ईब्रीपा 3 - ॱलोवायेशु नी मोशेने खाक्क्षे 1 होझ्येरी नाम्खे श्यीङखामदु मुला भो़पा धाम्पे पी़नक्याओ, होरी खेलेन्ला कुछाप धाङ चो क्षो़पो़न येशुगी कोरला साम्लो तोङ। 2 को़न्क्षोकगी नाङमीक्यामुला मोशे ॱलोते छोक्पा हो़गीन च्योक्रे, येशु खोङला को़ जेगीनमुला ॱलोते छोक्पा हो़तालाक। 3 खाङबाने खाङबा शोगीनला कुरती ल्हाक हो़गीन च्योक्रे, मोशेने येशु धोराङा ल्हाक शीजेक्षे चीवालाक। 4 घीझ्येरी ॱनाना खाङबा रे-रेला चीक्खेन रे-रे हुङालाक हीना घीरी चीक्कीनगो नी, को़न्क्षोक लाक। 5 धा मोशे नी को़न्क्षोकगी नाङमीमुला श्याप्चीपा च्योक्रे, ॱलोते छोक्पा हो़गीन झ्येरी, माउपारला को़न्क्षोकगी सुङये हीन्गीन कागी कोरला, खी़ पाङपो झ्येवालाक। 6 हीना मास्यीका नी, को़न्क्षोकगी नाङमी खाला से च्योक्रे ॱलोते छोक्पा हो़तालाक। धा होरी रेवाला होराङ ॱङीङक्षे झ्ये धेनी ॱलोते तेन्पो श्याक्ना, होराङ को़न्क्षोकगी नाङमी लाक। धेपा मेगीनगी कोरला ङेन्ता 7 होझ्येरी धाम्पे थुक्ङीगी सुङालाक, “धीरीङ खेक्याई को़न्क्षोकगी सुङकेक घोरना, 8 रीतोङदु छो़तागी ङीमाला ङोलोक झ्येजा च्योक्रे, खेक्या राङगी सेम ग्योङा माशो़। 9 होदुरु खेक्याई धाङबी फामाक्याई ङी छो़ता झ्येवालाक, धेनी लो श्यीपच्यु थुक्पे खुङक्याई ङी लेगाक्या थोवालाक। 10 होझ्येरी ङा होदे मीक्यामुला ठो़वी धेनी ङी दे ॱनेवी, ‘खुङक्याई सेम च्योई खोरती धेतालाक, धेनी खुङक्याई ङी लाम ङो ॱमास्ये हो़तालाक।’ 11 होझ्येरी ङा खोङडो लारी ङी ॱना क्यावी, ‘खुङक्या ङी ङासु नाङदु नामा जुगीमालाक।’” 12 पी़नक्याओ, शाप-शाप झ्यी, खेक्याने रीङगागी नाङ हो़गीन ङेन्पा धाङ धेपा मेगीन सेमगी झ्येरी, खेक्याला सो़न्पो को़न्क्षोकने थाक्रीङा ॱमाठीयास्योक। 13 खेक्याने सी़याः सेम धीक्पे ॱली़टेगी ग्योङा मेयोङयेगी क्षीला, धीरीङगी ङीमा ॱनेरी हो़गीन थुक्पे, च्यीकगी च्यीकला ॱलोप्सो ग्योप। 14 घीझ्येरी ॱनाना होराङगी गोमागी ॱलोतेला, था थुक्पे तेन्पो झ्येरी था ख्योला झ्यीना, होराङ मास्यीकागी लेरोक झ्युङालाक। 15 धाम्पे सुङरापगी सुङालाक, “धीरीङ खेक्याई को़न्क्षोकगी सुङकेक घोरना, ङोलोकगी ङीमाला च्योक्रे, खेक्या राङगी सेम ग्योङा माशो।” 16 को़न्क्षोकगी सुङकेकगो घोरतीया, ङोलोक झ्यीगीनक्या सुले? खुङक्या मोशेगी ठीक्ठा एजेप युने थो़न्गीनक्या माले? 17 धेनी सी़मुला खोङबा लो श्यीपच्यु थुक्पे थुक ठो़वाले? रीतोङदु स्यीरी सोसा धीक्पा झ्यीगीनक्यामुला माले? 18 काला मेङेन्गीनक्या खोङबागी ङासुगी नाङ नामा मीजुगीलाक, सुरी खोङबागी ॱना क्या जेपामाले? 19 होझ्येरी खुङक्याई धेपा मेगीनगी झ्येरी, खुङक्या नामा जु ॱमाथुप्तागो होराङ स्येलालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.