ईब्रीपा 12 - ॱलोवाको़न्क्षोकगी ॱलापच्यागी कोर 1 होझ्येरी देरे माङा पाङपोगी ॱरीङबागी, होराङला कोरती धेता झ्येरी, होराङ खु ॱनाछोक धाङ लेल्हामोमा, गोकोर ताङगीन धीक्पाला पारी, होराङ होरी दोङदु श्याकश्या भाङदुरगो शो़पा झ्येरी भाङ ताङु। 2 होरी धेपागी गोचुक जेगीन धाङ था ख्यो़ला जेगीन, येशुला होराङ ताघो़। खोङबागी राङगी दोङदु श्याकश्या घाटोगी क्षीदु, ग्याङस्यीङगी दुक्पुगो शो़पा झ्येरी, खुरा जेपालाक धेनी क्षालेला थोङच्युङ जेपालाक। धेनी खोङ को़न्क्षोकगी श्युक्ठीगी ॱये स्योकला श्युक हो़तालाक। 3 खेक्या थाङ ॱमेछेये धाङ सेमस्युक ॱमेछाक्येगी क्षीला, धीक्चेनक्याने हुरे ङोलोकक्या शो़पा जेगीन, खोङबा येशुला साम्लो तोङ। 4 खेक्या धीक्पामुला थाप्पाराङ ठाक ॱली़ घोयेगी ॱनेछु थुक्पे, धोराङाः खेक्या ॱमालेप हो़तालाक। 5 खेक्याला सेक्या सुरी भो़ जेगीन, खोङबागी ॱलापच्याक्या खेक्याई ढेन्बा ज्येसाले? “ङी भु, चोवोगी ॱलापच्याला ॱनाङमे ॱमाची, धेनी खोङबागी काको़न जेदाराङ सेम ॱमाफाम। 6 घीझ्येरी ॱनाना चोवोगी झाम्पा जेगीनक्याला ॱलापच्या जेदालाक, धेनी राङगी भु चीगीन हो़लेला, छेपा का जेदालाक।” 7 ॱलापच्यागी क्षीदु, खेक्या दुक्पुक्याला शो़पा झ्यी घोलालाक। को़न्क्षोकगी खेक्याला राङगी भुला च्योक्रे, च्यो़पा जेदालाक। घीझ्येरी ॱनाना आकी च्यीकगी राङगी टुला ॱलापच्या ॱमेतेरकीन हुङाले? 8 हीना घीरीला ॱलापच्या ग्याप्कीन च्योक्रे, ख्यो़ला ॱलापच्या मेग्याप्ना, ख्यो़ खी़ टु ॱङोन्नेगो मेन्दा ङ्यालुक लाक। 9 दे च्यीगा मेन्दा, होराङला ॱलापच्या ग्याप्कीन होरी, जीक्तेनगी आकी हो़तालाक धेनी होरी खुङक्याला घुस्याप झ्यीदालाक। धा ॱहाना होराङ सेम्ङीगी यापला, होदेने ल्हाक काला ङेन्दी छोवा क्या घोगुमाले? 10 घीझ्येरी ॱनाना होरी जीक्तेनगी आकीगी राङगी घा साम्गीन च्योक्रे, धी़ तीते च्यीक होराङला ॱलापच्या ग्यावालाक हीना को़न्क्षोकगी होराङ खोङबा च्योक्रे, धाम्पा झ्युङयेगी क्षीदु, होरी फेन्थोकगी क्षीदु होराङला ॱलापच्या ग्यावा जेदालाक। 11 ॱलापच्या घीरी गोमागोला कीदाने दुक्पु माङा हुङालाक हीना स्याम्ला होदे ङ्याङ ङ्युङगीनक्याला, ढाङतेन धाङ श्यीदेगी ढेबु थोवालाक। 12 होझ्येरी खेक्याई थाङ क्षेछा लाक्पाक्या क्योङ धेनी दारती धेता पी़मुक्या स्युक्क्षे शो़। 13 श्याक्योक्याई छीकक्या मीबी़दा हीना ढाक्वा स्योक ॱनेरी, खेरी काङबी क्षीदु लाम खाप्ते शो़। को़न्क्षोकला खेलेन मीझ्यीगीनगी कोरला ङेन्ता 14 मी घीरीमुला थी़न्दी धेये धाङ धाम्पा झ्युङयेला, थापस्यी झ्यी। धेनी धाम्पा मेना मी सी़या चोवोला ज्या ॱमीथुक्कीलाक। 15 मी सुवा को़न्क्षोकगी थुक्जे थोप्येने खा माडास्योक ॱनेरी, दो़नाङ झ्यी। धेनी खेक्याला ॱङ्योक्टा ॱलाङगीन धाङ माङाला ॱमेचाङा शोगीन, दुकगी चावागो केरु ॱमीच्युक्येला दो़नाङ झ्यी। 16 धेनी सुवाः छाक च्यीकगी शामागी क्षीदु, राङ भीजा क्षे हीन्गीनगी थोप्ताङगो चोङगीन एसाउ च्योक्रे, लोक्येम्पा धाङ क्षो़ मेगीन माझ्युङवास्योक। 17 खेक्याला स्येये हो़तालाक, होदे स्याम्ने खी़ खोरी थोप्ताङगी झ्यीलापगो थोप्ये दो़पा झ्यीदाराङ, खोला ॱमाथोप्पालाक। धेनी खी़ क्षीमाक तारी श्योवा पुनाः, घी झ्युसागीनगोला खी़ घीयाः ग्युर ॱमाथुक्पालाक। 18 खेक्या ईस्राएल्पाक्या च्योक्रे, लाक्पी जु थुक्कीन धाङ मे भारती धेता धाङ मी़नाक धाङ ॱमुक्पी तुम्दा धाङ ॱलुङ खोरती धेता रीला मायो हो़तालाक। 19 होदुरु खुङक्याई दुङकेक क्षे धाङ सुङकेक च्यीक घोरपालाक धेनी होदे सुङकेक घोराराङ, खुङक्याई देने ल्हाक सुङा माजे ॱनेरी, को़न्क्षोकला श्योवा पुवालाक। 20 घीझ्येरी ॱनाना “सेम्चेन च्यीकगीयाः, री देला जुना होदेला धोगोङ श्युरती सेघो़।” सुरी सुङगीन का दे, खुङक्याई शो़पा झ्यी ॱमाथुक्पालाक। 21 धेनी होदुरु घी झ्युजागो ॱमीच्यीकी जीक्टाक्षे झ्येरी, मोशेगीयाः देरे सुवालाक, “ङा जीक्ती दारी।” 22 हीना खेक्या सो़न्पो को़न्क्षोकगी ग्याजा, नाम्खे श्यीङखामगी येरुसालेम धेनी ढाङगा ॱमेथेगीन, नाम्खे भाङछेन तोङठाकगी घाटोगी छोक्दुरु, सीयोनगी रीला हो हो़तालाक। 23 नाम्खे श्यीङखामदु मीङ ढीक्टा एन्ला केक्या क्याई छोक्दुरु, खेक्या हो हो़तालाक। धेनी खेक्या मी घीरीगी ठीम्पो़न हीन्गीन को़न्क्षोक चारु धेनी फी़न्सुम छोक्पा जेजा, ढाङतेनगी मीक्याई सेम्ङीगी घुङदु, 24 धेनी धाम्चा साबागी भारमी जेगीन येशुगी डुङदु धेनी हाबेलगी ठाकने का शाङा सुङगीन, कुठाक तोरकीनगी दोङदु खेक्या हो हो़तालाक। 25 खोङबा का सुङगीनगोला खेक्या खेलेन झ्यी, खेक्या शाप-शाप झ्यी। घीझ्येरी ॱनाना जीक्तेनदु ङेन्ता ताङगीनगोला, ईस्राएल्पाक्याई खेलेन माझ्येवा ॱमाथार हो़ना, होराङला नाम्खे श्यीङखामने ङेन्ता जेगीनगोला, होरी खेलेन मीझ्यीना होराङ घाङगी झ्येरी थारये? 26 होदे घाङला खोङबागी सुङकेकगी साश्यी घु-घु तावालाक हीना धान्दा खोङबागी धाम्चा जेदी सुङ हो़तालाक, “धोराङाः थेङ च्यीक ङा साश्यी च्यीगा मेन्दा, नाम्खे श्यीङखामक्याः घु-घु ताङयेहीन।” 27 “धोराङाः थेङ च्यीक” सुङगीन का दी, को़पागी नाङ हो़गीन घु-घु ताङ थुक्कीन घीरी मेताला जेगीलाक धेनी घु-घु ताङ ॱमीथुक्कीनक्या ॱनेगीलाक। 28 होझ्येरी घु-घु ताङ ॱमीथुक्कीन ग्यासी थोप्था, होराङक्या को़न्क्षोकला काटीन्क्षे श्युउ। धेनी कुरती धाङ जीक्नाङगी थोक्ने, को़न्क्षोकला थुक्ङेउ झ्युङगीन क्षाक्क्षो़पा पुलो। 29 घीझ्येरी ॱनाना होरी को़न्क्षोक नी, चामेदु ताङगीन मे लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.