ईब्रीपा 8 - ॱलोवाधाम्चा साबागी चो क्षो़पो़न 1 धा हीकी ॱनेना, लाबगी दो़न चोगो दे लाक। नाम्खे श्यीङखामदु ॱलानामेपे को़न्क्षोकगी श्युक्ठीगी ॱये स्योकला श्युकश्या, खोङबागो होरी चो क्षो़पो़न लाक। 2 धेनी मीक्याई मेन्दा हीना को़न्क्षोकगी चुक जेजा ॱङोन्ने घुरखाङगी धाम्पे धाम्पा ॱनेसारु, खोङबा श्याप्ची श्युवा जेदालाक। 3 चो क्षो़पो़न हो़लेगो, क्षो़पा धाङ ॱमारछो़क्या पुयेगी क्षीदु को़वालाक। होझ्येरी होदे चो क्षो़पो़नलाः क्षो़पा पुये रे घो़वालाक। 4 धेनी खोङबा दे जीक्तेनला श्युक्हो़ना, खोङबा चो क्षो़पो़न हुङयेराङ मेक घीझ्येरी ॱनाना क्षो़ठीमला तेन्दी, क्षो़पा पुगीन क्षो़पो़नक्या होदुरु एन्दुरु हो़तालाक। 5 होदे क्षो़पो़नक्या नाम्खे श्यीङखामगी ॱनेसागी पे धाङ ढीम्जाक हीन्गीन, धाम्पे धाम्पा ॱनेसारु श्याप्ची श्युवालाक घीझ्येरी ॱनाना मोशेगी धाम्पे घुरखाङगो शोये झ्यीदाराङ, को़न्क्षोकगी देरे का जेपालाक, “रीरु ख्यो़ला तो़न्गीन पेला तेन्दी, ख्यी़ दे घीरी शो़।” 6 हीना धा होरी चो क्षो़पो़न येशुला धान्दा, क्षो़पो़न ॱङीङबागी लेगेनने ल्हाक, श्याप्ची शाङा थोप हो़तालाक घीझ्येरी ॱनाना खोङबा होरी क्षीदु को़न्क्षोकमुला धाम्चा शाङागी भारमी जेदालाक। दे धाम्चागो क्षो़ताम शाङाक्याला तेन्दालाक। 7 धाम्चा धाङपोगो क्यो़न मेगीन हो़ना, धाम्चा ॱङीवागो घोये मेतालाक। 8 घीझ्येरी ॱनाना को़न्क्षोकगी मीक्याई क्यो़नक्या तो़न्दा जेदी सुवालाक, “चोवो सुङालाक, ङी ईस्राएलगी नाङमी धाङ याहुदागी नाङमीमुला, धाम्चा साबा च्यीक चुक्कीन, ङीमागोक्या ॱलेप्कीलाक। 9 धेनी ङी खुङक्याई धाङबी फामाक्याला, खुङक्याई लाक्पाने शीम्दी एजेप युने ठीयाराङ, खुङक्यामुला श्याकश्या धाम्चा च्योक्रे मालाक। खुङक्याई ङी धाम्चा ॱमारुङवा, ङीयाः खुङक्याला या माझ्ये, सुरी चोवोगी सुङालाक। 10 चोवो सुङालाक, होदे ङीमागो स्याम्ने, ङा ईस्राएलगी नाङमीमुला धाम्चा दे चुक्येहीन। ङा ङारी क्षो़ठीम खुङक्याई ॱलोला श्याक्येहीन, धेनी खुङक्याई सेमला ढीक्येहीन। ङा खुङक्याई को़न्क्षोक झ्युङयेहीन, धेनी खुङक्या ङी मीमाङ झ्युङगीलाक। 11 ‘को़न्क्षोकला ङो स्येघो़’ ॱनेरी, धा सी़याः राङगी खीम्चे याङना राङगी पी़न्दाक्याला ॱलाप मेघो़, घीझ्येरी ॱनाना च्युङाने क्षे थुक्पे, खुङक्या घीरीगी ङाला ङोस्येगीलाक। 12 ङा खुङक्याई लेङेनक्याला घोयाङ तेरयेहीन, धेनी खुङक्याई धीक्पाक्या नामा ढेन्सो़ झ्यीयेमेन।” 13 दे धाम्चा देला साबा सुङा जेदी, खोङगी धाम्चा धाङपोगोला ॱङीङबा जेदालाक। धेनी ॱङीङबा धाङ धी़चो़ जोक्चागो, ग्योक्वा येरी डुगीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.