ईब्रीपा 5 - ॱलोवा1 चो क्षो़पो़न रे-रे मीक्याई, खोक्ने दामालाक धेनी खुङक्या मीक्याई क्षीदु को़न्क्षोकला क्षो़पा धाङ धीकस्याकगी, ॱमारछो़ पुयेगी क्षीदु को़लालाक। 2 धेनी खो खोराङ थापक्योवा हो़गीन झ्येरी, हुरे ॱमेस्येगीन धाङ लाम नोरना मीक्यामुला ज्याबोमा ढेवा झ्यी थुक्वालाक। 3 होझ्येरी मीक्याई धीक्पाक्या क्षीदु च्यीगा मेन्दा, खी़ खोराङ राङगी धीक्पाक्याई क्षीदुवाः धीकस्याकगी ॱमारछो़ पु घो़लालाक। 4 मी सी़याः चो क्षो़पो़नगी घोक्जा दे, राङगी थेदी मेलेन्दालाक हीना आरोनला भो़पा च्योक्रे, खोला को़न्क्षोकगी भो़ जेदालाक। 5 देरेराङ झ्येरी मास्यीकागीयाः चो क्षो़पो़न झ्युङयेला, राङगी राङला कुरती माजेपालाक हीना खोङला देरे सुङगीन को़न्क्षोकगी खोङला को़वालाक, “ख्यो़ नी ङी भु लाक। धीरीङ ङा ख्यी़ याप झ्युङ हो़क।” 6 सुङरापगी छोक श्येम्मा च्यीकला खोङबागी सुङालाक, “मेल्कीजेदेक च्योक्रे, ख्यो़याः धी़ तेनगी क्षीदु क्षो़पो़न लाक।” 7 येशु जीक्तेनदु श्युक्वाराङ, खोङबा स्युम्ती सुङकेक क्षेगी थोक्ने, खोङबाला छीवाने क्योप थुक्कीन, को़न्क्षोकला ॱमो़लाम धाङ श्योवा पुवालाक। धेनी खोङगी को़न्क्षोकला कुरती क्षे जेगीनगी केनगी, खोङबागी ॱमो़लाम सेन्दा जेपालाक। 8 खोङबा से झ्येरीयाः, राङगी ङ्याङङ्या दुक्पुक्याई गोने काला ङेन्ये ज्याङा जेपालाक। 9 धेनी दुक झ्येरी खोङला फी़न्सुम छोक्पा जेदी, खोङबा काला ङेन्गीन घीरीगी क्षीदु, खोङबा थामेपे थारपागी झ्युङखुङ झ्युवालाक। 10 धेनी मेल्कीजेदेक च्योक्रे, खोङबाला को़न्क्षोकगी चो क्षो़पो़न को़ जेपालाक। धेपाने लोक्येगी कोरला ङेन्ता 11 दी कोरला, हेक्या खेक्याला ॱनाये माङा हो़क हीना खेक्या ॱहाघोयेला ग्योङा झ्युरी, खेक्याला ढेस्ये ग्याप्ना काल्ले दुक। 12 घीझ्येरी ॱनाना धान्दा थुक्पे ता खेक्या ॱलोप्गीन झ्युङ घो़येहो़क हीना खेक्याला को़न्क्षोकगी कागी ॱमाङस्यीक्या धाब्ले ॱलाप्कीन च्यीक घोयेदुक। खेक्याला शामा दोक-दोक मेन्दा, होमा घोयेदुक। 13 घीझ्येरी ॱनाना होमा थुङगीन नी, टुवा च्योक्रे हीन्गीन झ्येरी, खो ढाङतेनगी काला ज्यो़न्दा मेयोङालाक। 14 हीना शामा दोक-दोक नी, मी ॱनाटो ॱङ्येङ्याक्याई क्षीदु लाक। खुङक्याई च्योई लाक्लेन झ्यीगीनगी गोने, शाङा धाङ ङेन्पागी ॱयेवा झ्यीयेला खेवा झ्यु हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.