा याङ थेङ ॱङीवा ॱङो़न जेगीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.