ईब्रीपा 6 - ॱलोवा1 होझ्येरी होराङ मास्यीकागी ॱमाङस्यीगी ॱलापच्याक्याला, धाब्ले कुल्ले ज्याङयेला छाम श्याक्ती हीना ॱलापच्या तीङरीङाक्या ज्याङये स्योकला डोउ। छीवाला ठीक्कीन लेगाक्याला ग्यो़पा झ्यीये धाङ को़न्क्षोकला धेपा झ्यीये च्योक्रे, ॱलापच्याक्याई ॱमाङस्यीगो होराङ धाब्ले तीङ घोये मेतालाक। 2 धेनी ठी़सो़ धाङ लाक्पा श्याक्ये धाङ छीवाने ॱलार सो़न्ये धाङ थामेपे ठीम्चो़क्याई कोरला, ॱलापच्याक्या धाब्ले ॱलाप घोये मेतालाक। 3 धेनी को़न्क्षोकगी थुक घेना, होराङ देरे झ्यीदु। 4 घीझ्येरी ॱनाना थेङ च्यीक को़न्क्षोकगी हो़ थोप्सासा धाङ नाम्खे श्यीङखामगी ॱनाङज्यीनगो, ङ्यामङ्युङ झ्येसासाक्या धाङ धाम्पे थुक्ङीगी कादा जोरसासाक्या, 5 धाङ को़न्क्षोकगी का शाङा धाङ माउपारगी धी़चो़गी नी़थुगी ढोवा लेन्सासाक्या, 6 धेपाने लोक्ना याङदा सेम ग्युरती, ग्यो़पा झ्यीरु च्युक्ये दे हुङथुक्येराङ मेतालाक। घीझ्येरी ॱनाना हुरे मीक्याई को़न्क्षोकगी सेला धाब्ले ग्याङस्यीङ खाला क्याङगीन च्योक्रे लाक धेनी घीरीगी दोङदु खोङबागी ङोजा पावालाक। 7 पेला श्याक्ना छार क्षु धाब्ले-धाब्ले थुरी, श्यीङबाक्याला लोदोक घा तेरकीन साश्यीला, को़न्क्षोकगी झ्यीलाप थोवालाक। 8 हीना होदे साश्यीगी छेम्मा धाङ युरमा केना, होदे फेन मेगीन धाङ ॱमेमो फोक्येगी ङेन्का हो़तालाक। धेनी थाला होदे मेगी ॱराक्कीलाक। 9 चेवेक्याओ, हेक्याई देरे लाब ताङनाः, खेक्याला थारपाला थी़न्गीन दो़न शाङाक्या थोप हो़तालाक ॱनेरी, हेक्याला यीच्चे तेन्पो हो़क। 10 घीझ्येरी ॱनाना को़न्क्षोक नी, मेढाङा मेतालाक। खेक्याई झ्यीगीन ले शाङाक्या धाङ खेक्याई खोङबाला चेवा झ्यीगीन झ्येरी, एम्मा धाम्पे मीक्याला श्याप्तोक पुपा धाङ धेनी धान्दा झ्यीगीन देला को़न्क्षोकगी ज्येदा जेगीमालाक। 11 खीकी रेवा झ्येजागो ॱङोन्ने डुप्येगी क्षीदु, खेक्या रे-रेगी था थुक्पे देरेराङ झ्येरी ची़न्डी़ झ्यीदास्योक ॱनेरी, हेक्या दो़दीहो़क। 12 धेनी खेक्या लेमेलाम्गीन माझ्युङवा हीना धेपा धाङ शो़पागी गोने, को़न्क्षोकगी धाम्चा थोप्थाक्या च्योक्रे, झ्युङगीनगो हेक्या दो़दीहो़क। को़न्क्षोकगी धाम्चा तेन-तेन हो़गीनगी कोर 13 को़न्क्षोकगी आब्राहामला धाम्चा जेदाराङ राङला क्षे सुवाः मेता, खोङबागी राङला पाङपो चुक्ती धाम्चा दे जेपालाक, 14 “ङा ॱङोन्ने ख्यो़ला झ्यीलाप तेरयेहीन धेनी ख्यी़ भुग्युला फेरु च्युक्येहीन।” 15 धेनी आब्राहामगी शो़पा झ्येरी घुक्ती, होदे धाम्चागो थोप्पालाक। 16 मीक्या ॱना क्याली घाङला, राङला क्षे च्यीक पाङपो चुक्ती ॱना क्यालालाक। धेनी खुङक्याई ॱङ्योक्टा घीरी ॱनानेराङ थाक चेदालाक। 17 देरे झ्येरी को़न्क्षोकगीयाः राङगी धाम्चा थोप्थाक्याला, राङगी थुकोङ ग्युरवा मेगीनगो सावो तो़न जेयेगी क्षीदु, उ ॱना श्येपालाक। 18 को़न्क्षोकगी ग्युरवा मेगीन धाम्चा धाङ ॱना ॱङीगारा ॱनाङा जेपालाक। घीझ्येरी ॱनाना को़न्क्षोकगी शोक सुङा मेजेदालाक। होझ्येरी होराङ खोङबाने क्याप थोप्थाक्या, होरी दोङदु हो़गीन रेवागोला तेन्पोमा ॱरुङयेला, सेमस्युक क्षे थोप हो़तालाक। 19 रेवा दे नी, सेमगी तीङधो च्योक्रे, ॱरा धाङ तेन्पो हो़तालाक। धेनी दी होराङला क्षो़खाङ नाङगी योल्वाने, को़न्क्षोकगी धाम्पे ॱनेसारु ठीयालाक। 20 धेनी दी नाङदु, येशु एन्लाराङ होरी छापला फेप्सालाक। धेनी खोङबा नी मेल्कीजेदेक च्योक्रे, होरी क्षीदु थामेपे चो क्षो़पो़न झ्युवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.