ईब्रीपा 7 - ॱलोवाचो क्षो़पो़न मेल्कीजेदेकगी कोर 1 आब्राहाम ॱमाक टाप्ती ग्यारी लोक्ती हुङाराङ, सालेमगी ग्यावु धाङ ॱलानामेपे को़न्क्षोकगी क्षो़पो़न मेल्कीजेदेकला थुक्पालाक। धेनी खोङगी आब्राहामला झ्यीलाप ॱनावालाक। 2 धेनी खोङलाराङ आब्राहामगी राङला हो़गीन, घीरीगी ग्याजा च्यु पुवालाक। मेल्कीजेदेकगी छेनगी दो़न नी, धाङपो “ढाङतेनगी ग्यावु” लाक धेनी सालेमगी ग्यावु ॱनेरीयाः ॱनालाक। दी दो़न नी, “श्यीदेगी ग्यावु” लाक। 3 खोङगी आकी धाङ आमा धाङ रीग्यु धाङ केगीनगी धी़ याङना ढोङगीनगी धी़गी कोरला घीयाः मेतालाक। हीना खोङ नी, को़न्क्षोकगी से च्योक्रे, धी़ तेनगी क्षो़पो़न लाक। 4 खोङ नी घारे खाक्क्षे हो़गीनगो तो़दाङ। धाङबी मेमे आब्राहामगीयाः ॱमाक टाप्ती थोप्था घीरीगी ग्याजा च्यु, खोङला पुवालाक। 5 धेनी मोशेगी क्षो़ठीम नाङला, क्षो़पो़नगी घोक्जा थोप्था, लेवीगी ग्युपाक्याला राङगी पी़न ईस्राएल्पाक्याने ग्याजा च्यु धी़येगी का हो़तालाक। धेनी खुङक्याः आब्राहामगी भी़टुक लाक। 6 हीना लेवी ग्युपाने मेन्गीन, मेल्कीजेदेकगी आब्राहामने ग्याजा च्यु धी़वालाक। धेनी को़न्क्षोकगी धाम्चा थोप्था, आब्राहामला खी़ झ्यीलाप ॱनावालाक। 7 च्युङाला क्षेने झ्यीलाप थोप्कीनला थाप घोये घीया मेतालाक। 8 छोक च्यीकने स्यीरी ढोये हीन्गीन क्षो़पो़नक्याई ग्याजा च्यु धी़लालाक धेनी छोक श्येम्माने धी़ तेन्दु सो़न्पो ॱनेगीन, मेल्कीजेदेकगी ग्याजा च्यु धी़लालाक। 9 रीङगागी देरेयाः ॱना सीगीलाक, ग्याजा च्यु थोप्कीन लेवी खोराङगीयाः आब्राहामगी थोक्ने ग्याजा च्यु पुवालाक। 10 घीझ्येरी ॱनाना मेल्कीजेदेकगी आब्राहामला थुक्वाराङ, लेवी धाङ खी़ ग्युपागो खोरी धाङबी फामे ली़ नाङदुराङ हो़तालाक। येशु धाङ मेल्कीजेदेक 11 धा मीमाङक्याला ॱनाङना क्षो़ठीमला तेन्दी, लेवी क्षो़पो़नगी घोक्जा थोक्ने फी़न्सुम छोक्पा थोप्ये हीन्ना, आरोनगी ग्युपाने मेन्दा मेल्कीजेदेक च्योक्रे, श्येम्मा क्षो़पो़न झ्युङघोये हो़तालाक से? 12 घीझ्येरी ॱनाना क्षो़पो़नगी घोक्जा ज्येलाराङ क्षो़ठीमगोवाः ज्येघो़। 13 धा हीकी स्येगीन क्षो़पो़न दे नी, ग्युपा श्येम्माने लाक धेनी दे ग्युपाने सी़याः नामा क्षो़ठीला श्याप्ची श्यी़ माङ्युङालाक। 14 घीझ्येरी ॱनाना होरी चोवो नी, याहुदागी ग्युपाने लाक ॱनेरी सावो हो़तालाक। धेनी ग्युपा देने क्षो़पो़न झ्युङगीनगी कोरला, मोशेगी घीया ॱमासुङ हो़तालाक। 15 धा मेल्कीजेदेक च्योक्रे क्षो़पो़न झ्युङये हो़ना, दे लाब दे ॱयोल्ले सावो झ्युङालाक। 16 घीझ्येरी ॱनाना मी दे क्षो़ठीमगी काला च्योक्रे ग्युपाला तेन्दी मेन्दा, हीना मेताला डोये मेगीन छेगी नी़थुला तेन्दी क्षो़पो़न झ्युवालाक। 17 घीझ्येरी ॱनाना खोङबागी कोरला देरे सुदुक, “मेल्कीजेदेक च्योक्रे, ख्यो़याः धी़ तेनगी क्षीदु क्षो़पो़न लाक।” 18 एम्मागी कागो क्योवा धाङ फेन्थोक मेगीन झ्येरी, लाक्लेन ॱमाता श्याक हो़तालाक। 19 घीझ्येरी ॱनाना क्षो़ठीमगी घीयाः फी़न्सुम छोक्पा माशो़वालाक। हीना देला ल्हाक, रेवा शाङा च्यीक ॱनाङ हो़तालाक। धेनी दी गोने होराङ, को़न्क्षोकगी ङ्येडामला ॱलेवालाक। 20 धेनी को़न्क्षोकगी येशुला उ ॱना श्येरी, क्षो़पो़न जेपालाक। हीना मी श्येम्माक्याला ॱना माश्येवा क्षो़पो़न को़वालाक। 21 हीना खोङबाला उ ॱना श्येया जेदी, क्षो़पो़न को़वालाक। धेनी खोङबागी कोरला को़न्क्षोकगी देरे सुङा जेपालाक, “को़न्क्षोकगी उ ॱना श्ये जेदुक, धेनी खोङगी सेम ग्युरा जेगीमालाक, ‘ख्यो़ नी धी़ तेनगी क्षीदु क्षो़पो़न लाक।’” 22 उ ॱना देगी झ्येरी, येशु नी धाम्चा शाङागी गेन श्येगीन झ्युङालाक। 23 एम्मागी क्षो़पो़नक्याई ढाङगा माङा हो़तालाक घीझ्येरी ॱनाना खुङक्या ढोरी सोरी, राङगी क्षो़पो़नगी लेगाला ॱने ॱमाथुक्पालाक। 24 हीना येशु तेन्दु सो़न्पो ॱनेगीन झ्येरी, खोङबागी क्षो़पो़नगी लेगेनगो धी़ तेन्दु ॱनेलालाक। 25 होझ्येरी येशुगी थोक्ने को़न्क्षोकगी डुङदु हुङगीनक्याला, खोङबागी धी़ तेनगी क्षीदु थारपा जे थुक्वालाक घीझ्येरी ॱनाना खोङबा खुङक्याई दो़न्दु श्योवा पुयेला च्योई सो़न्पो ॱनेलालाक। 26 धेनी धाम्पा धाङ क्यो़न मेगीन धाङ चाङमा धाङ धीक्चेनक्याने, खा ढाडा धाङ नाम्खे श्यीङखामने थोवा जेजा चो क्षो़पो़न च्यीक, होराङला हुङ घो़ये हो़तालाक। 27 धेनी श्येम्मा चो क्षो़पो़नक्या च्योक्रे, खोङबागी एन्ला राङगी क्षीदु धेनी स्याम्ला श्येम्माक्याई धीक्पागी क्षीदु च्योई ॱमारछो़ पुघोये मेतालाक। धेनी खोङबागी राङगी सोक पुलाराङ थेङ च्यीकला, घीरीगी धीक्पाक्याई क्षीदु ॱमारछो़ च्यीक फी़वालाक। 28 घीझ्येरी ॱनाना क्षो़ठीमगी मी क्योवाक्याला चो क्षो़पो़न को़लालाक हीना धी़ तेनगी क्षीदु फी़न्सुम छोक्पा जेजा, को़न्क्षोकगी सेला क्षो़ठीमने श्युकला होवा उ ॱनागी कागी थोक्ने, खोङबाला चो क्षो़पो़न को़ जेपालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.