ईब्रीपा 11 - ॱलोवाधेपागी पेक्या 1 धा धेपा नी, होरी रेवा झ्यीगीन दो़नगी ॱलोते धाङ होरी ॱमीकगी ॱमेथोङगीन, दो़नक्याई रेवा तेन्पोगो लाक। 2 घीझ्येरी ॱनाना धेपागी गोनेराङ, धाङबी मीक्याला को़न्क्षोकगी थुक्ङेउ जेपालाक। 3 धेपागी गोने जीक्तेन खाम घीरी, को़न्क्षोकगी कागी थोक्ने को़वालाक ॱनेरी, होराङ ॱहाघोरालाक। होझ्येरी ॱमीकगी थोङगीनगो, थोङ ॱमीथुक्कीनगी गोने को़वालाक। 4 धेपागी गोने हाबेलगी खी़ पी़न कायीनने ल्हाक, शाङा क्षो़पा को़न्क्षोकला पुवालाक। धेनी को़न्क्षोकगी हाबेलगी क्षो़पाला थुक्ङेउ जेदी, खो ढाङपो चीवालाक। धेनी हाबेल ढोङसारतीयाः धेपागी गोनेराङ, खो धान्दा लाब ताङालाक। 5 धेपागी गोने हेनोक छीवा माङ्यावा, नाम्खे श्यीङखामला ठीक्पालाक। धेनी खो घारुवा ॱमाङेपालाक घीझ्येरी ॱनाना को़न्क्षोकगी खोला ठीया जेपालाक। खो याला ठीक्ये एन्ला, को़न्क्षोकला थुक घेरु च्युक्कीन मी च्यीक हो़तालाक। 6 धेपा मेता को़न्क्षोकला थुक घेरु च्युक थुक्ये मेतालाक घीझ्येरी ॱनाना को़न्क्षोकगी डुङदु हुङगीनक्याई, को़न्क्षोक हो़गीन धाङ खोङला चागीनक्याला खोङबागी ज्यागा ॱनाङगीलाक ॱनेरी, यीच्चे झ्यीघो़। 7 धेपागी गोने नोआगी होदे घाङला ॱमाथोथा ॱनेछुगी कोरला, को़न्क्षोकने ङेन्ता झ्युरी, राङगी नाङमीला क्योप्येला, खी़ ॱङीङकुर झ्येरी, डुश्यीङ च्यीक शो़वालाक। दी गोने, खी़ जीक्तेनगी क्यो़न तो़न्बालाक धेनी धेपाने झ्युङगीन ढाङतेनगी ग्युज्यीनगो, खोला थोप्पालाक। 8 धेपागी गोने को़न्क्षोकगी आब्राहामला ॱनाङयेगी धाम्चा जेजा, यु च्यीकरु डोयेला भो़ली घाङला, खो घारु डोये हीन्गीनगो स्येये मेतालाः, खो काला ङेन्दी सोवालाक। 9 धेपागी गोने खो धाम्चा जेजा युगोरु, ख्याम्दी ग्युक्कीन मी च्योक्रे, घुर नाङदु धेपालाक। धेनी धाम्चा च्यीक्पागी ग्युज्यीन हीन्गीन ईसाक धाङ याकोब ॱङीउवाः, देरेराङ झ्येरी घुर नाङदु धेपालाक। 10 घीझ्येरी ॱनाना ॱमाङस्यी तेन्पो हो़गीन ग्याजागोला, खो घुक्ती धेबालाक। धेनी दे ग्याजागी झ्यी़ जेगीन धाङ शो़गीनगो को़न्क्षोक लाक। 11 धेपागी गोने सारा घेमो झ्युरीयाः, टु केथुप्येगी नी़पा थोप्पालाक घीझ्येरी ॱनाना धाम्चा जेगीन खोङबा नी, ॱलोते छोक्पा हो़गीनगो मी़ चीवालाक। 12 होझ्येरी स्यीये हीन्गीन ली़ च्योक्रे झ्युजा मी च्यीकगी थोक्ने, ॱनामगी कारमाक्या धाङ ग्याछोगी भेमाक्या चो़, ढाङगा ग्याप ॱमीथुक्कीन भुग्युक्या झ्युवालाक। 13 धाम्चा जेजागो ॱमाथोप्पालाराङ, खुङक्या घीरी धेपा झ्येरी ढोवालाक। धेनी खुङक्याई राङला दे जीक्तेनदु क्षीग्या धाङ ख्याम्बो हीन्गीनगो खेलेन्दी, होदे धाम्चा जेजागो थाक्रीङानेराङ थोरी फेप्सु श्यी़वालाक। 14 देरे ॱनागीन मीक्याई राङगी क्षीदु, यु च्यीक चारी धेगीनगो सावो तो़न्दालाक। 15 खोराङक्या थो़न्दी होवा युगी कोरला, खुङक्याई ढेन्सो़ झ्येहो़ना, खुङक्या होदुरु लोक्ती डोयेगी घुकाप थोप्ये हो़तालाक। 16 हीना खुङक्या देने ल्हाक शाङा नाम्खे श्यीङखामगी यु च्योक्रे, च्यीकगी दो़पा झ्यीदालाक। होझ्येरी को़न्क्षोक खुङक्याई को़न्क्षोक हीन सुरी सुङयेला, ङोजा मेजेदालाक घीझ्येरी ॱनाना खोङबागी खुङक्याई क्षीला ग्याजा च्यीक डाढीक जे हो़तालाक। 17 धेपागी गोने को़न्क्षोकगी आब्राहामला छो़ता जेदाराङ, खोङगी राङगी भीजा ईसाकला ॱमारछो़ पुवालाक। खोङला धाम्चाक्या थोप्तीयाः राङगी भीजा च्यीक च्यीगारागोला, ॱमारछो़ पुयेला डाढीक झ्युवालाक। 18 होदे भीजागी कोरला को़न्क्षोकगी खोला सुवालाक, “ईसाकगी थोक्नेराङ ख्यी़ भुग्युगी मीङ थोप्कीलाक।” 19 को़न्क्षोकगी मीक्याला छीवाने याङ सो़न्पो जे थुक्वालाक ॱनेरी, आब्राहामगी साम्बालाक धेनी खी़ साम्गीन च्योक्रे, ईसाकला छीवाने धाब्ले थोप्पालाक। 20 धेपागी गोने ईसाकगी याकोब धाङ एसाउला, खुङक्याई माउपारगी दो़नला झ्यीलाप ॱनावालाक। 21 धेपागी गोने याकोब ढोङगु झ्यीदाराङ, योसेफगी भु रे-रेला झ्यीलाप ॱनावालाक धेनी राङगी भेक्योक खाला ॱङेरी, को़न्क्षोकला ॱङीङकुर फी़वालाक। 22 धेपागी गोने योसेफ ढोङ रीङदाराङ, ईस्राएल्पाक्या एजेपने थो़न्ये हीन्गीनगी कोरला ॱनेवालाक धेनी राङगी फुङबु कुङयेगी कोरला खाछेम श्याक्पालाक। 23 धेपागी गोने मोशेगी फामागी खो केलाराङ जेवा थोरी, ग्यावुगी का चीयेला माजीक्पा, खोला दावा सुम थुक्पे बेरी श्याक्पालाक। 24 धेपागी गोने मोशे ख्योक्तोङ छारती, एजेप ग्यावुगी भोमोगी ॱरेउ हीन ॱनेरी, ॱनायेला खेमालेन्बालाक। 25 ॱनेकापगी क्षीदु धीक्पे कीदाला ङ्यामो घाये ले, को़न्क्षोकगी मीक्यामुला दुक्पु ङ्याङयेगो खी़ दाम्बालाक। 26 खी़ माउपारगी ज्यागाला ॱमीक्ती, एजेप युगी तेर ले, मास्यीकागी क्षीदु दुक्पु ङ्याङयेगो ॱयोल्ले खाक्क्षे चीवालाक। 27 धेपागी गोने खी़ ग्यावुगी थुक्ठो़ला माजीक्वा, एजेप युने थो़न्दी सोवालाक। घीझ्येरी ॱनाना ॱमीकगी थोङ ॱमीथुक्कीन को़न्क्षोकला थोथा च्योक्रे, खो तेन्पो झ्येरी धेपालाक। 28 गोमा केक्या भुला मेताला ताङगीनगी़, ईस्राएलगी गोमा केक्या भुक्याला थो ॱमेताङये क्षीदु, धेपागी गोने खी़ पेसाकगी धी़छेन ॱरुवालाक धेनी ठाक तोरपालाक। 29 धेपागी गोने ईस्राएल्पाक्या सा काम्बोने डोगीन च्योक्रे, ग्याछो ॱमाउगोने सोवालाक हीना एजेप्पाक्या, होदेरे झ्येरी डोगु झ्यीदाराङ भीप्ती स्यीवालाक। 30 धेपागी गोने ङीमा धी़न थुक्पे, ईस्राएल्पाक्याई यारीको ग्याजाला कोरा ग्याप्ती, होदेगी च्यारीगो धीप्पालाक। 31 धेपागी गोने श्याङचोङमा राहाबगी, मी सोवाक्याला घामोमा झ्येरी फेप्सु श्यी़स्या झ्येरी, काला मेङेन्गीनक्यामुला मो ॱमास्यीवालाक। 32 धा देने ल्हाक ङा घी ॱनाये? गीदेयो़न धाङ बाराक धाङ सामसोन धाङ एप्था धाङ दावीद धाङ सामुएल धाङ ॱङो़नस्येखेनक्याई कोरला, ङाला ॱनालोङ मेक। 33 धेपागी गोने खुङक्याई ग्याखापक्या थोप्पालाक धेनी ठीम्चो़ धेन्पा च्येपालाक धेनी धाम्चा जेजागो थोप्पालाक धेनी सीङगेक्याई, खा काक्पालाक धेनी 34 मेडाकक्या सेपालाक धेनी राल्डीगी खाने थारपालाक धेनी थापक्योवाने स्युक्क्षे झ्युवालाक धेनी ॱमाकला आङक्षे झ्युवालाक धेनी क्षीग्यागी ॱमाक्मीक्याला डो़रु च्युक्पालाक। 35 भोमोक्याला राङगी नाङमी स्यीस्याक्या, छीवाने सो़न्पो झ्युरी थोप्पालाक। धेनी श्येम्माक्याई छीवाने ॱलार सो़न्दी, छे देने ल्हाक शाङा छे थोप्येगी क्षीदु, राङवाङगो खेमेलेन्दा दुक्पुगो ङ्याङवालाक। 36 धेनी श्येम्माक्याला क्षाले ताङये धाङ ताच्याकगी दुङदाक फोक्पालाक धेनी रीङगाला च्याक्डोक ग्युवालाक धेनी रीङगाला चो़नला चुक्पालाक। 37 खुङक्याला धोगोङ श्युरती सेपालाक। खुङक्याला सोक्लेगी दुबु ॱङीला च्येपालाक। खुङक्याला राल्डीगी सेपालाक। खुङक्या उटे झ्युरी, दुक्पु ङ्याङदी धेनी मीक्याई खुङक्याला आ झ्येरी खुङक्या रा धाङ लुकगी पावोक्या घो़न्दी, ख्याम्दी ग्युक्पालाक। 38 दे जीक्तेनदु धेयेगो खुङक्याई क्षीदु माढीक्पा, खुङक्या रीतोङ धाङ रीक्याला ख्याम्दी धाङ डाक्फुक्या धाङ सादोङक्याला धेपालाक। 39 खुङक्या घीरीला धेपागी गोने को़न्क्षोकगी थुक्ङेउ जेपालाक हीना धाम्चा जेजागो, खुङक्याला ॱमाथोप्पालाक। 40 घीझ्येरी ॱनाना होराङक्यामुला, खुङक्या फी़न्सुम छोक्पा झ्युङास्योक ॱनेरी, को़न्क्षोकगी होराङला देने ल्हाक शाङा क्षास्यी स्याम हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.