ईब्रीपा 13 - ॱलोवाथामे ॱलापच्या 1 खेक्या च्यीकगी च्यीकला पी़न्दा च्योक्रे, च्योई झाम्पा झ्यीघो़। 2 डो़न्बोक्याला नाङदु फेप्सु श्यी़येला, ढेन्बा माझ्ये घीझ्येरी ॱनाना देरेराङ झ्येरी, खेक्याने रीङगागी ॱहामाघोवाला नाम्खे भाङछेनक्याला फेप्सु श्यी़ हो़तालाक। 3 चो़न्खाङ नाङदु हो़गीनक्याला, खेक्याः खुङक्यामुला चो़न्खाङदु हो़गीन च्योक्रे झ्येरी ढेन्सो़ झ्यी। धेनी राङगी दुक्ङेल ङ्याङगीन च्योक्रे, दुक्पु ङ्याङगीनक्याला ढेन्सो झ्यी। 4 मी घीरीगी ॱङेन्डीला चीदोङ झ्यीघो़, धेनी नाङजाङ ॱङीगी घुङला लोक्येम मीझ्युङास्योक घीझ्येरी ॱनाना को़न्क्षोकगी लोक्येम्पाक्या धाङ दो़लोक झ्यीगीनक्याला ठीम्चो़ जेगीलाक। 5 खेक्या ॱङुला सेम्बा ॱमाक्षाक धेनी राङला घी हो़गीनगोला, दो़पा खाङा झ्यी घीझ्येरी ॱनाना को़न्क्षोकगी सुङ हो़तालाक, “ङा खेक्याला नामा मेभोर, धेनी ङा खेक्याला नामा ॱमेपाङ।” 6 होझ्येरी होराङक्या ॱलोते झ्येरी ॱनालाक, “ङाला रोवा झ्यीगीन नी चोवो लाक, ङा जीक्येमेन। मीगी ङाला घी झ्यी थुक्कीलाक से?” 7 खेक्याला को़न्क्षोकगी का स्येगीन, खेरी गोठीक्याला ढेन्बा माझ्ये। खुङक्याई मीछेगी ढेबुला साम्लो तोङ धेनी खुङक्याई धेपागी पे लेन। 8 येशु मास्यीका नी, दाङ धाङ धीरीङ धाङ धी़ ग्युनगी क्षीदु मीग्युरा श्युक्वालाक। 9 क्षो़ खेन्छा धाङ ढामेढाक्याई, खेक्याला ॱली़रु ॱमाच्युक। घीझ्येरी ॱनाना को़न्क्षोकगी थुक्जेगी गोने, मीगी सेम तेन्पो झ्युङालाक हीना शाये धाङ थुङयेगी ॱरोक्या ॱरुङदी मीझ्युङालाक। देरे ॱरो ॱरुङगीनक्याला घीयाः, फेन्थोक माझ्यु हो़तालाक। 10 होराङला क्षो़ठी च्यीक हो़तालाक धेनी होदे क्षो़ठीगी खाला पुपा क्षो़पाने घुरखाङ नाङदु, श्याप्ची श्यी़गीन क्षो़पो़नक्याई शा ॱमेछोक्वालाक। 11 चो क्षो़पो़नगी धीकस्याकगी ॱमारछो़गी क्षीदु, सेम्चेनगी ठाकगो धाम्पे धाम्पा ॱनेसारु खेरती हुङालाक हीना होदे सेम्चेनगी शुगो, गारगी फीला ॱरालाक। 12 होझ्येरी येशुगीयाः राङगी कुठाकगी गोने मीक्याला धाम्पा जेयेला, गेघोगी फीला दुक्पु ङ्यावालाक। 13 धा होझ्येरी होराङक्या गारगी फीला डोउ धेनी खोङबागी ङ्याङङ्या ङोछागो होराङक्याः ङ्याङु। 14 घीझ्येरी ॱनाना दे जीक्तेनदु होराङला तेन्जाक धेयेला ग्याजा मेतालाक हीना हुङये हीन्गीन ग्याजागोला होराङ घुक्ती धेतालाक। 15 होझ्येरी येशुगी गोने, होराङ को़न्क्षोकला च्योई तो़पागी क्षो़पा पुलो। दे नी, खोङगी छेन खेलेन झ्यीगीन होरी खागी ढेबु लाक। 16 ले शाङा झ्यीये धाङ राङला हो़गीनगो, श्येम्माक्यामुला घो़येला ढेन्बा माजे घीझ्येरी ॱनाना देरे क्षो़पाक्याला राङ को़न्क्षोक थुक्ङेउ जेदालाक। 17 राङगी गोठीक्याई काला ङेन धेनी खुङक्याई होकला धो़क। घीझ्येरी ॱनाना को़न्क्षोकला ची पु घोगुलाक ॱनेरी, खुङक्याई स्येये झ्येरी खुङक्याई खेक्याला तातोक झ्यीदालाक। धेनी सेम क्योरी मेन्दा हीना घाटोगी गोने, खुङक्याई दे लेगा दे झ्यीघो़। देरे मेन्ना होदेने खेक्याला घीया फेन्थोक मेतालाक। 18 हीकी क्षीदु ॱमो़लाम ग्योप। धेनी हेक्याई स्येशाङ सावो धाङ दो़न घीरीला हीकी ढाङपो झ्यीयेगी दो़पा हो़गीनगो, हेक्याला तेन्देन स्येयेहो़क। 19 ङा खेक्याचारु ग्योक्जे हुङ थुक्वास्योक ॱनेरी, ङी क्षीदु ॱमो़लाम ग्याप्रो झ्यी ॱनेरी, ङा ॱमीक्सेगी श्योवा पुलाहीन। 20 धा लुकगी लुक्जी क्षेन्बो हीन्गीन होरी, चोवो येशुला थामेपे धाम्चागी कुठाकगी थोक्ने, छीवाने कुसो़न्पो श्याङा जेगीन श्यीदेगी को़न्क्षोकगी, 21 राङगी थुकोङ डुप्येगी क्षीदु, खेक्याला दो़न शाङा घीरी ॱनाङास्योक। धेनी ग्युने ग्युन्दु शीजे हो़गीन येशु मास्यीकागी थोक्ने, खोङबा को़न्क्षोकला थुक्ङेउ हो़गीन लेगागो, खेक्या नाङ जेदास्योक। आमेन। 22 पी़नक्याओ, ङी खेक्याला यीक तुङ-तुङ च्यीक ढीक हो़क। धेनी ङी ॱलापच्याक्याला शो़पा झ्यी ॱनेरी, ङा श्योवा पुलाहीन। 23 होरी पी़न तीमोथेउ चो़न्खाङने थो़न्गीनगो, खेक्याई ॱहाघोकीनगो ङा दो़दीहो़क। धेनी खो ग्योक्वा ॱलेप्ना, ङा खी़मुला खेक्याला थुक्तु हुङाहीन। 24 खेक्याई गोठी घीरी धाङ धाम्पे मी घीरीला छाम्डी श्यी़। ईटाली युने हुङगीनक्याई खेक्याला छाम्डी श्यी़क। 25 खेक्या घीरीमुला को़न्क्षोकगी थुक्जे हुङास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.