ईब्रीपा 2 - ॱलोवाथारपागी कोरला दो़नाङ झ्यीघो़ 1 होझ्येरी होरी घी घोरकागोला, ॱयोल्ले ल्हाक दो़नाङ झ्यी घो़गुलाक। देरे मेन्ना होरी लाम नोरयेगी ङेन्का हो़क। 2 नाम्खे भाङछेनक्याई सेटाक झ्येजा, कागो ॱङोन्नेगी धेन्पा हीन्गीन झ्येरी, क्षो़ठीम ॱमीरुङगीन धाङ काला मेङेन्गीनक्याई क्षीदु, थोप घोये छेपागो फोक हो़तालाक। 3 धा होरी देरे थारपा क्षेला दो़नाङ ॱमेतेरना, होराङ घाङगी झ्येरी थारये? थारपा दे गोमागो चोवो राङगी सेटाक जेपालाक धेनी खोङने ङेन्गीनक्याई, होराङक्याला होदेगी धेन्पाङ झ्येवालाक। 4 धेनी को़न्क्षोकगीयाः ताकक्या धाङ ॱहाङसागीन क्षाक्लेक्या धाङ नी़थु ॱनाछोकगी क्षाक्लेक्या धाङ राङगी थुकोङला तेन्ती टामा जेजा, धाम्पे थुक्ङीगी ॱनाङज्यीनक्याई थोक्ने होदेगी धेन्पाङ जेपालाक। थारपाला ठीक्कीनगी कोर 5 होरी लाब ताङगीन माउपारगी जीक्तेनगो, को़न्क्षोकगी नाम्खे भाङछेनक्याई वाङ होकदु श्याक माजे हो़तालाक। 6 हीना धाम्पे सुङराप नाङदु साजा च्यीकदु देरे सुङ हो़तालाक, “मी घी लाक से, खेराङ होदेगी सेम्डा जेये? याङमेना मी-भु सु लाक से, खेराङ खी़ दो़नाङ जेये? 7 खेराङगी खोला ॱनेकापगी क्षीदु नाम्खे भाङछेनक्याने ॱमावा जेसोङ। खेराङगी खोला शीजे धाङ कुरतीगी चो़पो़न को़न जेपालाक। 8 धेनी दो़न घीरी खेराङगी, खी़ काङबी होकदु श्याक जेपालाक।” धेनी को़न्क्षोकगी दो़न घीरी खोङगी वाङ होकदु श्या जेदी, खोङगी वाङ होकला माश्याकस्या घीया मेक। हीना दो़न घीरी धान्दा खोङगी वाङ होकदु हो़गीनगो, होरी ॱमेथोङालाक। 9 हीना होराङ येशुला थोङालाक। खोङबा ॱनेकापगी क्षीदु नाम्खे भाङछेनक्याने च्यीमे ॱमावा जेपालाक। खोङगी छीवे दुक्पु ङ्याङङ्या झ्येरी, खोङला शीजे धाङ कुरतीगी चो़पो़न को़न्बालाक। धेनी दे नी को़न्क्षोकगी थुक्जेगी गोने, मी घीरीगी दो़न्दु खोङबागी छीवे दुक्पु ङ्याङास्योक ॱनेरी लाक। 10 ॱङोपो घीरी को़ जेगीन नी, को़न्क्षोक लाक धेनी घीरी खोङगी क्षीदु को़ जेपालाक। धेनी भीजा धाङ भोमो माङाला शीजे नाङदु ठीक्ती हुङयेगी क्षीदु, येशुला दुक्पु ङ्याङदु च्युक्ती फी़न्सुम छोक्पा जेयेगो, को़न्क्षोकगी क्षीदु ताक-ताक झ्युवालाक। येशुराङ खुङक्याला थारपाला ठीक्कीनगो लाक। 11 घीझ्येरी ॱनाना धाम्पा जेगेन धाङ धाम्पा झ्युजा घीरीगी याप च्यीक्पा लाक। होझ्येरी खुङक्याला पी़न ॱनेरी, भो़येला येशुगी ङोजा मेजेदालाक। 12 खोङगी को़न्क्षोकला सुङालाक, “ङी पी़नक्याई घुङदु, ङा खेराङगी छेन सेटाक झ्यीयेहीन। मीछोकगी घुङदु, ङा खेराङला तो़याङ पुयेहीन।” 13 धेनी याङ “ङा खोङगी खाला ॱलो कालाहीन।” धेनी याङ खोङगी सुङालाक, “ङा धाङ को़न्क्षोकगी ङाला ॱनाङना टुवाक्याला, तो़दाङ।” 14-15 छीवागी थोक्ने छीवागी दाक्पो धी़कला, खोङगी मेताला जेये धाङ छीवागी जीक्टागी मीछे घाङजाङ ढेन्योकला स्योरस्याक्याला, खोङबागी थारपा जेयेगी क्षीला भी़टुकक्या स्याठाकगी ली़ला झ्येरी, खोङबागीयाः मीगी ली़ ॱनुम्बालाक। 16 घीझ्येरी ॱनाना खोङगी नाम्खे भाङछेनक्याला मेन्दा हीना आब्राहामगी ग्युपाक्याला रोक्राम जेदालाक ॱनेरी, सावो दुक। 17 होझ्येरी मीक्याई धीक्पागी धीकस्याक पुयेला, खोङबा को़न्क्षोकगी श्याप्ची श्युगीन ॱङीङजेचेन धाङ ॱलोते छोक्पा क्षो़पो़न क्षे झ्युङयेगी क्षीदु, खोङ येशु नी, छोक घीरीने राङगी पी़नक्या च्योक्रे ग्युर घो़वालाक। 18 धेनी खोङबाराङ छो़ताला छी़दाराङ दुक्पु ङ्याङङ्या झ्येरी, छो़ताला छी़छाक्याला खोङबा रोक्राम जे थुक्वालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.