ईब्रीपा 4 - ॱलोवाको़न्क्षोकगी धाम्चा जेजा ङासु 1 होझ्येरी को़न्क्षोकगी ङासु नाङ जुयेगी धाम्चागो हो़ती हो़तीयाः, खेक्याने सुवाः होदे ङासु नाङ जु ॱमीथुक्कीन मीझ्युङयेला, होराङक्या शाप-शाप झ्यीघो़। 2 घीझ्येरी ॱनाना खुङक्याला च्योक्रे, हेक्यालाः ताम्शाङगो सेटाक झ्येवालाक। हीना ङेन्गीनक्याई धेपागी थोक्ने, होदे ताम्शाङगो खेमालेम्बाला खुङक्याला घीया फेन्थोक माझ्युवालाक। 3 धेनी होराङ धेपा झ्यीगीनक्या, होदे ङासु नाङ जुगीलाक। खोङबागी देरे सुङ हो़तालाक, “ङी खोङडो लारी देरे ॱना क्यावी, ‘खुङक्या ङी ङासु नाङ नामा जुगीमालाक।’” घीहीन्ना खोङबागी क्षाक्लेक्या जीक्तेन को़गीन धी़नेराङ, डुप्सा हो़तालाक। 4 घीझ्येरी ॱनाना सुङरापगी छोक च्यीकला, खोङबागी ङीमा धी़न्बागी कोरला देरे सुङ हो़तालाक, “ङीमा धी़न्बागोला को़न्क्षोकगी क्षाक्ले घीरीने ङासु जेपालाक।” 5 धेनी याङ देगी नाङ खोङबागी देरे सुवालाक, “ङी ङासु नाङ खुङक्या नामा जुगीमालाक।” 6 होझ्येरी मी रीङगागी क्षीदु, होदे ङासु नाङ जुयेगी घुकाप धोराङा हो़तालाक। हीना एम्मा ताम्शाङ घोरकाक्याई, धेपा माझ्येवा होदे ङासु नाङ जु ॱमाथुक्पालाक। 7 को़न्क्षोकगी “धीरीङ” सुङगीन श्याक्मो च्यीक को़ जेपालाक। धेनी लो माङा स्याम्ने खोङबागी ग्यावु दावीदगी थोक्ने, एम्मा सुङगीन लाबगो याङ सुङा जेपालाक, “धीरीङ खेक्याई को़न्क्षोकगी सुङकेक घोरना, खेक्या राङगी सेम ग्योङा माशो।” 8 घीझ्येरी ॱनाना योस्युआगी खुङक्याला ङासु तेर हो़ना, को़न्क्षोकगी स्याम्ला ङासुगी ङीमा श्येम्मागी कोरला सुङा जेये मेतालाक। 9 होझ्येरी को़न्क्षोकगी मीक्याई दो़नला ङासुगीन ङीमा च्यीक श्याक हो़तालाक। 10 घीझ्येरी ॱनाना को़न्क्षोकगी राङगी क्षाक्लेक्याने ङासु जेगीन च्योक्रे, को़न्क्षोकगी ङासु नाङला जुये हीन्गीन घीरीगीयाः, राङगी लेगाक्याने ङासुगीलाक। 11 होझ्येरी खुङक्याई को़न्क्षोकगी काला माङेन्पा नोगीन च्योक्रे सुवाः मानोवास्योक ॱनेरी, होराङ होदे ङासु नाङ जुयेला थापस्यी हो़ले झ्यीघो़। 12 घीझ्येरी ॱनाना को़न्क्षोकगी का नी, सो़न्पो धाङ नी़थुक्षे हो़तालाक। धेनी खा ॱङी हो़गीन राल्डीने ॱनोवा हो़तालाक। दी ॱलो धाङ सेम धेनी छीक धाङ काङ ॱङीला दुबु-दुबुला स्यालाक धेनी सेमगी साम्सुक्या धाङ दो़पाक्याला ताक्चो़ झ्यीदालाक। 13 को़न्क्षोकगी ॱमीक्वादु को़पा घीरीने घीया बे मेतालाक। खोङबागी च्येनगी डुङदु दो़न घीरी सावो धाङ ॱमाकाप हो़तालाक। धेनी खोङबाला राङ होराङ होरी ची श्यु घोगुलाक। येशु चो क्षो़पो़न 14 होझ्येरी नाम्खे श्यीङखामदु फेया जेगीन, को़न्क्षोकगी से येशु होरी चो क्षो़पो़न झ्युजा झ्येरी, होराङक्या राङगी खेलेन झ्येजा धेपागोला तेन्पोमा ॱरुङघो़। 15 घीझ्येरी ॱनाना होरी थापक्योवागोला ॱङीङजे जे ॱमीथुप्कीन, चो क्षो़पो़न होराङला मेतालाक। होराङ च्योक्रे दो़न घीरीला छो़ताला छी़दीयाः, खोङबागी धीक्पा च्यीया ॱमाझ्येवालाक। 16 होझ्येरी घो़गीन धी़चो़ला रोक्राम झ्युङगीन, ॱङीङजे धाङ थुक्जेगो होराङला थोप्येगी क्षीला को़न्क्षोकगी श्युक्ठीगी डुङदु ॱलोगोक क्षे झ्येरी डो। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.